ຂ່າວຫຼ້າສຸດ

ປະຊາຊົນ​ເຢ​ແມນ ຈຳນວນ​ຫຼາຍ​ພວມ​ຄ່ອຍໆ​ເສຍ​ຊີວິດ​ໄປ​ຍ້ອນ​ຂາດ​ອາຫານ

317 18 ທ.ວ. 2018 ຂ່າວຕ່າງປະເທດ
ປະຊາຊົນ​ເຢ​ແມນ ຈຳນວນ​ຫຼາຍ​ພວມ​ຄ່ອຍໆ​ເສຍ​ຊີວິດ​ໄປ​ຍ້ອນ​ຂາດ​ອາຫານ

    ທ່ານ ອັນໂຕ​ນີ​ໂອ ກູ​ເຕີ​ເຣ​​ສ ເລຂາທິການ​ໃຫຍ່​ສະຫະ​ປະຊາ​ຊາດ (​ສປຊ) ກ່າວ​ແຈ້ງ​ເຕືອນ ຢູ່​ໃນ​ກອງ​ປະຊຸມ​ຖະແຫຼງ​ຂ່າວ​ທີ່​ນະຄອນຫຼວງ ໂດ​ຮາ (ປະເທດ ກາ​ຕາ) ເມື່ອ​ວັນ​ທີ 16 ທັນວາ​ນີ້​ວ່າ ເຢ​ແມນ​ຈະ​ຕ້ອງ​ປະ​ເຊີນ​ກັບ​ສະພາບ​ທີ່​ຂີ້ຮ້າຍ​ກວ່າ​ຫຼາຍ ໃນ​ປີ 2019 ຖ້າ​ຫາ​ກວ່າ​ຝ່າຍ​ຕ່າງໆ ທີ່​ເຂົ້າ​ຮ່ວມ​ການ​ສູ້​ຮົບ​ຕົບ​ຕີ​ຢູ່​ໃນ​ປະເທດ​ນີ້ ບໍ່​ລົງ​ນາມ​ຂໍ້​ຕົກລົງ​ສັນຕິພາບ ກໍ​ຄື​ສະກັດ​ກັ້ນ​ວິ​ກິດ​ການ ມະນຸດສະທຳ.

   ທ່ານ ກູ​ເຕີ​ເຣ​​ສ ເວົ້າ​ວ່າ ປະຊາຊົນ​ເຢ​ແມນ​ໃນ​ປະລິມານ​ຫຼາຍ ພວມ​ຄ່ອຍໆ​ເສຍ​ຊີວິດ​ໄປ ຢູ່​ໃນ​ເງື່ອນໄຂ​ການ​ດຳລົງ​ຊີວິດ​ທີ່​ຫຍຸ້ງຍາກ​ເປັນ​ຢ່າງ​ຍິ່ງ ຍ້ອນ​ຂາດແຄນ​ສະບຽງ​ອາຫານ.  ໃນ​ຂະນະ​ດຽວ​ກັນ ທ່ານ​ກໍ​ໄດ້​ແຈ້ງ​ເຕືອນ​ວ່າ “ບໍ່​ມີ​ສັນຕິພາບ ພວກ​ເຮົາ​ຈະ​ຕ້ອງ​ປະ​ເຊີນ​ກັບ ສະພາບ​ທີ່​ຂີ້ຮ້າຍ​ກວ່າ​ຫຼາຍ ເມື່ອ​ທຽບໃສ່​ໃນ​ປັດຈຸບັນ.”

    ກ່ອນ​ໜ້າ​ນັ້ນ ເມື່ອ​ວັນ​ທີ 14 ທັນວາ​ທີ່​ຜ່ານ​ມາ ຝ່າຍ​ຕ່າງໆ​ທີ່​ເຂົ້າ​ຮ່ວມ​ການ​ສູ້​ຮົບ​ຢູ່​ໃນ​ເຢ​ແມນ ໄດ້​ບັນລຸ​ຂໍ້​ຕົກລົງ​ຢຸດ​ຍິງ ພາຍ​ໃຕ້​ການ​ອຸປະຖຳ​ຂອງ ​ສປຊ. ໃນ​ນັ້ນ ຝ່າຍ​ລັດຖະບານ​ເຢ​ແມນ ແລະ​ກຸ່ມ​ມື​ປືນ ຮູ​ຕີ ໄດ້​ເຫັນ​ດີ​ເປັນ​ເອກະສັນ​ກັນ ກ່ຽວ​ກັບ​ການ​ແລກປ່ຽນ​ທະຫານ​ທີ່​ເປັນ​ນັກໂທດ ພ້ອມ​ທັງ​ກັບ​ມາ​ເຊື່ອມ​ຕໍ່​ການ​ສົ່ງ​ອອກ​ນ້ຳມັນ ແລະ​ແກ​​ັສ ເປີດ​ສະໜາມ​ບິນ​ໃນ​ນະຄອນຫຼວງ​ຊາ​ນາ ແລະ​ທີ່​ສຳຄັນ​ທີ່​ສຸດ ກໍ​ແມ່ນ​ຝ່າຍ​ຕ່າງໆ​ທີ່​ເຂົ້າ​ຮ່ວມ​ການ​ພິພາດ​ຢູ່​ໃນ​ເຢ​ແມນ ບັນລຸ​ຂໍ້​ຕົກລົງ​ຢຸດ​ຍິງ ຢູ່​ໃນ​ນະຄອນ​ທ່າ ໂຮ​ເດ​ດາ ຊຶ່ງ​ເປັນ​ສະຖານທີ່​ຍຸດ​ທະ​ສາດ ໃກ້​ກັບ​ທະເລ​ແດງ ທີ່​ຄວບ​ຄຸມ​ໂດຍ ກອງ​ກຳລັງ​ຮູ​ຕີ. ສອງ​ຝ່າຍ​ຍັງ​ໄດ້​ເຫັນ​ດີ​ເປັນ​ເອກະສັນ​ກັນ ທີ່​ຈະ​ດຳເນີນ​ການ​ເຈລະຈາ​ຕື່ມ​ອີກ​ໃນ​ທ້າຍ ເດືອນ​ມັງກອນ ປີ 2019 ເພື່ອ​ນຳ​ເອົາ​ຂອບ​ການ​ເຈລະຈາ ກ້າວ​ໄປ​ສູ່​ການ​ສ້າງ​ຂໍ້​ຕົກລົງ ສັນຕິພາບ​ຮອບດ້ານ.

    ເຖິງ​ຢ່າງໃດ​ກໍ​ຕາມ ພຽງ 2 ວັນ ຫຼັງ​ຈາກ​ຂໍ້​ຕົກລົງ​ໄດ້​ຮັບ​ການ​ລົງ​ນາມ ກໍ​ເກີດ​ການ​ໂຈມ​ຕີ ທາງ​ອາກາດ ແລະ ​ການ​ຍິງ​ຕໍ່ສູ້​ຢ່າງ​ດຸເດືອດ ເຮັດ​ໃຫ້​ເກີດ​ແຮງ​ສັ່ນ​ສະເທືອນ ຢູ່​ໃນ​ເຂດ​ຊານເມືອງ ຂອງ​ນະຄອນ​ທ່າ ໂຮ​ເດ​ດາ. 

ຂ່າວທີ່ກ່ຽວຂ້ອງ