ຂ່າວຫຼ້າສຸດ

ຮ່ວມມືສ້າງຄວາມເຂັ້ມແຂງ ໃຫ້ລະບົບຂໍ້ມູນຂ່າວສານອຸຕຸກະສາດ

260 18 ທ.ວ. 2018 ຂ່າວໜ້າ​ໜຶ່ງ

    ພິ­ທີ​ລົງ​ນາມ​ຂໍ້​ຕົກ­ລົງ​ຮ່ວມ​ຈັດ​ພິມ ລະ­ຫວ່າງ​ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ອົງ­ການ​ອາ­ຫານ ແລະ ການ​ກະ­ເສດ ໃນ​ໂຄງ­ການ​ຄວາມ​ເຂັ້ມ­ແຂງ​ໃຫ້​ລະ­ບົບ​ຂໍ້​ມູນ​ຂ່າວ­ສານ ແລະ ການ​ຕິດ­ຕາມ​ສະ­ພາບ​ອຸ­ຕຸ​ກະ​ສາດ ເພື່ອ​ຊ່ວຍ​ການ​ປັບ​ຕົວ​ເຂົ້າ​ກັບ​ການ​ປ່ຽນ­ແປງ​ດິນ​ຟ້າ​ອາ­ກາດ ແລະ ການ​ຄ້ຳ­ປະ­ກັນ​ສະ­ບຽງ​ອາ­ຫານ​ຢູ່​ລາວ ຈັດ​ຂຶ້ນ​ວັນ​ທີ 14 ທັນ­ວາ 2018 ຢູ່​ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ ລະ­ຫວ່າງ​ທ່ານ ຂັນ​ມະ­ນີ ຂຸນ​ພົນ ຫົວ­ໜ້າ​ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ ທ່ານ ຄຳ​ພອນ ຣາ​ຊະ​ຈັກ ຫົວ­ໜ້າ​ກົມ​ຄຸ້ມ​ຄອງ​ທີ່​ດິນ ແລະ ກະ­ສິ­ກຳ ແລະ ທ່ານ ນາ​ຊາ ຮາ​ຢັດ ຜູ້­ຕາງ­ໜ້າ​ອົງ­ການ​ອາ­ຫານ ແລະ ການ​ກະ­ເສດ ປະ­ຈຳ​ລາວ ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເພື່ອ​ເສີມ​ຂະ­ຫຍາຍ​ການ​ຕິດ­ຕາມ ກວດ­ກາ ການ​ວິ­ເຄາະ ການ​ສື່­ສານ ແລະ ການ​ນຳ​ໃຊ້​ຂໍ້​ມູນ​ດ້ານ​ອຸ­ຕຸ​ກະ​ສາດ ແລະ ຂໍ້​ມູນ​ຂ່າວ­ສານ​ພູມ​ອາ­ກາດ​ອື່ນໆ ເພື່ອ​ການ​ວາງ​ແຜນ­ການ​ຕັດ­ສິນ​ໃຈ​ໃນ​ວຽກ​ງານ​ການ​ຜະ­ລິດ​ກະ­ສິ­ກຳ ແລະ ການ​ຄ້ຳ­ປະ­ກັນ​ການ​ຜະ­ລິດ​ສະ­ບຽງ​ອາ­ຫານ​ໃນ​ລະ­ດັບ​ຊາດ ແລະ ລະ­ດັບ​ແຂວງ ນອກ​ນີ້​ຍັງ​ປັບ­ປຸງ​ການ​ຕິດ­ຕາມ​ກວດ­ກາ ແລະ ວິ­ເຄາະ​ລະ­ບົບ​ການ​ຜະ­ລິດ​ກະ­ສິ­ກຳ ໂດຍ​ການ​ສ້າງ​ຄວາມ​ເຂັ້ມ­ແຂງ​ດ້ານ​ລະ­ບົບ​ຂໍ້​ມູນ ການ​ຄຸ້ມ​ຄອງ​ຊັບ­ພະ­ຍາ­ກອນ​ທີ່​ດິນ ແລະ ຂໍ້​ມູນ​ຂົງ­ເຂດ​ນິ­ເວດ​ກະ­ສິ­ກຳ ເພື່ອ​ສະ­ໜັບ­ສະ­ໜູນ​ນະ­ໂຍ­ບາຍ​ກະ­ສິ­ກຳ ແລະ ການ​ປັບ​ຕົວ​ເຂົ້າ​ກັບ​ການ​ປ່ຽນ­ແປງ​ດິນ​ຟ້າ​ອາ­ກາດ​ໃນ​ວຽກ​ງານ​ກະ­ສິ­ກຳ.

