ຂ່າວຫຼ້າສຸດ

ສີຫອມ-ອານຸ-ຊຽງຍືນ ໄດ້ຮັບນາມມະຍົດບ້ານປ້ອງກັນຊາດເຂັ້ມແຂງ

321 18 ທ.ວ. 2018 ຂ່າວໜ້າ​ໜຶ່ງ
ສີຫອມ-ອານຸ-ຊຽງຍືນ ໄດ້ຮັບນາມມະຍົດບ້ານປ້ອງກັນຊາດເຂັ້ມແຂງ

    ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ຈັດ​ພິ­ທີ​ປະ­ກາດ​ບ້ານ​ສີ​ຫອມ ບ້ານ​ອາ​ນຸ ແລະ ບ້ານ​ຊຽງ​ຍືນ ເປັນ​ບ້ານ​ປ້ອງ​ກັນ​ຊາດ​ເຂັ້ມ­ແຂງ ຂຶ້ນ​ວັນ​ທີ 14 ທັນ­ວາ 2018 ຢູ່​ເມືອງ​ດັ່ງ­ກ່າວ ໂດຍ​ມີ​ທ່ານ​ນາງ ບົວ​ລອນ ວົງ​ດາ­ລາ​ແສນ ເຈົ້າ­ເມືອງ​ຈັນ­ທະ​ບູ​ລີ ທ່ານ ອາ­ນຸ­ພາບ ຕຸ​ນາ​ລົມ ປະ­ທານ​ສະ­ພາ​ປະ­ຊາ­ຊົນ​ນະ­ຄອນ­ຫຼວງ ທ່ານ ພົນ​ຈັດ­ຕະ­ວາ ສີ​ພອນ ຈັນ​ສົມ​ວົງ ຫົວ­ໜ້າ​ການ­ເມືອງ​ກອງ​ບັນ­ຊາ​ການ​ທະ­ຫານ​ນະ­ຄອນ­ຫຼວງ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ໃນ​ໄລ­ຍະ​ຜ່ານ​ມາ ປະ­ຊາ­ຊົນ 3 ບ້ານ​ດັ່ງ­ກ່າວ ໄດ້​ເຊື່ອມ​ຊຶມ​ແນວ­ທາງ​ນະ­ໂຍ­ບາຍ​ຂອງ​ພັກ ກົດ­ໝາຍ​ຂອງ​ລັດ ມີ​ຄວາມ​ເຊື່ອ​ໝັ້ນ​ຕໍ່​ການ​ນຳ­ພາ​ຂອງ​ພັກ-ຕໍ່​ລະ­ບອບ​ໃໝ່ ມີ​ມູນ​ເຊື່ອ​ຫ້າວ­ຫັນ​ໃນ​ການ​ສ້າງ­ສາ​ພັດ­ທະ­ນາ​ຄອບ­ຄົວ ໃຫ້​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ​ໄດ້ 100% ພ້ອມ​ທັງ​ຮັກ­ສາ​ໄດ້​ຄວາມ​ສາ­ມັກ­ຄີ ແລະ ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ມີ​ອາ­ຊີບ​ໝັ້ນ​ທ່ຽງ ທຸກ​ຄົນ​ມີ​ວຽກ​ເຮັດ​ງານ​ທຳ​ທີ່​ຖືກ­ຕ້ອງ.

    ຜ່ານ​ການ​ປະ​ເມີນ​ຄອບ­ຄົວ ແລະ ບ້ານ​ປ້ອງ​ກັນ​ຊາດ​ເຂັ້ມ­ແຂງ ສາ­ມາດ​ຈັດ​ປະ­ເພດ​ເຂັ້ມ­ແຂງ​ໄດ້ 433 ຄອບ­ຄົວ ເທົ່າ​ກັບ 83,43% ກາງ 20 ຄອບ­ຄົວ ເທົ່າ​ກັບ 15,42% ອ່ອນ 6 ຄອບ­ຄົວ ເທົ່າ​ກັບ 1,15% ລວມ​ຄອບ­ຄົວ​ທີ່​ໄດ້​ຮັບ​ໃບ­ຢັ້ງ­ຢືນ​ເປັນ​ຄອບ­ຄົວ​ປ້ອງ​ກັນ​ຊາດ​ເຂັ້ມ­ແຂງ 453 ຄອບ­ຄົວ ເທົ່າ​ກັບ 87,28% ເຊິ່ງ​ການ​ປະ​ເມີນ​ການ­ຈັດ­ຕັ້ງ​ປະ­ຕິ­ບັດ​ຄອບ­ຄົວ ແລະ ບ້ານ​ດັ່ງ­ກ່າວ ແມ່ນ​ປະ­ຕິ­ບັດ​ຕາມ 6 ມາດ­ຖານ ທີ່​ກະ­ຊວງ​ປ້ອງ​ກັນ​ປະ­ເທດ​ວາງ​ອອກ ສາ­ມາດ​ຢັ້ງ­ຢືນ​ໄດ້​ວ່າ 3 ບ້ານ​ໄດ້​ຮັບ​ເປັນ​ບ້ານ​ປ້ອງ​ກັນ​ຊາດ​ເຂັ້ມ­ແຂງ ເປັນ​ບ້ານ​ທີ 1 ຂອງ​ເມືອງ ແລະ ເປັນ​ບ້ານ​ທີ 7 8 ແລະ 9 ຂອງ​ນະ­ຄອນ­ຫຼວງ.

ຂ່າວທີ່ກ່ຽວຂ້ອງ