ຂ່າວຫຼ້າສຸດ

ເກືອບ 200 ປະເທດ ເຫັນ​ພ້ອມ​ກັບ​ຂະ​ບວນ​ການ​ປະຕິບັດ​ສັນຍາ​ປາ​ຣີ ປີ 2015

331 18 ທ.ວ. 2018 ຂ່າວຕ່າງປະເທດ
ເກືອບ 200 ປະເທດ ເຫັນ​ພ້ອມ​ກັບ​ຂະ​ບວນ​ການ​ປະຕິບັດ​ສັນຍາ​ປາ​ຣີ ປີ 2015

    ແຫຼ່ງ​ຂ່າວ​ຕ່າງໆ​ລາຍ​ງານ​ວ່າ ໃນ​ທີ່​ສຸດ ເມື່ອ​ວັນ​ທີ 15 ທັນວາ​ນີ້ ຄະນະ​ຜູ້​ແທນ​ຈາກ​ເກືອບ 200 ປະເທດ ທີ່​ເຂົ້າ​ຮ່ວມ​ກອງ​ປະຊຸມ​ສຸດ​ຍອດ​ຂອງ​ສະຫະ​ປະ​ຊາ​​​ຊາດ (​ສປຊ) ກ່ຽວ​ກັບ​ການ​ປ່ຽນແປງ​ສະພາບ​ດິນ​ຟ້າ​ອາກາດ ຄັ້ງ​ທີ 24 (COP 24) ຊຶ່ງ​ຈັດ​ຂຶ້ນ​ທີ່​ປະເທດ​ໂປ​ໂລຍ ກໍ​ສາມາດ​ຊອກ​ຫາ​ຄວາມ​ເຫັນ​ພ້ອມ​ຮ່ວມ​ກັນ ກ່ຽວ​ກັບ​ກົນ​ໄກ​ການ​ແນະນຳ​ຂໍ້​ກຳນົດ​ລວມ ຊຶ່ງ​ໄດ້​ຮັບ​ການ​ສ້າງ​ຂຶ້ນ​ມາ​ເພື່ອ​ຫັນ​ສູ່​ການ​ປະຕິບັດ ບັນດາ​ຄາດໝາຍ​ທີ່​ວາງ​ອອກ​ມາ ຢູ່​ໃນ​ສັນຍາ​ປາ​ຣີ ວ່າ​ດ້ວຍ​ການ​ປ່ຽນແປງ​ສະພາບ​ດິນ​ຟ້າ​ອາກາດ ປີ 2015 ກ່ຽວ​ກັບ​ການ​ກຳນົດ​ຂອບ​ເຂດ​ລະດັບ​ເພີ່ມ​ຂຶ້ນ​ຂອງ​ອຸ່ນ​ຫະ​ພູມ​ໂລກ ໃຫ້​ຢູ່​ທີ່​ລະດັບ​ຕ່ຳ​ກວ່າ 2 ອົງສາ C.

    ກ່ອນ​ໜ້າ​ນັ້ນ ສ່ວນ​ຫຼາຍ​ຂອງ​ບັນດາ​ປະເທດ​ດັ່ງກ່າວ ຕ່າງ​ກໍ​ໃຫ້ການ​ຢືນຢັນ​ອີກ​ເທື່ອ​ໜຶ່ງ ຕໍ່​ບົດ​ລາຍ​ງານ​ຂອງ​ຄະນະ​ກຳມະການ​ລະຫວ່າງ​ລັດຖະບານ ຂອງ ​ສປຊ ກ່ຽວ​ກັບ​ການ​ປ່ຽນແປງ​ສະພາບ​ດິນ​ຟ້າ​ອາກາດ (IPCC).  ແຕ່​ເຖິງ​ຢ່າງໃດ​ກໍ​ຕາມ ຄວາມ​ຂັດ​ແຍ່ງ​ໄດ້​ເກີດ​ຂຶ້ນ ລະຫວ່າງ​ບັນດາ​ປະເທດ​ພັດທະນາ ກັບ​ບັນດາ​ປະເທດ​ພວມ​ພັດທະນາ ໂດຍ​ສະເພາະ​ກໍ​ແມ່ນ​ອັນ​ທີ່​ພົວພັນ​ເຖິງ​ວິທີ​ການສະແດງ​ອອກ​ມາ​ຢູ່​ໃນ​ບົດ​ລາຍ​ງານ​ຂອງ IPCC ລວມ​ເຖິງ​ການ​ຍົກ​ໃຫ້​ເຫັນ​ເຖິງ​ເຫດຜົນ​ທີ່​ຕ້ອງ​ໄດ້​ກຳນົດ​ຂອບ​ເຂດ​ການ​ອຸ່ນ​ຂຶ້ນ​ຂອງ​ໜ່ວຍ​ໂລກ​ຢູ່​ຕ່ຳ​ກວ່າ​ແດນ 1,5 ເມື່ອ​ທຽບໃສ່​ຍຸກ​ກ່ອນ​ອຸດສາຫະກຳ ກໍ​ຄື​ການ​ຫຼຸດຜ່ອນ​ປະລິມານ​ການ​ປ່ອຍ​ແກ​​ັສ​ເຮືອນ​ແກ້ວ. ຄວາມ​ບໍ່​ລົງ​ລອຍ​ກັນ​ອີກ​ປະການ​ໜຶ່ງ​ກໍ​ແມ່ນ​ຮູບ​ແບບ​ການ​ກຳນົດ​ລະດັບ​ຄວາມ​ຊ່ວຍເຫຼືອ ໃຫ້​ແກ່​ບັນດາ​ປະເທດ​ທີ່​ໄດ້​ຮັບ​ຄວາມ​ເສຍ​ຫາຍ​ຫຼາຍ ຈາກ​ສະພາບ​ດິນ​ຟ້າ​ອາກາດ​ປ່ຽນແປງ.

    ຄາດ​ວ່າ ຊີ​ເລ​ຈະ​ເປັນ​ປະເທດ​ເຈົ້າພາບ​ຈັດ  COP 25 ໃນ​ທ້າຍ​ປີ 2019. ທ່ານ ຄາ​ໂຣ​ໄລ​ນາ ສະ​ມິດ ລັດຖະມົນຕີ​ສິ່ງແວດລ້ອມ​ຂອງ​ຊີ​ເລ ໄດ້​ຢັ້ງຢືນ​ຂໍ້​ມູນ​ດັ່ງກ່າວ ຢູ່​ໃນ​ກອງ​ປະຊຸມ​ຖະແຫຼງ​ຂ່າວ ຊຶ່ງ​ຈັດ​ຂຶ້ນ​ນອກ COP 24. ຕາມ​ແຜນການ​ໃນ​ເບື້ອງ​ຕົ້ນ​ແລ້ວ ບຣາ​ຊີ​​ລ ຈະ​ເປັນ​ເຈົ້າພາບ​ຈັດ COP 25 ແຕ່​ວ່າ​ລັດຖະບານ​ປະເທດ​ນີ້ ໄດ້​ຕົກລົງ​ຖອນ​ຕົວ​ເມື່ອ​ທ້າຍ​ເດືອນ​ພະຈິກ​ທີ່​ຜ່ານ​ມາ.

 

ຂ່າວທີ່ກ່ຽວຂ້ອງ