ຂອງຂວັນຍຸກ 4.0

916 17 ທ.ວ. 2018 ນານາສາລະ

    ການ​ມອບ​ຂອງ­ຂວັນ​ເພື່ອ​ອວຍ­ພອນ​ຕ້ອນ­ຮັບ​ປີ​ໃໝ່ 2019 ຫວັງ​ວ່າ​ພວກ​ເຮົາ​ຄົງ​ມີ​ສະ­ຕິ ແລະ ວິ­ທີ​ຄິດ​ແບບ​ໃໝ່​ດີ​ກວ່າ​ປີ​ເກົ່າ ທີ່​ເວົ້າ​ນີ້​ລວມ​ທັງ​ຜູ້​ຂາຍ ແລະ ຜູ້​ຊື້ ຫຼື ຈະ​ດີ​ກວ່າ​ນີ້ ກໍ່​ຮຽກ­ຮ້ອງ​ເຖິງ​ຝ່າຍ​ກ່ຽວ­ຂ້ອງ​ກວດ­ກາ​ຄຸ­ນະ­ພາບ​ສິນ­ຄ້າ​ແບບ​ນີ້​ດີ​ກວ່າ ຈະ​ປ່ອຍ​ໃຫ້​ຜູ້​ຂາຍ​ເອົາ​ປຽບ​ລູກ​ຄ້າ ເພາະ​ຖ້າ​ສິນ­ຄ້າ​ບໍ່​ໄດ້​ມາດ­ຕະ­ຖານ ຫຼື ໝົດ​ອາ­ຍຸ ກໍ່​ຈະ​ເຮັດ​ໃຫ້​ຜູ້​ຊື້​ໄປ​ອວຍ­ພອນ ແລະ ຜູ້​ຮັບ​ເສຍ​ຄວາມ​ຮູ້­ສຶກ​ພາຍ­ຫຼັງ ເພາະ​ມັນ​ບໍ່​ກຸ້ມ​ຄ່າ​ເງິນ​ລົງ­ທຶນ​ຊື້.

    ຂອງ­ຂວັນ​ປີ​ໃໝ່​ຍຸກ 4.0 ນອກ­ຈາກ​ຫໍ່​ຈັດ​ວາງ​ໃສ່​ກະ­ຕ່າ​ສວຍ​ງາມ​ແລ້ວ ຜູ້​ຊື້​ຄວນ​ເລືອກ​ສັນ​ເອົາ​ຂອງ​ດີ​ມີ​ປະ­ໂຫຍດ ທັງ​ໃນ​ໄລ­ຍະ​ສັ້ນ ແລະ ຍາວ ເຊັ່ນ: ເລືອກ​ເອົາ​ໜັງ­ສື​ປື້ມ​ອ່ານ​ເພື່ອ​ເປັນ​ການ​ສ້າງ​ຄ່າ​ນິ­ຍົມ​ແຫ່ງ​ການ​ຮຽນ​ຮູ້ ຫຼື ຈະ​ເລືອກ​ທັງ​ອາ­ຫານ ແລະ ໜັງ­ສື​ໄປ​ພ້ອມ​ກັນ​ກໍ່​ຍິ່ງ​ດີ ເພາະ​ຜູ້​ຮັບ​ໄດ້​ທັງ​ອາ­ຫານ​ກາຍ ແລະ ອາ­ຫານ​ໃຈ ເຖິງ​ແມ່ນ​ວ່າ​ບາງ​ຄົນ​ບໍ່​ຢາກ​ອ່ານ​ປື້ມ ຫຼື ບໍ່​ມີ​ເວ­ລາ​ອ່ານ ກໍ່​ສາ­ມາດ​ສົ່ງ­ຕໍ່​ໃຫ້​ລູກ​ຫຼານ​ໄດ້​ອ່ານ ປີ​ໃໝ່​ກໍ່​ຄື​ປີ​ໃໝ່ ແຕ່­ລະ­ຄົນ​ກໍ່​ຢາກ​ໄດ້​ຄຳ​ອວຍ­ພອນ​ມ່ວນ​ຫູ​ເປັນ​ການ​ເຊີດ​ຊູ​ກຳ­ລັງ​ໃຈ​ນີ້ ຄື​ວັດ­ທະ­ນະ­ທຳ​ທີ່​ດີ​ຂອງ​ຄົນ​ລາວ ແຕ່​ພວກ​ເຮົາ​ກໍ່​ບໍ່​ຄວນ​ລືມ​ວ່າ ຄຳ​ອວຍ­ພອນ​ດັ່ງ­ກ່າວ​ມັນ​ເປັນ​ພຽງ​ການ​ໃຫ້​ກຳ­ລັງ​ໃຈ ແລະ ສົ່ງ​ຄວາມ​ປາ­ຖະ­ໜາ​ດີ ຖ້າ​ເຮົາ​ບໍ່​ລົງ­ມື​ປະ­ຕິ­ບັດ​ຄຳ​ອວຍ­ພອນ ກໍ່​ບໍ່​ສາ­ມາດ​ບັນ­ດານ​ໃຫ້​ເຮົາ​ສົມ​ຫວັງ ເປັນ​ພຽງ​ແຕ່​ລົມ­ປາກ.

