ຂ່າວຫຼ້າສຸດ

ເປີດການແຂ່ງຂັນບານເຕະ 7 ຄົນ ເພື່ອຊີງຂັນລັດຖະມົນຕີ

115 06 ທ.ວ. 2018 ວົງຈອນກີລາ
ເປີດການແຂ່ງຂັນບານເຕະ 7 ຄົນ ເພື່ອຊີງຂັນລັດຖະມົນຕີ

    ການ​ແຂ່ງ­ຂັນ​ເຕະ­ບານ 7 ຄົນ ຮຸ່ນ​ນັກ­ຮຽນ​ມັດ­ທະ­ຍົມ​ສຶກ​ສາ​ອາ­ຍຸ​ບໍ່​ເກີນ 18 ປີ (ຢູ-18) ຊີງ​ຂັນ​ທ່ານ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ຄັ້ງ​ທີ I ຈັດ​ຂຶ້ນ​ວັນ​ທີ 30 ພະ­ຈິກ 2018 ທີ່​ເດີ່ນ​ເຈົ້າ​ອາ​ນຸ​ວົງ ມີ​ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ບັນ­ດາ​ເຈົ້າ­ເມືອງ ຫົວ­ໜ້າ​ພະ​ແນກ ຫົວ­ໜ້າ​ຫ້ອງ­ການ​ສຶກ​ສາ​ທິ​ການ ແລະ ກີ­ລາ​ເມືອງ ຄະ­ນະ​ອຳ­ນວຍ​ການ​ໂຮງ­ຮຽນ ຄູ-ອາ­ຈານ ຜູ້​ປົກ­ຄອງ ຜູ້​ໃຫ້­ການ​ສະ­ໜັບ­ສະ­ໜູນ ນັກ­ຮຽນ ແລະ ນັກ­ກີ­ລາ ຈາກ 21 ພາກ­ສ່ວນ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ ໄດ້​ກ່າວ​ວ່າ: ການ​ຈັດ​ແຂ່ງ­ຂັນ​ຄັ້ງ​ນີ້ ເພື່ອ​ເປັນ​ການ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ​ວັນ​ສະ­ຖາ­ປະ­ນາ ສປປ ລາວ ຄົບ­ຮອບ 43 ປີ ຕ້ອນ­ຮັບ​ວັນ​ສ້າງ­ຕັ້ງ​ກອງ­ທັບ​ປະ­ຊາ­ຊົນ​ລາວ ຄົບ­ຮອບ 70 ປີ ແລະ ສະ­ເຫຼີມ­ສະ­ຫຼອງ​ວັນ​ການ​ສ້າງ­ຕັ້ງ​ເມືອງ​ວຽງ​ໄຊ ຄົບ­ຮອບ 50 ປີ ເຊິ່ງ​ການ​ແຂ່ງ­ຂັນ​ມີ​ທີມ​ເຂົ້າ​ຮ່ວມ​ທັງ​ໝົດ 24 ທີມ ຈະ​ແຂ່ງ­ຂັນ​ຢູ່​ເດີ່ນ​ບານ­ເຕະ​ຫຍ້າ​ທຽມ​ຮ່ອງ​ຄ້າ ເມືອງ​ຈັນ­ທະ​ບູ​ລີ (ແຂ່ງ­ຂັນ​ກັນ​ທຸກ​ວັນ​ເສົາ ແລະ ອາ­ທິດ) ຈະ​ເລີ່ມ​ວັນ​ທີ 8 ທັນ­ວາ 2018 ຫາ 4 ມັງ­ກອນ 2019.

    ຕອນ​ທ້າຍ ທ່ານ ຊົມ​ພູ ແກ້ວ​ປັນ­ຍາ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ ໄດ້​ຮຽກ­ຮ້ອງ​ໃຫ້​ຄະ­ນະ​ຮັບ­ຜິດ­ຊອບ ກຳ­ມະ­ການ​ຕັດ­ສິນ ຄູ​ເຝິກ ແລະ ນັກ­ກີ­ລາ ຈົ່ງ​ພ້ອມ​ກັນ​ເອົາ­ໃຈ­ໃສ່​ລະ­ບຽບ​ວິ­ໄນ ປະ­ຕິ­ບັດ​ໂມງ​ເວ­ລາ​ແຂ່ງ­ຂັນ ກະ­ຕິ​ກາ​ຮູ້​ເສຍ-ຮູ້​ຊະ­ນະ ແລະ ຮູ້​ໃຫ້​ອະ­ໄພ​ເຊິ່ງ​ກັນ ແລະ ກັນ​ດ້ວຍ​ກຽດ​ອັນ​ສູງ​ສົ່ງ​ຂອງ​ນັກ­ກີ­ລາ ໃຫ້​ມີ​ບັນ­ຍາ­ກາດ​ອັນ​ຟົດ­ຟື້ນ​ທີ່​ດີ ແລະ ຍາດ​ໄດ້​ໄຊ­ຊະ­ນະ​ທີ່​ຂາວ​ສະ­ອາດ ມີ​ກຽດ​ສະ­ຫງ່າ ໃນ​ນາມ​ຜູ້​ຊະ­ນະ​ເລີດ.

ຂ່າວທີ່ກ່ຽວຂ້ອງ