    ຂໍ້​ຕົກ­ລົງ​ສະ­ບັບ​ນີ້ ຈະ​ຊ່ວຍ​ຜະ­ລິດ­ຜົນ​ງານ​ຕີ​ພິມ​ຫຼາຍ​ຂຶ້ນ ເຊັ່ນ: ປຶ້ມ​ຄູ່​ມື​ນ້ອຍ ແຜ່ນ​ພັບ ປຶ້ມ​ຕຳ­ລາ ປຶ້ມ​ແນວ­ທາງ ແລະ ອື່ນໆ​ໃຫ້​ພາກ­ສ່ວນ​ກ່ຽວ­ຂ້ອງ ແລະ ຊາວ­ນາ​ໃຊ້​ເພື່ອ​ມີ​ຄວາມ​ເຂົ້າ­ໃຈ​ດີ​ຂຶ້ນ ແລະ ສາ­ມາດ​ປັບ​ຕົວ​ຈາກ​ການ​ປ່ຽນ­ແປງ​ດິນ​ຟ້າ​ອາ­ກາດ ໂຄງ­ການ​ນີ້​ນຳ​ໃຊ້​ງົບ­ປະ­ມານ 16 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 136,58 ຕື້​ກີບ ໂດຍ​ຈັດ​ຕັ້ງ​ປະ­ຕິ­ບັດ​ໄລ­ຍະ 4 ປີ ເລີ່ມ​ແຕ່​ກາງ​ປີ 2017 ເປັນ­ຕົ້ນ​ມາ​ແມ່ນ 5,5 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 46,95 ຕື້​ກີບ ຈາກ​ອົງ­ການ GEF ເຊິ່ງ​ໂຄງ­ການ​ຈະ​ແກ້​ໄຂ​ບັນ­ຫາ​ການ​ຕິດ­ຕາມ​ກວດ­ກາ ສັງ­ເກດ​ສະ­ພາບ​ດິນ​ຟ້າ​ອາ­ກາດ ການ​ວິ­ເຄາະ ເກັບ​ຮັກ­ສາ​ຂໍ້​ມູນ ແລະ ການ​ພັດ­ທະ­ນາ​ຜະ­ລິດ​ຕະ​ພັນ​ຂໍ້​ມູນ​ຂ່າວ­ສານ​ທີ່​ມີ​ມູນ​ຄ່າ​ເພີ່ມ ສົ່ງ­ເສີມ​ການ​ແບ່ງ­ປັນ​ຂໍ້​ມູນ​ຂ່າວ­ສານ ເພື່ອ​ຕັດ­ສິນ​ໃຈ​ໃນ​ວຽກ​ງານ​ກະ­ສິ­ກຳ ພະ­ນັກ­ງານ​ຂັ້ນ​ສູນ​ກາງ ແຂວງ ແລະ ທ້ອງ­ຖິ່ນ ຈະ​ໄດ້​ຮັບ​ການ​ຍົກ​ລະ­ດັບ​ກ່ຽວ​ກັບ​ວຽກ​ງານ​ອຸ­ຕຸ​ກະ­ເສດ ແລະ ລະ­ບົບ​ຂໍ້​ມູນ​ຂ່າວ­ສານ​ຊັບ­ພະ­ຍາ­ກອນ​ທີ່​ດິນ ລະ­ບົບ​ຂໍ້​ມູນ​ຂ່າວ­ສານ​ຈະ​ໃຫ້​ຜົນ​ປະ­ໂຫຍດ​ແກ່​ຫຼາຍ​ຂະ­ແໜງ­ການ ແລະ ຈະ​ໄດ້​ຮັບ​ການ​ພັດ­ທະ­ນາ ໂດຍ​ການ​ຮ່ວມ​ມື​ຢ່າງ​ໃກ້­ຊິດ​ກັບ​ຄູ່​ຮ່ວມ​ພັດ­ທະ­ນາ​ອື່ນໆ ທີ່​ເຮັດ​ວຽກ​ຢູ່​ຂົງ­ເຂດ​ທີ່​ຄ້າຍ­ຄື​ກັນ.

ຂ່າວທີ່ກ່ຽວຂ້ອງ