    ຄຳ​ອວຍ­ພອນ​ສຳ­ລັບ​ຄົນ​ລາວ ຫຼື ຊາວ​ພຸດ​ລາວ ໃຜໆ​ກໍ່​ຕ້ອງ­ການ​ອາ­ຍຸ​ຍືນ​ຍາວ ວັນ­ນະ​ຜິວ​ພັນ​ໃຫ້​ຜ່ອງ​ໃສ ສຸ­ຂະ­ພາບ​ແຂງ­ແຮງ ແລະ ມີ​ກຳ­ລັງ​ໃຈ​ສູ້​ຊີ­ວິດ ຍັງ​ມີ​ອີກ​ອັນ​ໜຶ່ງ​ຕື່ມ​ໃສ່ ກໍ່​ຄື ໂພ­ຄະ​ຊັບ​ສົມ­ບັດ ເພາະ​ມັນ​ເປັນ​ເຄື່ອງ​ດຳ­ເນີນ​ຊີ­ວິດ​ທຸກ​ຄົນ​ປາ­ຖະ­ໜາ ວັນ­ນະ​ຜິວ​ພັນ​ຈະ​ຜ່ອງ​ໃສ​ໄດ້​ຕ້ອງ​ມີ​ສິນ ມີ​ລະ­ບຽບ​ວິ­ໄນ ຊື່​ກົງ​ຕໍ່­ໜ້າ​ທີ່ ບໍ່​ສໍ້​ໂກງ ບໍ່​ສໍ້​ລາດ​ບັງ​ຫຼວງ ດັ່ງ­ນັ້ນ ສິນ ຫຼື ລະ­ບຽບ​ວິ­ໄນ ແລະ ກົດ­ໝາຍ​ຂອງ​ບ້ານ​ເມືອງ​ຈຶ່ງ​ເປັນ​ເຄື່ອງ ມື​ສ້າງ​ຊາດ ແລະ ຄົນ​ຊື່​ກົງ​ຕໍ່­ໜ້າ​ທີ່ ຈຶ່ງ​ເປັນ​ຄົນ​ສັດ­ຊື່ ຊີ­ວິດ​ຈະ­ເລີນ​ງອກ​ງາມ ບໍ່​ຫ່ວງ​ໜ້າ​ພະ​ວົງ​ຫຼັງ ເພາະ​ກຽດ­ຕິ­ຍົດ ຫຼື ຊັບ​ສົມ­ບັດ​ທີ່​ໄດ້​ມາ​ຍ້ອນ​ຄວາມ​ສຸດ­ຈະ­ລິດ.

    ສັງ​ລວມ​ໄດ້​ວ່າ: ຂອງ­ຂວັນ​ປີ​ໃໝ່ 2019 ນີ້ ເຮົາ​ຕ້ອງ​ໄດ້​ຄັດ​ສັນ​ເອົາ​ຂອງ​ດີ​ມີ­ຄ່າ ທັງ​ຮ່າງ­ກາຍ ແລະ ສະ­ໝອງ ພ້ອມ​ນີ້ ກໍ່​ບໍ່​ຄວນ​ລືມ​ວ່າ ຄຳ​ອວຍ­ພອນ​ຈະ​ເປັນ​ຈິງ​ໄດ້​ຕ້ອງ​ລົງ­ມື​ປະ­ຕິ­ບັດ​ພ້ອມ​ໃນ​ຍຸກ 4.0 ເຊິ່ງ​ຖ້າ​ເຮັດ​ບໍ່​ໄດ້​ອາດ​ຍັງ​ເປັນ 0.4 ຄື­ເກົ່າ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