ຂ່າວຫຼ້າສຸດ

ລາວ-ເວເນຊູເອລາ ຫາລືທິດທາງເສີມຂະຫຍາຍການຮ່ວມມື

164 06 ທ.ວ. 2018 ຂ່າວໜ້າ​ໜຶ່ງ

    ກອງ​ປະ­ຊຸມ​ປຶກ­ສາ​ຫາ­ລື​ດ້ານ​ການ­ເມືອງ ລະ­ຫວ່າງ ລາວ ແລະ ເວ​ເນ​ຊູ​ເອ​ລາ ໄດ້​ຈັດ​ຂຶ້ນ​ໃນ​ວັນ​ທີ 5 ທັນ­ວາ 2018 ທີ່​ກະ­ຊວງ​ການ​ຕ່າງ­ປະ­ເທດ ຝ່າຍ​ລາວ​ນຳ​ໂດຍ​ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແລະ ຝ່າຍ​ເວ​ເນ​ຊູ​ເອ​ລາ ນຳ​ໂດຍ​ທ່ານ ເບັນ ດາ​ຣິ​ໂອ ໂມ­ລີ​ນາ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແຫ່ງ​ສາ­ທາ­ລະ­ນະ​ລັດ​ໂບ​ລີ​ວາ​ຣຽນ ເວ​ເນ​ຊູ​ເອ​ລາ ຜູ້​ຊີ້​ນຳ​ວຽກ​ງານ​ຂົງ­ເຂດ​ອາ­ຊີ​ຕາ­ເວັນ​ອອກ​ກາງ ແລະ ໂອ​ເຊ​ອາ​ນີ ໃນ​ໂອ­ກາດ​ທີ່​ຄະ­ນະ​ຜູ້​ແທນ​ດັ່ງ­ກ່າວ​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່​ລາວ ວັນ​ທີ 4-5 ທັນ­ວາ​ນີ້

    ກອງ​ປະ­ຊຸມ​ດັ່ງ­ກ່າວ​ເປັນ​ກອງ​ປະ­ຊຸມ​ຄັ້ງ​ປະ­ຖົມ​ມະ­ລຶກ ເຊິ່ງ​ທັງ​ສອງ​ຝ່າຍ​ໄດ້​ແລກ­ປ່ຽນ​ຄຳ​ຄິດ​ຄຳ​ເຫັນ​ເຊິ່ງ​ກັນ ແລະ ກັນ ກ່ຽວ​ກັບ​ສະ­ພາບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ອັນ​ພົ້ນ​ເດັ່ນ​ຂອງ​ປະ­ເທດ​ຕົນ ພ້ອມ​ນັ້ນ ຍັງ​ໄດ້​ປຶກ­ສາ​ຫາ­ລື​ທິດ​ທາງ​ເສີມ​ຂະ­ຫຍາຍ​ການ​ພົວ­ພັນ​ຮ່ວມ​ມື​ລະ­ຫວ່າງ​ສອງ​ປະ­ເທດ​ໃນ​ອະ­ນາ­ຄົດ ລວມ​ທັງ​ບັນ­ຫາ​ພາກ​ພື້ນ ແລະ ສາ­ກົນ ທີ່​ຕ່າງ​ຝ່າຍ​ມີ​ຄວາມ​ສົນ­ໃຈ​ນຳ​ກັນ.

    ໂອ­ກາດ​ທີ່​ເຄື່ອນ​ໄຫວ​ຢ້ຽມ­ຢາມ​ລາວ​ຄັ້ງ​ນີ້ ນອກ­ຈາກ​ພົບ​ປະ​ປຶກ­ສາ​ຫາ­ລື​ທາງ​ດ້ານ​ການ­ເມືອງ​ກັບ​ຄູ່​ຮ່ວມ​ຕຳ­ແໜ່ງ​ແລ້ວ ຄະ­ນະ​ຜູ້​ແທນ​ກະ­ຊວງ​ການ​ຕ່າງ­ປະ­ເທດ​ເວ​ເນ​ຊູ​ເອ​ລາ ຍັງ​ໄດ້​ທ່ຽວ​ຊົມ​ສະ­ຖານ­ທີ່​ທ່ອງ​ທ່ຽວ​ທາງ​ປະ­ຫວັດ­ສາດ ແລະ ວັດ­ທະ­ນະ­ທຳ​ຢູ່​ນະ­ຄອນ­ຫຼວງ​ວຽງ​ຈັນ​ຈຳ­ນວນ​ໜຶ່ງ.

    ລາວ ແລະ ເວ​ເນ​ຊູ​ເອ​ລາ ໄດ້​ສ້າງ​ສາຍ​ພົວ­ພັນ​ການ​ທູດ​ຮ່ວມ​ກັນ ໃນ​ວັນ​ທີ 5 ຕຸ­ລາ 2005 ເຊິ່ງ​ຕະ­ຫຼອດ​ໄລ­ຍະ​ຜ່ານ​ມາ​ສອງ​ປະ­ເທດ ໄດ້​ມີ​ການ​ພົວ­ພັນ​ຢ່າງ​ເປັນ​ປົກ­ກະ­ຕິ ມີ​ການ​ຮ່ວມ​ມື​ສະ­ໜັບ­ສະ­ໜູນ​ເຊິ່ງ​ກັນ ແລະ ກັນ ທັງ​ໃນ​ຂອບ​ການ​ພົວ­ພັນ​ທັງ​ສອງ​ຝ່າຍ ແລະ ຫຼາຍ​ຝ່າຍ​ໃນ​ເວ­ທີ​ພາກ​ພື້ນ ກໍ່​ຄື​ສາ­ກົນ.

ຂ່າວທີ່ກ່ຽວຂ້ອງ