ຂ່າວຫຼ້າສຸດ

ຮອງລັດຖະມົນຕີ ເນັ້ນສ້າງຜົນງານດີເດັ່ນ ໃນງານວິທະຍາໄລອາຊຽນ

112 07 ທ.ວ. 2018 ວົງຈອນກີລາ
ຮອງລັດຖະມົນຕີ ເນັ້ນສ້າງຜົນງານດີເດັ່ນ ໃນງານວິທະຍາໄລອາຊຽນ

    ວັນ​ທີ 4 ທັນ­ວາ 2018 ທີ່​ສະ­ໂມ­ສອນ​ໃຫຍ່​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ມຊ) ໄດ້​ຈັດ​ກອງ​ປະ­ຊຸມ​ເພື່ອ​ເຕົ້າ­ໂຮມ​ບັນ­ດາ​ຄະ­ນະ​ນຳ­ພາ ແພດ ນັກ​ຂ່າວ ຄູ​ເຝິກ ແລະ ນັກ­ກີ­ລາ​ກຽມ​ຄວາມ​ພ້ອມ​ຮ່ວມ​ງານ​ມະ​ຫະ​ກຳ​ກີ­ລາ​ມະ­ຫາ­ວິ­ທະ­ຍາ­ໄລ​ອາ​ຊຽນ ຄັ້ງ​ທີ 19 ທີ່​ປະ­ເທດ​ມຽນ​ມາ​ຮັບ​ກຽດ​ເປັນ​ເຈົ້າ­ພາບ ມີ​ທ່ານ ຄຳ​ຜາຍ ສີ​ສະ­ຫວັນ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ທັງ​ເປັນ​ຫົວ­ໜ້າ​ຄະ­ນະ​ນຳ­ພາ​ນັກ­ກີ­ລາ ສະ­ຫະ­ພັນ​ກີ­ລາ​ມະ­ຫາ­ວິ­ທະ­ຍາ­ໄລ​ລາວ ທ່ານ ອາ​ນຸ​ລົມ ວິ­ໄລ​ພອນ ວ່າ­ການ​ຄະ­ນະ­ບໍ­ດີ ຄະ­ນະ​ວິ­ທະ­ຍາ­ສາດ​ການ​ກີ­ລາ-ກາ​ຍະ​ກຳ ມຊ ພ້ອມ​ດ້ວຍ​ບັນ­ດາ​ຜູ້­ຕາງ­ໜ້າ​ສະ­ຫະ­ພັນ​ກີ­ລາ​ແຫ່ງ​ຊາດ ຄູ​ເຝິກ ແລະ ນັກ­ກີ­ລາ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ອາ​ນຸ​ລົມ ວິ­ໄລ​ພອນ ໄດ້​ລາຍ​ງານ​ກ່ຽວ​ກັບ​ຄວາມ​ພ້ອມ​ໃນ​ການ​ກະ­ກຽມ​ດ້ານ​ຕ່າງໆ ເປັນ­ຕົ້ນ ແຜນ­ການ​ເດີນ­ທາງ​ຂອງ​ນັກ­ກີ­ລາ​ແຕ່​ລະ​ປະ­ເພດ ເຊິ່ງ​ການ​ເດີນ­ທາງ​ຂອງ​ນັກ­ກີ­ລາ​ລາວ ເລີ່ມ​ອອກ​ເດີນ­ທາງ​ວັນ​ທີ 5 ທັນ­ວາ 2018 ເປັນ­ຕົ້ນ​ໄປ ເພື່ອ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ວິ­ທະ­ຍາ­ໄລ​ອາ​ຊຽນ ຄັ້ງ​ທີ 19 ທີ່​ມຽນ​ມາ​ຈັດ​ຂຶ້ນ​ວັນ​ທີ 10-19 ທັນ­ວາ 2018 ໂດຍ​ທີມ​ງານ​ກອງ​ເລ­ຂາ ພ້ອມ​ດ້ວຍ​ນັກ­ກີ­ລາ​ເຕະ­ບານ​ອອກ​ເດີນ­ທາງ​ເປັນ​ຊຸດ​ທຳ​ອິດ ສ່ວນ​ກີ­ລາ​ປະ­ເພດ​ອື່ນໆ​ຈະ​ຄ່ອຍ​ເດີນ­ທາງ​ຕາມ​ຫຼັງ​ໄປ ສຳ­ລັບ​ສະ­ຫະ­ພັນ​ກີ­ລາ​ມະ­ຫາ­ວິ­ທະ­ຍາ­ໄລ​ລາວ ສົ່ງ​ນັກ­ກີ­ລາ 150 ຄົນ ຈາກ 9 ປະ­ເພດ ປະ­ກອບ​ມີ: ເຕະ­ບານ​ຊາຍ ຍິງ​ທະ­ນູ ເປ​ຕັງ ກະ­ຕໍ້ ໂວ​ວີ​ນາມ ກ໊ອຟ ດອກ​ປີກ​ໄກ່ ວູ​ຊູ ແລະ ແລ່ນ-ລານ.

