ຂ່າວຫຼ້າສຸດ

ແຂ່ງຂັນກີລາບານສົ່ງທົ່ວປະເທດ ຊີງຂັນປະທານ ສບລ 2018

99 06 ທ.ວ. 2018 ວົງຈອນກີລາ
ແຂ່ງຂັນກີລາບານສົ່ງທົ່ວປະເທດ ຊີງຂັນປະທານ ສບລ 2018

    ການ​ການ​ແຂ່ງ­ຂັນ​ກີ­ລາ​ບານ­ສົ່ງ​ໃນ​ຮົ່ມ​ປະ­ເພດ​ທີມ​ຍິງ-ທີມ​ຊາຍ​ທົ່ວ​ປະ­ເທດ ຊີງ​ຂັນ​ປະ­ທານ​ສະ­ຫະ­ພັນ​ບານ­ສົ່ງ​ແຫ່ງ​ຊາດ​ລາວ (ສບລ) ປະ­ຈຳ​ປີ 2018 ເພື່ອ​ສ້າງ​ຂະ​ບວນ​ການ​ຕ້ອນ­ຮັບ​ວັນ​ສຳ­ຄັນ​ຕ່າງໆ​ຂອງ​ຊາດ-ຂອງ​ພັກ ໄດ້​ຈັດ​ຂຶ້ນ​ວັນ​ທີ 3-9 ທັນ­ວາ 2018 ທີ່​ສະ­ໜາມ​ກີ­ລາ​ບານ­ສົ່ງ​ແຫ່ງ​ຊາດ (ຫຼັກ 16) ນະ­ຄອນ­ຫຼວງ​ວຽງ​ຈັນ ມີ​ທ່ານ ແສງ​ພອນ ພົນ​ອາ­ມາດ ຫົວ­ໜ້າ​ກົມ​ກີ­ລາ​ລະ­ດັບ​ສູງ ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ແລະ ທ່ານ ຈັນ​ສະ­ໝອນ ຜ່ອງ​ຈັນ­ທາ ປະ­ທານ​ສະ­ຫະ­ພັນ​ບານ­ສົ່ງ​ແຫ່ງ​ຊາດ​ລາວ ພ້ອມ​ດ້ວຍ​ຄະ­ນະ​ບໍ­ລິ­ຫານ​ງານ ສບລ ບັນ­ດາ​ສະ­ໂມ­ສອນ​ບານ­ສົ່ງ​ອ້ອມ​ຂ້າງ​ສູນ​ກາງ ຄູ​ເຝິກ ແລະ ນັກ­ກີ­ລາ ຕະ­ຫຼອດ​ຮອດ​ກອງ​ເຊຍ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ຈັນ​ສະ­ໝອນ ຜ່ອງ​ຈັນ­ທາ ກ່າວ​ວ່າ: ການ​ແຂ່ງ­ຂັນ​ຄັ້ງ​ນີ້ ໂດຍ​ໄດ້​ຮັບ​ການ​ອຸ­ປະ­ຖຳ​ຫຼັກ​ຈາກ​ບໍ­ລິ­ສັດ ເບຍ​ລາວ ຈຳ­ກັດ ລວມ​ມູນ​ຄ່າ 135 ລ້ານ​ກີບ ເພື່ອ​ເປັນ​ການ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ​ວັນ­ຊາດ​ທີ 2 ທັນ­ວາ ຄົບ­ຮອບ 43 ປີ ວັນ​ຄ້າຍ​ວັນ​ເກີດ​ປະ­ທານ ໄກ­ສອນ ພົມ­ວິ­ຫານ ຄົບ­ຮອບ 98 ປີ ແລະ ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 70 ປີ ໃຫ້​ມີ​ຂະ​ບວນ​ຟົດ­ຟື້ນ​ມ່ວນ­ຊື່ນ ແລະ ກວ້າງ­ຂວາງ​ຢ່າງ​ມີ​ຄວາມ​ໝາຍ​ເລິກ​ເຊິງ ອີກ​ດ້ານ​ໜຶ່ງ​ກໍ່​ເພື່ອ​ເປັນ​ການ​ພັດ­ທະ­ນາ​ກີ­ລາ​ບານ­ສົ່ງ ເວົ້າ​ລວມ ເວົ້າ​ສະ­ເພາະ​ແມ່ນ​ໄວ​ໜຸ່ມ ແລະ ແມ່­ຍິງ​ໃຫ້​ໃຊ້​ເວ­ລາ​ຫວ່າງ​ໃຫ້​ເປັນ​ປະ­ໂຫຍດ ໂດຍ​ການ​ຫັນ​ມາ​ຫຼິ້ນ​ກີ­ລາ​ສ້າງ​ໃຫ້​ສຸ­ຂະ­ພາບ​ແຂງ­ແຮງ​ຕ້ານ​ປາ­ກົດ­ການ​ຫຍໍ້­ທໍ້​ຕ່າງໆ​ທີ່​ເກີດ​ຂຶ້ນ​ໃນ​ສັງ­ຄົມ.

    ສຳ­ລັບ​ການ​ແຂ່ງ­ຂັນ​ມີ​ທັງ​ໝົດ 16 ທີມ​ເຂົ້າ​ຮ່ວມ ໃນ​ນັ້ນ​ປະ­ເພດ​ທີມ​ຊາຍ ມີ 10 ທີມ ແບ່ງ​ອອກ​ເປັນ 3 ກຸ່ມ ແລະ ທີມ​ຍິງ 6 ທີມ ແບ່ງ​ອອກ​ເປັນ 2 ກຸ່ມ ກຸ່ມ​ລະ 3 ຄະ­ນະ ແຕ່​ລະ​ກຸ່ມ​ແຂ່ງ­ຂັນ​ພົບ​ກັນ​ໝົດ​ຄັດ​ເອົາ​ທີ 1-2 ຜ່ານ​ເຂົ້າ​ຮອບ 4 ທີມ​ສຸດ​ທ້າຍ ຂະ­ນະ​ທີ່​ລາ­ງວັນ​ຊະ­ນະ​ເລີດ​ທີມ​ຍິງ ແລະ ທີມ​ຊາຍ ໄດ້​ເທົ່າ​ກັນ​ໝົດ​ຄື: ທີ 1 ຈະ​ໄດ້​ຮັບ​ຂັນ+ເງິນ­ສົດ 8 ລ້ານ​ກີບ ທີ 2 ເງິນ­ສົດ 5 ລ້ານ​ກີບ ທີ 3 ເງິນ­ສົດ 3 ລ້ານ​ກີບ ແລະ ທີ 4 ເງິນ­ສົດ 1,5 ລ້ານ​ກີບ.

ຂ່າວທີ່ກ່ຽວຂ້ອງ