ຂ່າວຫຼ້າສຸດ

ມີຫຍັງເກີດຂຶ້ນໃນກອງປະຊຸມສຸດຍອດ G20

608 14 ທ.ວ. 2018 ນານາສາລະ

    ຫຼັງ​ຈາກ​ດຳ­ເນີນ​ໄປ​ໃນ​ເວ­ລາ​ສອງ​ວັນ ຄື: ໃນ​ວັນ​ສຸກ ທີ 30 ພະ­ຈິກ ແລະ ວັນ​ເສົາ ທີ 1 ທັນ­ວາ 2018 ກອງ​ປະ­ຊຸມ​ສຸດ​ຍອດ G20 ທີ່​ຈັດ​ຂຶ້ນ​ຢູ່​ນະ­ຄອນ­ຫຼວງ ບົວ​ໂນ​ສ ໄອ​ເລດ ປະ­ເທດ​ອາກ​ຊັງ​ຕິນ ກໍ່​ໄດ້​ປິດ​ສາກ​ລົງ​ດ້ວຍ​ການ​ຮັບ­ຮອງ​ຖະ­ແຫຼງ­ການ​ຮ່ວມ ຢືນ­ຢັນ​ເຖິງ​ຄວາມ​ເຫັນ​ດີ​ເຫັນ​ພ້ອມ​ໃນ​ບັນ­ຫາ​ການ​ຄ້າ​ສາ­ກົນ ການ​ອະ­ນຸ​ຮັກ​ສິ່ງ­ແວ­ດລ້ອມ ແລະ ການ​ຍ້າຍ​ຖິ່ນ​ຖານ.

    ອີງ​ຕາມ​ແຫຼ່ງ​ຂ່າວ​ຈາກ​ຕ່າງ­ປະ­ເທດ ໃຫ້​ຮູ້​ວ່າ: ກອງ​ປະ­ຊຸມ​ຄັ້ງ​ນີ້​ເປັນ​ຈຸດ​ທົດ​ສອບ​ວ່າ​ເສດ­ຖະ­ກິດ​ໂລກ​ຈະ​ເດີນ​ໜ້າ​ໄປ​ທາງ​ໃດ ? ຍ້ອນ​ວ່າ​ຜູ້­ນຳ​ປະ­ເທດ​ທີ່​ເຂົ້າ​ຮ່ວມ​ໄດ້​ແບ່ງ​ອອກ​ເປັນ​ສອງ​ກຸ່ມ ຄື: ກຸ່ມ​ທີ່​ເປັນ​ໂລກ​ເກົ່າ ເປັນ​ຕົວ​ແທນ​ການ­ເມືອງ​ແບບ​ອະ­ນຸ​ຮັກ​ນິ­ຍົມ ສະ­ໜັບ­ສະ­ໜູນ​ເສດ­ຖະ­ກິດ​ແບບ​ເສລີ​ນິ­ຍົມ ແລະ ກົດ​ລະ­ບຽບ​ແບບ​ພະ­ຫຸ​ພາ­ຄີ (Multilateral).

    ສ່ວນ​ກຸ່ມ​ໃໝ່​ແມ່ນ​ປະ­ເທດ​ເປັນ​ຕົວ​ແທນ​ການ­ເມືອງ​ແບບ​ອຳ­ນາດ​ນິ­ຍົມ ສະ­ໜັບ­ສະ­ໜູນ​ນະ­ໂຍ­ບາຍ​ເສດ­ຖະ­ກິດ​ແບບ​ປະ­ຊາ​ນິ­ຍົມ ປະ­ຕິ­ເສດ​ກົນ​ໄກ​ແບບ​ພະ­ຫຸ​ພາ­ຄີ​ໃນ​ການ​ແກ້​ໄຂ​ບັນ­ຫາ ມັກ​ໃຊ້​ການ​ເຈລະ­ຈາ​ຕໍ່​ລອງ​ລະ­ຫວ່າງ​ຄູ່​ກໍ­ລະ­ນີ​ເປັນ​ທາງ​ອອກ.

    ແຕ່​ເຖິງ​ຢ່າງ­ໃດ ທີ່​ປະ­ຊຸມ​ກໍ່​ມີ​ຄວາມ​ກ້າວ­ໜ້າ ເປັນ­ຕົ້ນ​ແມ່ນ​ຄວາມ​ເຫັນ​ດີ​ຮ່ວມ​ກັນ​ທີ່​ຈະ​ປະ­ຕິ​ຮູບ​ອົງ­ການ​ຄ້າ​ໂລກ WTO ເຫັນ​ພ້ອມ​ທີ່​ຈະ​ສືບ­ຕໍ່​ປະ­ຕິ­ບັດ​ຕາມ​ຂໍ້​ຕົກ­ລົງ​ປາ​ຣີ ວ່າ​ດ້ວຍ​ການ​ປ່ຽນ­ແປງ​ດິນ​ຟ້າ​ອາ­ກາດ ສ່ວນ​ການ​ເຈລະ­ຈາ​ນອກ​ກອງ​ປະ­ຊຸມ​ລະ­ຫວ່າງ ອາ​ເມ​ຣິ​ກາ ແລະ ສປ ຈີນ ເລື່ອງ​ສົງ­ຄາມ​ການ​ຄ້າ​ນັ້ນ​ກໍ່​ບັນ­ລຸ ລະ­ງັບ​ການ​ຂຶ້ນ​ພາ­ສີ​ສິນ­ຄ້າ​ລະ­ຫວ່າງ​ກັນ​ເປັນ​ການ​ຊົ່ວ­ຄາວ​ໃນ​ເວ­ລາ 90 ວັນ.

