ຂ່າວຫຼ້າສຸດ

ສ້າງໂອກາດໃຫ້ແຮງງານລາວ ໄດ້ມີວຽກເຮັດງານທຳ

226 18 ທ.ວ. 2018 ຂ່າວໜ້າ​ໜຶ່ງ
ສ້າງໂອກາດໃຫ້ແຮງງານລາວ ໄດ້ມີວຽກເຮັດງານທຳ

    ງານ​ມະ​ຫະ​ກຳ​ນັດ​ພົບ​ແຮງ​ງານ ປະ­ຈຳ​ປີ 2018 ຈັດ​ຂຶ້ນ​ວັນ 14-16 ທັນ­ວາ 2018 ທີ່​ສູນ​ການ​ຄ້າ​ທົ່ງ​ຂັນ​ຄຳ ນະ­ຄອນ­ຫຼວງ​ວຽງ​ຈັນ ມີ​ທ່ານ​ນາງ ໃບ​ຄຳ ຂັດ­ຕິ­ຍະ ຮອງ​ລັດ­ຖະ­ມົນ­ຕີ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ທ່ານ​ນາງ ກາ­ລີ​ນາ ອິມ​ໂມ​ເນັນ ຜູ້­ຕາງ­ໜ້າ​ອົງ­ການ​ສະ­ຫະ​ປະ­ຊາ​ຊາດ​ປະ­ຈຳ​ລາວ ທ່ານ ຢາ​ຊູ​ສິ ນິ​ກິ​ສິ ຜູ້­ຕາງ­ໜ້າ​ຈາກ​ທະ­ນາ­ຄານ​ພັດ­ທະ­ນາ​ອາ­ຊີ ພ້ອມ​ດ້ວຍ​ບັນ­ດາ​ຜູ້­ຕາງ­ໜ້າ​ຈາກ​ພາກ​ລັດ ສະ­ຖານ­ທູດ ອົງ​ການ­ຈັດ­ຕັ້ງ​ສາ­ກົນ ຜູ້​ປະ­ກອບ​ການ ບໍ­ລິ­ສັດ ຫ້າງ​ຮ້ານ ແລະ ນັກ­ຮຽນ ນັກ​ສຶກ​ສາ ຕະ­ຫຼອດ​ຮອດ​ຜູ້​ຊອກ​ວຽກ​ເຮັດ​ງານ​ທຳ​ເຂົ້າ​ຮ່ວມ.

    ທ່ານ​ນາງ ໃບ​ຄຳ ຂັດ­ຕິ­ຍະ ກ່າວ​ວ່າ: ຜ່ານ​ມາ​ຂະ­ແໜງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ໄດ້​ຈັດ​ງານ​ງານ​ມະ​ຫະ​ກຳ​ນັດ​ພົບ​ແຮງ​ງານ​ມາ​ຫຼາຍ​ຄັ້ງ ທັງ​ຢູ່​ໃນ​ນະ­ຄອນ­ຫຼວງ​ວຽງ​ຈັນ ແລະ ຕ່າງ​ແຂວງ ເລີ່ມ​ແຕ່​ປີ 2009 ເປັນ­ຕົ້ນ​ມາ ໂດຍ​ແຕ່​ລະ​ປີ​ໄດ້​ຈັດ​ກິດ­ຈະ­ກຳ​ງານ​ໂຮມ​ຊຸມ­ນຸມ ແລະ ຍ່າງ​ເພື່ອ​ສຸ­ຂະ­ພາບ ໃນ​ນັ້ນ ມີ​ຫຼາຍ​ພາກ­ສ່ວນ​ເຂົ້າ​ຮ່ວມ​ງານ ການ​ຈັດ​ງານ​ແຕ່​ລະ​ຄັ້ງ​ໃນ​ຜ່ານ​ມາ​ເຫັນ​ວ່າ​ໄດ້​ຮັບ​ຜົນ​ດີ​ພໍ​ສົມ­ຄວນ ໂດຍ​ສະ­ເພາະ ຜູ້​ຊອກ​ວຽກ​ເຮັດ​ງານ​ທຳ​ຈຳ­ນວນ​ຫຼາຍ ໄດ້​ຖືກ​ບັນ­ຈຸ​ເຂົ້າ​ເຮັດ​ວຽກ​ເຊັ່ນ​ດຽວ​ກັນ ຜູ້​ໃຊ້​ແຮງ​ງານ​ກໍ່​ໄດ້​ຮັບ​ແຮງ​ງານ​ສອດ­ຄ່ອງ​ຕາມ​ເປົ້າ​ໝາຍ​ທີ່​ຕ້ອງ­ການ ນອກ​ນີ້ ຍັງ​ມີ​ກຳ­ລັງ​ແຮງ​ງານ​ຈຳ­ນວນ​ຫຼາຍ​ທີ່​ໄດ້​ເຂົ້າ​ເຖິງ​ສະ​ຖາ​ບັນ​ການ​ສຶກ​ສາ ແລະ ສູນ​ເຝິກ​ວິ­ຊາ​ຊີບ ເພື່ອ​ພັດ­ທະ­ນາ​ຄວາມ​ຮູ້ ສີ­ມື​ແຮງ​ງານ ແລະ ຄວາມ​ຊຳ­ນານ​ງານ ໄປ​ຕາມ​ກົນ​ໄກ​ຄວາມ​ຕ້ອງ­ການ​ຂອງ​ຕະ­ຫຼາດ​ແຮງ​ງານ.

