ຂ່າວຫຼ້າສຸດ

ເພີ່ມທະວີການເປັນຄູ່ຮ່ວມມື ເພື່ອຄວາມສົມບູນພູນສຸກຮ່ວມກັນ

355 18 ທ.ວ. 2018 ຂ່າວໜ້າ​ໜຶ່ງ
ເພີ່ມທະວີການເປັນຄູ່ຮ່ວມມື ເພື່ອຄວາມສົມບູນພູນສຸກຮ່ວມກັນ

    ສປປ ລາວ ໄດ້​ເປັນ​ເຈົ້າ­ພາບ​ຈັດ​ກອງ​ປະ­ຊຸມ​ລັດ­ຖະ­ມົນ­ຕີ​ຕ່າງ­ປະ­ເທດ ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ຄັ້ງ​ທີ 4 ຈັດ​ວັນ​ທີ 17 ທັນ­ວາ 2018 ເປັນ​ປະ­ທານ​ຮ່ວມ​ລະ­ຫວ່າງ​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແລະ ທ່ານ ຫວັງ ອີ້ ທີ່​ປຶກ­ສາ​ແຫ່ງ​ລັດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ​ຈີນ ມີ​ລັດ­ຖະ­ມົນ­ຕີ ແລະ ຄະ­ນະ​ຜູ້​ແທນ​ຈາກ​ບັນ­ດາ​ປະ­ເທດ​ແມ່­ນ້ຳ​ຂອງ ແລະ ຈີນ​ເຂົ້າ​ຮ່ວມ​ຫຼາຍ​ກວ່າ 120 ທ່ານ.

    ກອງ​ປະ­ຊຸມ​ຄັ້ງ​ນີ້​ດຳ­ເນີນ​ໄປ​ພາຍ​ໃຕ້​ຄຳ​ຂວັນ: “ເພີ່ມ​ທະ­ວີ​ການ​ເປັນ​ຄູ່​ຮ່ວມ​ມື ເພື່ອ​ຄວາມ​ສົມ­ບູນ​ພູນ​ສຸກ​ຮ່ວມ​ກັນ” ໂດຍ​ໄດ້​ປຶກ­ສາ​ຫາ­ລື​ກັນ​ໃນ​ຫຼາຍ​ບັນ­ຫາ ເປັນ­ຕົ້ນ ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ໂຄງ­ການ​ເຫັນ​ຜົນ​ໄວ 45 ໂຄງ­ການ ປັດ­ຈຸ­ບັນ​ສາ­ມາດ​ປະ­ຕິ­ບັດ​ສຳ­ເລັດ 25 ໂຄງ­ການ ກຳ­ລັງ​ປະ­ຕິ­ບັດ​ຢູ່ 8 ໂຄງ­ການ ແລະ ຍັງ​ລໍ­ຖ້າ​ການ­ຈັດ­ຕັ້ງ​ປະ­ຕິ­ບັດ​ອີກ 13 ໂຄງ­ການ ບັນ­ດາ​ໂຄງ­ການ​ພາຍ​ໃຕ້​ກອງ​ທຶນ​ພິ­ເສດ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ 132 ໂຄງ­ການ ຈັດ​ຕັ້ງ​ປະ­ຕິ­ບັດ 24 ໂຄງ­ການ ກຳ­ລັງ​ຈັດ​ຕັ້ງ​ປະ­ຕິ­ບັດ​ຢູ່ 98 ໂຄງ­ການ ແລະ ຍັງ​ລໍ­ຖ້າ​ອີກ 4 ໂຄງ­ການ ໃນ​ນັ້ນ ມີ​ໂຄງ­ການ​ທີ່​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ຢູ່​ລາວ 18 ໂຄງ­ການ (ໂຄງ­ການ​ເຫັນ​ຜົນ​ໄວ 5 ໂຄງ­ການ ແລະ ພາຍ​ໃຕ້​ກອງ​ທຶນ​ພິ­ເສດ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ​ອີກ 13 ໂຄງ­ການ) ໄດ້​ທົບ​ທວນ­ຄືນ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ງານ 5 ປີ 2018-2022 ໃນ​ໄລ­ຍະ 1 ປີ­ຜ່ານ­ມາ ເຊິ່ງ​ແຜນ​ງານ 5 ປີ​ດັ່ງ­ກ່າວ ໄດ້​ຖືກ​ຮັບ­ຮອງ​ເອົາ​ຢູ່​ກອງ​ປະ­ຊຸມ​ຜູ້­ນຳ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ຄັ້ງ​ທີ 2 ທີ່​ປະ­ເທດ​ກຳ­ປູ­ເຈຍ​ໃນ​ຕົ້ນ​ປີ 2018 ແລະ ວາງ​ທິດ​ທາງ​ການ​ຮ່ວມ​ມື​ໃນ­ຕໍ່­ໜ້າ ນອກ​ນີ້ ຍັງ​ໄດ້​ຮັບ­ຮອງ​ເອົາ​ບົດ​ຖະ­ແຫຼງ​ຂ່າວ​ຮ່ວມ​ກອງ​ປະ­ຊຸມ ລວມ​ທັງ​ບົດ​ລາຍ​ງານ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ໂຄງ­ການ​ໃນ​ແຜນ​ງານ 5 ປີ 2018-2022.