    ນັກ​ສັນ­ທັດ​ກໍ­ລະ­ນີ​ໃຫ້​ຄຳ​ວິ­ຈານ​ວ່າ: ຫຼັງ​ຈາກ​ກອງ​ປະ­ຊຸມ​ນີ້​ອາດ​ຈະ​ມີ​ສາມ​ໝວດ​ທີ່​ນັກ​ລົງ­ທຶນ​ຕ້ອງ​ຕິດ­ຕາມ ຄື:

    - ຄວາມ​ບໍ່​ແນ່­ນອນ​ດ້ານ​ນະ­ໂຍ­ບາຍ​ທີ່​ຈະ​ເປັນ ຄວາມ​ສ່ຽງ​ຕໍ່​ເສດ­ຖະ­ກິດ​ໂລກ ເພາະ​ນະ­ໂຍ­ບາຍ​ຈະ​ປ່ຽນ​ຈາກ​ຜົນ​ຂອງ​ການ​ເຈລະ­ຈາ​ຕໍ່​ລອງ ຂອງ​ຜູ້­ນຳ​ລະ­ຫວ່າງ​ຄູ່​ກໍ­ລະ­ນີ ປາ­ສະ­ຈາກ​ການ​ຕົກ­ລົງ​ຮ່ວມ​ກັນ ຂອງ​ຫຼາຍ​ປະ­ເທດ​ແບບ​ພະ­ຫຸ​ພາ­ຄີ.

    - ຄວາມ​ເຊື່ອ​ໝັ້ນ​ຂອງ​ຜູ້­ນຳ​ໃນ​ແງ່​ນະ­ໂຍ­ບາຍ ເພາະ​ມີ​ຄວາມ​ເປັນ​ໄປ​ໄດ້​ສູງ​ທີ່​ຜູ້­ນຳ​ຈະ​ໃຫ້​ຄວາມ​ສຳ­ຄັນ ສະ­ເພາະ​ຜົນ​ປະ­ໂຫຍດ​ປະ­ເທດ​ຕົນ​ຫຼາຍ​ກວ່າ​ຜົນ​ປະ­ໂຫຍດ​ລວມ ຫຼື ຜົນ​ກະ­ທົບ​ຕໍ່​ເສດ­ຖະ­ກິດ​ໂລກ.

    - ກົນ​ໄກ​ການ​ຮ່ວມ​ມື​ລະ­ຫວ່າງ​ປະ­ເທດ ໃນ​ການ​ແກ້​ໄຂ​ບັນ­ຫາ​ເສດ­ຖະ­ກິດ​ໂລກ ອາດ​ກັບ​ໄປ​ສູ່​ຍຸກ​ຕ່າງ​ຄົນ​ຕ່າງ​ເຮັດ ພາ­ໃຫ້​ເກີດ​ວິ​ກິດ​ເສດ­ຖະ­ກິດ​ໂລກ ທີ່​ບໍ່​ມີ​ໃຜ​ຢາກ​ຍື່ນ​ມື​ເຂົ້າ​ແກ້​ໄຂ ເປັນ­ຄວາມ​ອ່ອນ­ແອ​ທີ່​ຈະ​ສ້າງ​ຄວາມ​ສ່ຽງ​ຫຼາຍ​ຂຶ້ນ​ຂອງ​ເສດ­ຖະ­ກິດ​ໂລກ.

    ສະ­ມາ­ຊິກ​ກຸ່ມ G20 ປະ­ກອບ​ດ້ວຍ​ບັນ­ດາ​ປະ­ເທດ ຄື: ອາກ​ຊັງ​ຕິນ ອົດ​ສະ​ຕຣາ​ລີ ອັງ­ກິດ ບຣາ​ຊິນ ກາ​ນາ​ດາ ສປ ຈີນ ຝຣັ່ງ ເຢຍ​ລະ​ມັນ ອິນ​ເດຍ ອິນ​ໂດ​ເນ​ເຊຍ ອິ​ຕາ​ລີ ຍີ່­ປຸ່ນ ເມັກ​ຊິ​ໂກ ຣັດ​ເຊຍ ຊາ​ອຸ​ອາ​ລະ​ບີ ອາ​ຟຣິ​ກາ​ໄຕ້ ສ ເກົາ­ຫຼີ ຕວກ​ກີ ສະ­ຫະ­ລັດ​ອາ​ເມ​ຣິ​ກາ ແລະ ສະ­ຫະ­ພາບ​ເອີ​ຣົບ (EU) ເຊິ່ງ​ກອງ​ປະ­ຊຸມ G20 ຄັ້ງ​ທຳ​ອິດ​ມີ​ຂຶ້ນ​ໃນ​ປີ 2008.

ເລີດ ໄຊ­ຊະ­ນະ

ຂ່າວທີ່ກ່ຽວຂ້ອງ