    ສຳ­ລັບ​ງານ​ມະ​ຫະ​ກຳ​ນັດ​ພົບ​ແຮງ​ງານ​ປີ 2018 ໄດ້​ຕັ້ງ​ບູດ​ຂອງ​ຫົວ­ໜ່ວຍ​ທຸ­ລະ​ກິດ ຫົວ­ໜ່ວຍ​ການ​ຜະ­ລິດ​ການ​ບໍ­ລິ­ການ ແລະ ບໍ­ລິ­ສັດ​ບໍ­ລິ­ການ​ຈັດ​ຫາ​ງານ ເພື່ອ​ໃຫ້​ຄຳ​ແນະ­ນຳ​ຂັ້ນ​ຕອນ​ການ​ສະ­ໝັກ​ງານ ການ​ຂຶ້ນ​ທະ­ບຽນ ການ​ສຳ­ພາດ ແລະ ການ​ເຮັດ​ສັນ­ຍາ​ແຮງ​ງານ ມີ​ບັນ­ດາ​ສູນ​ເຝິກ ແລະ ວິ­ທະ­ຍາ­ໄລ​ຕ່າງໆ ສະ­ແດງ​ກິດ­ຈະ­ກຳ​ການ​ເຝິກ ການ​ໃຫ້​ຄຳ​ແນະ­ນຳ​ດ້ານ​ອາ­ຊີບ ການ​ຂຶ້ນ​ທະ­ບຽນ ການ​ເຝິກ ວາງ­ສະ­ແດງ​ສິນ­ຄ້າ​ຫັດ­ຖະ­ກຳ ຜະ­ລິດ​ຕະ​ພັນ​ກະ­ສິ­ກຳ ຜະ­ລິດ​ຕະ​ພັນ​ພູມ​ປັນ­ຍາ​ຂອງ​ຊາວ­ບ້ານ ແລະ ອື່ນໆ ນອກ​ນີ້ ຍັງ​ມີ​ບູດ​ຂອງ​ຈຸດ​ບໍ­ລິ­ການ​ຈັດ​ຫາ​ງານ​ຂອງ 9 ແຂວງ ເພື່ອ​ອຳ­ນວຍ​ຄວາມ​ສະ­ດວກ​ໃຫ້​ຄຳ​ປຶກ­ສາ​ໃຫ້​ທັງ​ຜູ້​ຊອກ​ວຽກ​ເຮັດ​ງານ​ທຳ ແລະ ຜູ້​ໃຊ້​ແຮງ​ງານ​ກ່ຽວ​ກັບ​ການ​ຂຶ້ນ​ທະ­ບຽນ ການ​ນຳ​ໃຊ້​ເວັບ​ໄຊ​ບໍ­ລິ­ການ​ຈັດ​ຫາ​ງານ​ສາ­ທາ­ລະ­ນະ​ຊົນ ມີ​ສູນ​ຂໍ້​ມູນ​ຂ່າວ­ສານ​ສຳ­ລັບ​ແຮງ​ງານ​ເຄື່ອນ​ຍ້າຍ​ຂອງ​ແຂວງ​ທີ່​ຈະ​ອຳ­ນວຍ​ຄວາມ​ສະ­ດວກ​ໃຫ້​ຄຳ​ປຶກ­ສາ ແລະ ຂໍ້​ມູນ​ທີ່​ຈຳ­ເປັນ​ໃຫ້​ແກ່​ແຮງ​ງານ​ເຄື່ອນ​ຍ້າຍ​ແຮງ​ງານ ຜູ້​ທີ່​ຕ້ອງ­ການ​ໄປ​ຫາ​ເຮັດ​ວຽກ​ແບບ​ຖືກ­ຕ້ອງ ແລະ ຄອບ­ຄົວ​ຂອງ​ແຮງ​ງານ ແລະ ແຮງ​ງານ​ກັບ​ຄືນ​ຈາກ​ຕ່າງ­ປະ­ເທດ.

    ສຳ­ລັບ​ງານ​ຄັ້ງ​ນີ້​ມີ​ບັນ­ດາ​ບໍ­ລິ­ສັດ ຫົວ­ໜ່ວຍ​ແຮງ​ງານ ແລະ ໂຄງ­ການ​ລົງ­ທຶນ​ຕ່າງໆ​ຫຼາຍ​ກວ່າ 200 ຫົວ­ໜ່ວຍ ມີ​ຄວາມ​ຕ້ອງ­ການ​ແຮງ​ງານ ເພື່ອ​ບັນ­ຈຸ​ເຂົ້າ​ຕຳ­ແໜ່ງ​ວ່າງ​ເຖິງ 2.000 ຕຳ­ແໜ່ງ​ທີ່​ລໍ­ຖ້າ​ສະ­ໝັກ​ງານ ຄາດ​ວ່າ​ຈະ​ມີ​ກຳ­ລັງ​ແຮງ​ງານ​ທີ່​ພວມ​ຊອກ​ວຽກ​ເຮັດ ຜູ້​ວ່າງ​ງານ ຜູ້​ຕ້ອງ­ການ​ປ່ຽນ​ວຽກ​ງານ​ໃໝ່ ແລະ ນັກ­ຮຽນ ນັກ​ສຶກ​ສາ​ທີ່​ຮຽນ​ຈົບ ເຂົ້າ​ຮ່ວມ​ຫຼາຍ​ກວ່າ 5.000 ຄົນ.

ຂ່າວທີ່ກ່ຽວຂ້ອງ