    ກ່ອນ​ກອງ​ປະ­ຊຸມ​ລັດ­ຖະ­ມົນ­ຕີ​ຕ່າງ­ປະ­ເທດ ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ໄດ້​ຈັດ​ກອງ​ປະ­ຊຸມ​ໜ່ວຍ​ງານ​ວິ­ຊາ​ການ​ຮ່ວມ​ດ້ານ​ການ​ທູດ ແລະ ກອງ​ປະ­ຊຸມ​ເຈົ້າ​ໜ້າ­ທີ່​ອາ­ວຸ­ໂສ​ໃນ​ວັນ​ທີ 15-16 ທັນ­ວາ 2018 ເພື່ອ​ປຶກ­ສາ​ຫາ­ລື​ບັນ­ດາ​ເອ­ກະ­ສານ​ທີ່​ຮັບ­ຮອງ​ເອົາ ໃນ​ກອງ​ປະ­ຊຸມ​ລັດ­ຖະ­ມົນ­ຕີ​ຕ່າງ­ປະ­ເທດ ຄັ້ງ​ທີ 4.

    ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ໄດ້​ຖືກ​ສ້າງ­ຕັ້ງ​ຂຶ້ນ​ປີ 2016 ເຊິ່ງ​ຖື​ເປັນ​ຂອບ​ການ​ຮ່ວມ​ມື​ລະ­ຫວ່າງ​ຈີນ ແລະ ບັນ­ດາ​ປະ­ເທດ​ແມ່­ນ້ຳ​ຂອງ ກໍ່​ຄື ລາວ ຫວຽດ­ນາມ ກຳ­ປູ­ເຈຍ ມຽນ​ມາ ແລະ ໄທ ໂດຍ​ມີ​ຈຸດ­ປະ­ສົງ​ເພື່ອ​ຮ່ວມ​ມື​ກັນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແນ­ໃສ່​ຫຼຸດ­ຜ່ອນ​ຄວາມ​ແຕກ​ໂຕນ​ທາງ​ດ້ານ​ການ​ພັດ­ທະ­ນາ​ໃນ​ພາກ​ພື້ນ​ນີ້ ເຊິ່ງ​ມີ​ກົນ​ໄກ​ການ​ຮ່ວມ​ມື​ແຕ່​ລະ­ດັບ​ໜ່ວຍ​ງານ​ວິ­ຊາ​ການ​ໃນ 5 ຂົງ­ເຂດ​ບຸ­ລິ­ມະ­ສິດ​ໄປ​ຈົນ​ເຖິງ​ລະ­ດັບ​ກອງ​ປະ­ຊຸມ​ຜູ້­ນຳ​ຂັ້ນ​ສູງ ກອງ​ປະ­ຊຸມ​ລະ­ດັບ​ລັດ­ຖະ­ມົນ­ຕີ​ຕ່າງ­ປະ­ເທດ​ແມ່ນ​ຖືກ​ຈັດ​ຂຶ້ນ​ທຸກ​ປີ ໂດຍ​ເປັນ​ປະ­ທານ​ໝູ­ນວຽນ​ຂອງ​ປະ­ເທດ​ແມ່­ນ້ຳ​ຂອງ ແລະ ຈີນ ລາວ ໄດ້​ຮັບ​ກຽດ​ໃຫ້​ເປັນ​ເຈົ້າ­ພາບ​ຈັດ​ກອງ​ປະ­ຊຸມ​ລັດ­ຖະ­ມົນ­ຕີ​ຕ່າງ­ປະ­ເທດ ຄັ້ງ​ທີ 4 ປີ 2018 ແລະ ຈະ​ສືບ­ຕໍ່​ເປັນ​ປະ­ທານ​ກອງ​ປະ­ຊຸມ​ຜູ້­ນຳ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ຄັ້ງ​ທີ 3 ປີ 2020.

ຂ່າວທີ່ກ່ຽວຂ້ອງ