ຂ່າວຫຼ້າສຸດ

ສສຊ ຮັບຮອງເອົາຮ່າງປະມວນກົດໝາຍແພ່ງ

146 07 ທ.ວ. 2018 ຂ່າວໜ້າ​ໜຶ່ງ
ສສຊ ຮັບຮອງເອົາຮ່າງປະມວນກົດໝາຍແພ່ງ

    ວັນ​ທີ 6 ທັນ­ວາ 2018 ການ​ດຳ­ເນີນ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຂອງ​ສະ­ພາ​ແຫ່ງ​ຊາດ​ຊຸດ​ທີ VIII ໂດຍ​ເປັນ​ປະ­ທານ​ຂອງ​ທ່ານ ສົມ​ພັນ ແພງ​ຄຳ​ມີ ຮອງ​ປະ­ທານ​ສະ­ພາ​ແຫ່ງ​ຊາດ ໃນ​ກອງ​ປະ­ຊຸມ​ບັນ­ດາ​ສະ­ມາ­ຊິກ​ສະ­ພາ​ແຫ່ງ​ຊາດ (ສສຊ) ໄດ້​ພ້ອມ​ກັນ​ຄົ້ນ­ຄວ້າ​ພິ­ຈາ­ລະ­ນາ ປະ­ກອບ​ຄຳ​ຄິດ​ເຫັນ ແລະ ຮັບ­ຮອງ​ເອົາ​ຮ່າງ​ປະ­ມວນ​ກົດ­ໝາຍ​ແພ່ງ ນຳ​ສະ­ເໜີ​ໂດຍ​ທ່ານ ໄຊ​ສີ ສັນ­ຕິ​ວົງ ລັດ­ຖະ­ມົນ­ຕີ​ກະ­ຊວງ​ຍຸ­ຕິ​ທຳ ແນ­ໃສ່​ເຮັດ​ໃຫ້​ຮ່າງ​ປະ­ມວນ​ກົດ­ໝາຍ​ສະ­ບັບ​ນີ້​ມີ​ເນື້ອ​ໃນ​ສົມ­ບູນ ແລະ ຄົບ​ຖ້ວນ ສອດ­ຄ່ອງ​ແທດ­ເໝາະ​ກັບ​ສະ­ພາບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ປະ­ເທດ​ໃນ​ປັດ­ຈຸ­ບັນ.

