ເບິ່ງບ້ານເຂົາເອົາບົດຮຽນ 18/12/2018

286 18 ທ.ວ. 2018 ຫົວຂໍ້ຂ່າວອື່ນໆ

    ມື້­ນີ້ ຂໍ​ເລີ່ມ​ຈາກ​ຂ່າວ​ບັນ­ຫາ​ການ​ນຳ​ທ່ຽວ​ຊົມ​ວິວ​ທິວ​ທັດ​ນະ­ຄອນ­ຫຼວງ​ຮ່າ​ໂນ້ຍ ຕໍ່​ໃສ່​ຂ່າວ​ລັດ​ຖະ​ສະ­ພາ​ອີ​ຣານ ຮັບ­ຮອງ​ເອົາ​ກົດ­ໝາຍ​ຕ້ານ​ການ​ສະ­ໜອງ​ການ​ເງິນ​ໃຫ້​ກຸ່ມ​ກໍ່​ການ​ຮ້າຍ.

    ທີ່ ຫວຽດ­ນາມ: ມີ​ຂ່າວ​ກ່ຽວ​ກັບ​ບາງ​ບັນ­ຫາ​ທີ່​ບໍ­ລິ­ສັດ​ທ່ອງ​ທ່ຽວ ຕຣັນ​ເຊີ​ໂກ (Transerco) ພວມ​ປະ​ເຊີນ​ຢູ່​ໃນ​ການ​ບໍ­ລິ­ການ ການ­ທ່ອງ­ທ່ຽວ ເພື່ອ​ຊົມ​ວິວ​ທິວ​ທັດ ນະ­ຄອນ­ຫຼວງ​ຮ່າ​ໂນ້ຍ ບໍ­ລິ­ສັດ​ນີ້ ໃຫ້​ບໍ­ລິ­ການ​ນຳ​ທ່ຽວ​ໂດຍ​ໃຊ້​ລົດ​ບັດ​ໃຫຍ່​ເປີດ​ຫຼັງ­ຄາ ທີ່​ໄດ້​ຮັບ​ໃຊ້​ແລ່ນ​ບໍ­ລິ­ການ​ຕົວ​ຈິງ ໂດຍ​ສະ­ເລ່ຍ 7 ຖ້ຽວ​ຕໍ່​ວັນ ເຊິ່ງ​ຫຼຸດ​ລະ­ດັບ​ຄາດ­ໝາຍ​ທີ່​ທາງ​ບໍ­ລິ­ສັດ ວາງ​ແຜນ​ໄວ້ ພາຍ­ຫຼັງ​ຊັ່ງ­ຊາ​ຕີ​ລາ­ຄາ​ບັນ­ຫາ​ດັ່ງ­ກ່າວ ທາງ​ບໍ­ລິ­ສັດ​ໄດ້​ສະ­ຫຼຸບ​ວ່າ: ຍ້ອນ​ລາ­ຄາ​ສູງ​ໂພດ ຈຶ່ງ​ບໍ່​ມີ​ນັກ​ທ່ອງ​ທ່ຽວ​ໃຊ້​ບໍ­ລິ­ການ​ເທົ່າ​ທີ່​ຄວນ ນອກ­ຈາກ​ນັ້ນ ທາງ​ບໍ­ລິ­ສັດ​ຍັງ​ຂາດ​ການ​ປະ­ສານ​ງານ​ກັບ​ບັນ­ດາ​ບໍ­ລິ­ສັດ​ທ່ອງ​ທ່ຽວ​ອື່ນໆ​ອີກ ທ່ານ ວູ​ວັນ​ວຽນ (Vuvanvien) ອຳ­ນວຍ​ການ​ພະ​ແນກ​ຂົນ­ສົ່ງ​ນະ­ຄອນ­ຫຼວງ​ຮ່າ​ໂນ້ຍ ມີ​ຄຳ​ເຫັນ​ກ່ຽວ​ກັບ​ບັນ­ຫາ​ນີ້​ວ່າ: ການ​ບໍ​ລິ​ການ­ທ່ອງ­ທ່ຽວ​ຊົມ​ວິວ ນະ­ຄອນ­ຫຼວງ​ຮ່າ​ໂນ້ຍ ນັ້ນ​ແມ່ນ​ເນັ້ນ​ໃຫ້​ບໍ­ລິ­ການ​ນັກ​ທ່ອງ​ທ່ຽວ ໂດຍ​ສະ­ເພາະ​ແມ່ນ​ຕ່າງ­ປະ­ເທດ​ເປັນ­ຕົ້ນ​ຕໍ ດັ່ງ­ນັ້ນ ບໍ­ລິ­ສັດ ຕຣັນ​ເຊີ​ໂກ ຄວນ​ມີ​ແຜນ​ງານ​ປະ­ສານ​ສົມ­ທົບ​ກັບ​ບໍ­ລິ­ສັດ​ທ່ອງ​ທ່ຽວ​ອື່ນໆ ເພື່ອ​ຂະ­ຫຍາຍ​ການ​ບໍ­ລິ­ການ ແລະ ຈະ​ຕ້ອງ​ໄດ້​ໃຊ້​ເວ­ລາ​ເຖິງ 6 ເດືອນ ໃນ​ການ​ຮ່າງ​ແຜນ​ງານ​ດັ່ງ­ກ່າວ ໃນ​ປີ 2017 ນະ­ຄອນ­ຫຼວງ​ຮ່າ​ໂນ້ຍ ໄດ້​ຕ້ອນ­ຮັບ​ນັກ​ທ່ອງ​ທ່ຽວ ທັງ​ໝົດ 23,83 ລ້ານ​ຄົນ ໃນ​ນັ້ນ ເປັນ​ນັກ​ທ່ອງ​ທ່ຽວ​ຕ່າງ­ປະ­ເທດ 4,95 ລ້ານ​ຄົນ ອີກ​ຂໍ້­ຄົງ­ຄ້າງ​ໜຶ່ງ​ທີ່​ເຮັດ​ໃຫ້​ບໍ່​ມີ​ການ​ໃຊ້​ບໍ­ລິ­ການ​ນຳ​ທ່ຽວ​ຊົມ​ນະ­ຄອນ­ຫຼວງ ໂດຍ​ລົດ​ບັດ​ເປີດ​ຫຼັງ­ຄາ​ນັ້ນ ກໍ່​ແມ່ນ​ການ​ອອກ​ຖ້ຽວ​ລົດ​ບໍ­ລິ­ການ​ແຕ່​ລະ​ເທື່ອ​ນັ້ນ​ຫ່າງ​ກັນ​ໂພດ ຢູ່​ນະ­ຄອນ­ຫຼວງ​ວຽງ​ຈັນ​ພວກ​ເຮົາ ກໍ່​ເຄີຍ​ເຫັນ​ລົດ​ບັດ​ເປີດ​ຫຼັງ­ຄາ​ນຳ​ທ່ຽວ​ຊົມ​ວິວ​ທິວ​ທັດ​ໂຕ​ນະ­ຄອນ­ຫຼວງ ແຕ່​ຈະ​ມີ​ບັນ­ຫາ​ຄ້າຍ​ກັບ​ຢູ່ ຮ່າ​ໂນ້ຍ ຫຼື ບໍ່​ນັ້ນ​ຍັງ​ບໍ່​ທັນ​ມີ​ຂ່າວ​ອອກ​ມາ​ແບບ​ເຈາະ​ເລິກ​ເທື່ອ.

