ຂ່າວຫຼ້າສຸດ

ຣັດ​ເຊຍ ສົ່ງ​ຍານ​ອາ​ວະ​ກາດ Soyuz MS-11 ຂຶ້ນ​ສູ່​ວົງ​ໂຄຈອນ

60 06 ທ.ວ. 2018 ຂ່າວຕ່າງປະເທດ
ຣັດ​ເຊຍ ສົ່ງ​ຍານ​ອາ​ວະ​ກາດ Soyuz MS-11 ຂຶ້ນ​ສູ່​ວົງ​ໂຄຈອນ

     ອົງການ​ອາ​ວະ​ກາດ​ແຫ່ງ​ສະຫະພັນ​ຣັດ​ເຊຍ (Roscosmos) ແຈ້ງ​ໃຫ້​ຮູ້ເມື່ອ​ວັນ​ທີ 3 ທັນວາ​ນີ້​ວ່າ ລູກ​ສອນ​ໄຟ​ໂຊ​ຢຸ​​ສ (Soyuz) ແບບ​ຍູ້ ຊຶ່ງ​ເຮັດ​ໜ້າທີ່​ນຳ​ເອົາ​ຍານ​ອາ​ວະ​ກາດ Soyuz MS-11 ພ້ອມ​ດ້ວຍ​ຈຸ​ບິນ ຂຶ້ນ​ເມືອ​ຍັງ​ສະຖານີ​ອາ​ວະ​ກາດ​ສາກົນ (ISS) ນັ້ນ​ໄດ້​ຖືກ​ຍິງ​ຂຶ້ນ ສູ່​ວົງ​ໂຄຈອນ​ດ້ວຍ​ຄວາມ​ສຳເລັດ. ນີ້​ເປັນ​ການ​ຂົນສົ່ງ​ຂຶ້ນ​ສູ່​ວົງ​ໂຄຈອນ ໃນ​ອາ​ວະ​ກາດ​ເປັນ​ເທື່ອ​ທຳ​ອິດ ຂອງ​ຍານ Soyuz ນັບ​ແຕ່​ເກີດ​ເຫດ​ຂັດຂ້ອງ​ເມື່ອ​ເດືອນ​ຕຸລາ​ທີ່​ຜ່ານ​ມາ ເປັນຕົ້ນ​ມາ.

   ຍານ​ອາ​ວະ​ກາດ Soyuz MS-11 ພ້ອມ​ດ້ວຍ​ນັກ​ບິນ​ອາ​ວະ​ກາດ 3 ຄົນ ໄດ້ແກ່ ໂອ​ເລັກ ໂກ​ໂນ​ເນນ​ໂກ (ຊາວ​ຣັດ​ເຊຍ) ແອນ ແມກ​ຄລຽນ ຈາກ​ອົງການ​ການບິນ​ອາ​ວະ​ກາດ ສ ອາ​ເມ​ຣິ​ກາ (NASA) ແລະ ເດ​ວິດ ແຊງ-ຈັກ​ເກ​​ສ ຈາກ​ອົງການ​ການບິນ​ອາ​ວະ​ກາດ​ກາ​ນາ​ດາ ໄດ້​ຖືກ​ຍິງ​ສົ່ງ​ຂຶ້ນ ສູ່​ຮ່ວງ​ອາ​ວະ​ກາດ ຈາກ​ສະໜາມ​ບິນ​ອາ​ວະ​ກາດ ໄບ​ໂກ​ນົວ ໃນ​ກາ​ຊັກ​ສະຖານ ເພື່ອ​ປະຕິບັດ ພາລະກິດ​ແກ່ຍາວ​ເປັນ​ເວລາ 6 ເດືອນ​ເຄິ່ງ.

    ໃນ​ວັນ​ທີ 3 ທັນວາ​ເຊັ່ນ​ດຽວ​ກັນ ກຸ່ມ​ບໍລິສັດ​ເຕັກ​ໂນ​ໂລ​ຊີ​ສຳ​ຫຼວດ​ຮ່ວງ​ອາ​ວະ​ກາດ SpaceX ໄດ້​ນຳ​ໃຊ້​ລູກ​ສອນ​ໄຟ Falcon 9 ເພື່ອ​ນຳ​ເອົາ​ດາວ​ທຽມ​ຂຶ້ນ​ສູ່​ຮ່ວງ​ອາ​ວະ​ກາດ ພາບ​ກັນ 64 ດວງ.

   ຫຼັງ​ຈາກ​ຍິງ​ສົ່ງ​ໄດ້​ບໍ່​ພໍ​ເທົ່າໃດ​ນາທີ ຊັ້ນ​ທີ​ໜຶ່ງ​ຂອງ​ລູກ​ສອນ​ໄຟ ກໍ​ໄດ້​ແຍກ​ອອກ​ຈາກ​ຊັ້ນ​ທີ​ສອງ. ຫຼັງ​ຈາກ​ນັ້ນ ເຄື່ອງ​ຈັກ​ຂອງ​ຊັ້ນ​ທີ​ໜຶ່ງ ກໍ​ໄດ້​ກະ​ຕຸ້ນ​ການເຄື່ອນໄຫວ ແລະ​ບິນ​ລົງ​ຈອດ​ຢ່າງ​ມີ​ການ ຄວບ​ຄຸມ​ໃນ​ທ່າ​ຕັ້ງ​ສາກ ລົງ​ສູ່​ຖານ​ຮອງ​ຮັບ ຢູ່​ໃນ​ມະຫາ​ສະໝຸດ​ປາ​ຊີ​ຟິກ. ໃນ​ຂະນະ​ດຽວ​ກັນ ຊັ້ນ​ທີ​ສອງ​ຂອງ​ລູກ​ສອນ​ໄຟ ກໍ​ໄດ້​ບິນ​ເລິກ​ເຂົ້າ​ໄປ​ໃນ​ຮ່ວງ​ອາ​ວະ​ກາດ ຊຶ່ງ​ນຳ​ເອົາ​ດາວ​ທຽມ ຂະໜາດ​ນ້ອຍ ຈຳນວນ 15 ດວງ ແລະ​ ດາວ​ທຽມ CubeSats ຈຳນວນ 49 ດວງ ໄປ​ພ້ອມ ໂດຍ​ເປັນ​ຂອງ​ລູກ​ຄ້າ 34 ລາຍ​ທີ່​ແຕກ​ຕ່າງ​ກັນ ຈາກ 17 ປະເທດ.

 

ຂ່າວທີ່ກ່ຽວຂ້ອງ