    ໂອ­ກາດ​ນີ້ ທ່ານ ຄຳ​ຜາຍ ສີ​ສະ­ຫວັນ ໄດ້​ໃຫ້​ກຽດ​ໂອ້​ລົມ​ຕໍ່​ຄະ­ນະ​ນຳ ແພດ ນັກ​ຂ່າວ ຄູ​ເຝິກ ແລະ ນັກ­ກີ­ລາ​ນັກ​ສຶກ​ສາ​ລາວ ໃຫ້​ເພີ່ມ​ທະ­ວີ​ຄວາມ​ເອົາ­ໃຈ­ໃສ່​ຄວາມ​ຮັບ­ຜິດ­ຊອບ​ໃນ​ໜ້າ­ທີ່​ຂອງ​ຕົນ​ເອງ​ຢ່າງ­ຮອບ­ດ້ານ ໂດຍ​ສະ­ເພາະ​ຄວນ​ສະ­ແດງ​ຄວາມ​ມີ​ນ້ຳ­ໃຈ ເຜີຍ­ແຜ່​ວັດ­ທະ­ນະ­ທຳ​ຄວາມ​ເປັນ​ຊາດ​ລາວ ມີ​ຄວາມ​ຮັບ­ຜິດ­ຊອບ​ສູງ ຮັກ­ສາ​ກຽດ​ສັກ​ສີ​ຄວາມ​ເປັນ​ຊາດ​ລາວ ພ້ອມ​ກັນ​ວາງ​ແຜນ​ຢ່າງ​ຮອບ​ຄອບ​ລະ­ອຽດ​ຊັດ​ເຈນ ສ້າງ​ຄວາມ​ເຊື່ອ​ໝັ້ນ​ໃຫ້​ນັກ­ກີ­ລາ​ມີ​ຄວາມ​ສາ­ມັກ­ຄີ​ຮັກ­ແພງ ແລະ ປະ­ຕິ­ບັດ​ກົດ​ລະ­ບຽບ​ກະ­ຕິ​ກາ​ຂອງ​ແຕ່​ລະ​ປະ­ເພດ​ກີ­ລາ ທັງ​ນີ້​ເພື່ອ​ສ້າງ​ຜົນ­ງານ​ດີ­ເດັ່ນ ຍາດ​ໃຫ້​ໄດ້​ໄຊ­ຊະ­ນະ​ເປັນ​ກຽດ-ຊື່​ສຽງ​ໃຫ້​ປະ­ເທດ​ຊາດ ແລະ ນຳ​ເອົາ​ຄວາມ​ພາກ­ພູມ​ໃຈ​ມາ­ສູ່​ປະ­ຊາ­ຊົນ​ຢ່າງ​ສະ­ຫງ່າ​ງາມ.

ຂ່າວທີ່ກ່ຽວຂ້ອງ