    ທີ່ ອີ​ຣານ: ຕາມ​ແຫຼ່ງ​ຂ່າວ​ໜັງ­ສື­ພິມ ເດິ​ເນ​ເຊິນ (The Nation) ໃຫ້​ຮູ້​ວ່າ: ຫວ່າງ​ບໍ່​ດົນ​ມາ​ນີ້ ລັດ​ຖະ​ສະ­ພາ​ອີ​ຣານ ໄດ້​ຕົກ­ລົງ​ຮັບ­ຮອງ​ເອົາ​ຮ່າງ​ກົດ­ໝາຍ​ຫຼາຍ​ດ້ານ​ການ​ສະ­ໜັບ­ສະ­ໜູນ​ດ້ານ​ການ​ເງິນ​ໃຫ້​ແກ່​ຂ່າວ​ກໍ່​ການ​ຮ້າຍ ເຊິ່ງ​ຝ່າຍ​ອະ­ນຸ​ຮັກ​ນິ­ຍົມ ໄດ້​ອອກ­ສຽງ​ຄັດ­ຄ້ານ​ຢ່າງ​ແຂງ­ແຮງ ຮ່າງ​ກົດ­ໝາຍ​ນີ້ ລັດ­ຖະ­ບານ​ເປັນ​ເຈົ້າ​ການ​ວາງ​ອອກ ເພື່ອ​ໃຫ້​ສອດ­ຄ່ອງ​ກັບ​ຄຳ​ຮຽກ­ຮ້ອງ​ຂອງ​ໜ່ວຍ​ງານ​ສະ­ເພາະ​ກິດ​ດ້ານ​ການ​ເງິງ​ສາ­ກົນ ໂດຍ​ມີ​ສຽງ​ເຫັນ​ດີ 143 ສຽງ ແລະ ຄັດ­ຄ້ານ 120 ສຽງ ເປົ້າ​ໝາຍ​ຂອງ​ການ​ຮັບ­ຮອງ​ເອົາ​ກົດ­ໝາຍ​ນີ້ ແມ່ນ​ເພື່ອ​ເຮັດ​ໃຫ້​ລະ­ບົບ​ກົດ­ໝາຍ ອີ​ຣານ ເຊື່ອມ​ໂຍງ​ເຂົ້າ​ກັບ​ເນື້ອ​ໃນ​ສົນ­ທິ­ສັນ­ຍາ​ໃຫ້​ກົດ­ໝາຍ​ອີ​ຣານ​ຂອງ​ສະ­ຫະ​ປະ­ຊາ​ຊາດ ເພື່ອ​ຕ້ານ​ການ​ກໍ່​ການ​ຮ້າຍ ແລະ ຢູ່​ໃນ​ແຖວ​ດຽວ​ກັນ​ລະ­ດັບ​ສາ­ກົນ ທ່ານ ໂມ​ຮຳ​ມັດ ຈາ ວາດ ຊາ​ຣິບ (Mohammad ja vad Zarif) ລັດ­ຖະ­ມົນ­ຕີ​ການ​ຕ່າງ­ປະ­ເທດ​ອີ​ຣານ ໄດ້​ມີ​ຄຳ​ເຫັນ​ກ່ອນ​ມີ​ການ​ລົງ​ຄະ­ແນນ​ຮັບ­ຮອງ​ເອົາ​ຮ່າງ​ກົດ­ໝາຍ​ນີ້​ວ່າ ທ່ານ​ເອງ ກໍ່​ຄື ທ່ານ​ປະ­ທາ­ນາ­ທິ­ບໍ­ດີ ບໍ່​ສາ­ມາດ​ຮັບ­ປະ­ກັນ​ໄດ້​ວ່າ ກົດ­ໝາຍ​ສະ­ບັບ​ນີ້ ຈະ​ສາ­ມາດ​ແກ້​ໄຂ​ບັນ­ຫາ​ຕ່າງໆ​ໃຫ້​ໝົດ​ໄປ ຖ້າ ອີ​ຣານ ເຂົ້າ​ເປັນ​ພາ­ຄີ​ສົນ­ທິ­ສັນ­ຍາ ສປຊ ເພື່ອ​ຕ້ານ​ການ​ສະ­ໜັບ­ສະ­ໜູນ​ການ​ເງິນ​ໃຫ້​ກຸ່ມ​ກໍ່​ການ​ຮ້າຍ ແຕ່​ທ່ານ​ລັດ­ຖະ­ມົນ­ຕີ​ເຊື່ອ​ວ່າ ຖ້າ​ບໍ່​ເຂົ້າ​ເປັນ​ພາ­ຄີ​ສົນ­ທິ­ສັນ­ຍາ​ດັ່ງ­ກ່າວ ສະ­ຫະ­ລັດ​ອາ​ເມ​ຣິ​ກາ ກໍ່​ຈະ​ໃຊ້​ເປັນ​ຂໍ້​ອ້າງ​ເພື່ອ​ເພີ່ມ​ບັນ­ຫາ​ຕ້ານ ອີ​ຣານ ຕື່ມ.

ຂ່າວທີ່ກ່ຽວຂ້ອງ