    ສຳ­ລັບ​ຮ່າງ​ປະ­ມວນ​ກົດ­ໝາຍ​ແພ່ງ​ມີ​ຄວາມ​ສຳ­ຄັນ ແລະ ຈຳ­ເປັນ​ຢ່າງ​ພາ­ວະ​ວິ­ໄສ​ທີ່​ລາວ​ເຮົາ ຕ້ອງ​ໄດ້​ກຳ­ນົດ​ຂຶ້ນ ເປັນ​ບ່ອນ​ອີງ​ໃນ​ການ​ດັດ​ປັບ​ການ​ປະ­ພຶດ​ຂອງ​ຄົນ​ໃນ​ສັງ­ຄົມ ໃຫ້​ໄປ​ຕາມ​ແນວ­ທາງ​ນະ­ໂຍ­ບາຍ​ຂອງ​ພັກ​ທີ່​ວາງ​ອອກ​ໃນ​ແຕ່​ລະ​ໄລ­ຍະ ເພື່ອ​ແນ­ໃສ່​ຮັບ­ປະ­ກັນ​ຄວາມ​ສະ­ຫງົບ​ປອດ​ໄພ ປົກ​ປ້ອງ​ສິດ­ຜົນ­ປະ­ໂຫຍດ​ອັນ​ຊອບ​ທຳ​ຂອງ​ພົນ­ລະ­ເມືອງ ທັງ​ເປັນ​ການ​ສ້າງ​ເງື່ອນ­ໄຂ​ໃຫ້​ແກ່​ການ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ເຊິ່ງ​ປະ­ມວນ​ກົດ­ໝາຍ​ດັ່ງ­ກ່າວ​ຈະ​ສາ­ມາດ​ຊ່ວຍ​ແກ້​ໄຂ​ບັນ­ຫາ ຫຼື ຂໍ້​ຂັດ​ແຍ່ງ​ທີ່​ເກີດ​ຂຶ້ນ​ໃນ​ສັງ­ຄົມ ແລະ ເຮັດ​ໃຫ້​ການ­ຈັດ­ຕັ້ງ​ປະ­ຕິ­ບັດ​ກົດ­ໝາຍ​ດີ​ຂຶ້ນ​ກວ່າ​ເກົ່າ ເພາະ​ຊ່ວຍ​ແກ້​ໄຂ​ຊ່ອງ​ຫວ່າງ ແລະ ຂໍ້​ຂັດ​ກັນ​ຂອງ​ກົດ­ໝາຍ​ຕ່າງໆ ຫຼື ແກ້​ໄຂ​ຄວາມ​ຈະ­ແຈ້ງ​ຊັດ​ເຈນ ທັງ​ເຮັດ​ໃຫ້­ການ​ນຳ​ໃຊ້​ກົດ­ໝາຍ​ເປັນ​ເອ­ກະ​ພາບ​ກັນ ພ້ອມ​ກັນ​ນັ້ນ ປະ­ມວນ​ກົດ­ໝາຍ​ແພ່ງ​ຍັງ​ກຳ­ນົດ​ຫຼັກ­ການ​ໃໝ່ ທີ່​ຍັງ​ບໍ່​ທັນ​ມີ​ໃຫ້​ສາ­ມາດ​ດັດ​ປັບ ແລະ ຕອບ​ສະ­ໜອງ​ໄດ້​ກັບ​ຄວາມ​ຮຽກ­ຮ້ອງ​ຕ້ອງ­ການ ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ໃນ​ປັດ­ຈຸ­ບັນ ແລະ ຕໍ່­ໜ້າ ສິ່ງ​ສຳ­ຄັນ​ຍັງ​ສາ­ມາດ​ຈຳ­ແນກ​ໃຫ້​ຮູ້​ໄດ້​ວ່າ​ເປັນ​ຄະ­ດີ​ແພ່ງ ແລະ ອາ­ຍາ ນອກ­ຈາກ​ນັ້ນ ປະ­ມວນ​ກົດ­ໝາຍ​ແພ່ງ ແລະ ອາ­ຍາ ປະ­ກອບ­ສ່ວນ​ໃນ​ການ​ເຊື່ອມ​ໂຍງ​ກັບ​ສາ­ກົນ​ໃນ​ຂົງ­ເຂດ​ກົດ­ໝາຍ​ຍຸ­ຕິ​ທຳ ສຳ­ລັບ​ໂຄງ​ປະ­ກອບ​ຂອງ​ຮ່າງ​ປະ­ມວນ​ກົດ­ໝາຍ ມີ 9 ພາກ 51 ໝວດ 630 ມາດ­ຕາ ໃນ​ນັ້ນ 105 ມາດ­ຕາ​ຮັກ­ສາ​ເດີມ ປັບ­ປຸງ 268 ມາດ­ຕາ ແລະ ສ້າງ​ໃໝ່ 275 ມາດ­ຕາ.

    ໂອ­ກາດ​ນີ້ ສສຊ ໄດ້​ສຸມ​ໃສ່​ປະ­ກອບ​ຄຳ​ເຫັນ​ຢ່າງ​ກົງ​ໄປ​ກົງ​ມາ ດ້ວຍ​ຄວາມ​ສ້າງ­ສັນ​ໃສ່​ຮ່າງ​ປະ­ມວນ​ກົດ­ໝາຍ​ດັ່ງ­ກ່າວ ເຊິ່ງ​ມີ​ຫຼາຍ​ບັນ­ຫາ​ສະ­ເໜີ​ໃຫ້​ອະ­ນຸ​ກຳ­ມະ­ການ​ກ່ຽວ­ຂ້ອງ​ປັບ­ປຸງ​ໃສ່​ເນື້ອ​ໃນ ເພື່ອ​ເຮັດ​ໃຫ້​ເນື້ອ​ໃນ​ມີ​ຄວາມ​ໝາຍ​ຄົບ​ຖ້ວນ ແລະ ສົມ­ບູນ​ແບບ ບັນ­ຫາ​ທີ່​ສະ­ເໜີ​ໄດ້​ສຸມ​ໃສ່​ມາດ­ຕາ 8 ຂອງ​ກົດ­ໝາຍ​ຄອບ­ຄົວ ການ​ສູ່­ຂໍ ການ​ໝັ້ນ​ໝາຍ ແລະ ການ​ແຕ່ງ­ດອງ​ເປັນ​ໂມ­ຄະ ການ​ເສຍ​ຊີ­ວິດ​ຕາມ​ທຳ​ມະ​ຊາດ ການ​ໃຊ້​ຊັບ​ດຽວ​ນຳ​ໃຊ້​ໃນ​ການ​ຄ້ຳ­ປະ­ກັນ ແລະ ບັນ­ຫາ​ອື່ນໆ ຈາກ​ນັ້ນ ຕອນ​ທ້າຍ ສສຊ ໄດ້​ເຫັນ​ດີ​ຮັບ­ຮອງ​ເອົາ​ດ້ວຍ​ຄະ­ແນນ​ສຽງ​ສ່ວນ​ຫຼາຍ.

ຂ່າວທີ່ກ່ຽວຂ້ອງ