ຂ່າວຫຼ້າສຸດ

ເດັກນ້ອຍ​ເສຍ​ຊີວິດ 6 ຄົນ ຈາກ​ອັກຄີ​ໄພ​ຫຼາຍ​ລາຍ​ພາຍ​ໃນ​ມື້​ດຽວ​ຢູ່​ໃນ​ຣັດ​ເຊຍ

435 18 ທ.ວ. 2018 ຂ່າວຕ່າງປະເທດ
ເດັກນ້ອຍ​ເສຍ​ຊີວິດ 6 ຄົນ ຈາກ​ອັກຄີ​ໄພ​ຫຼາຍ​ລາຍ​ພາຍ​ໃນ​ມື້​ດຽວ​ຢູ່​ໃນ​ຣັດ​ເຊຍ

     ເຫດການ​ໄຟ​ໄໝ້ ໄດ້​ເກີດ​ຂຶ້ນ​ຢູ່​ໃນ​ບາງ​ທ້ອງຖິ່ນ​ຂອງ​ຣັດ​ເຊຍ ໃນ​ວັນ​ທີ 16 ທັນວາ​ນີ້ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ​ລວມ​ແລ້ວ 10 ຄົນ ໃນ​ນັ້ນ​ມີ​ເດັກນ້ອຍ​ລວມ​ຢູ່​ນຳ 6 ຄົນ.

    ສຳນັກ​ຂ່າວສານ RIA Novosti ລາຍ​ງານ​ວ່າ ເຫດການ​ໄຟ​ໄໝ້ ທີ່​ເກີດ​ຂຶ້ນ​ຢູ່​ໃນ​ບ້ານ ແຫ່ງ​ໜຶ່ງ ໃນ​ເຂດ ບາ​​ສ​ໂກ​ໂຕ​​ສ​ຕານ (ທິດໃຕ້​ຂອງ​ສາຍພູ​ອູ​ຣານ) ເຮັດ​ໃຫ້​ເດັກນ້ອຍ ໃນ​ໄວ​ແຕ່ 2 - 4 ປີ ເສຍ​ຊີວິດ 3 ຄົນ ຢູ່​ໃນ​ເຮືອນ​ຫຼັງ​ໜຶ່ງ ທີ່​ບໍ່​ມີ​ຜູ້​ໃຫຍ່​ດູ​ແລ​ໃນ​ເວລາ​ທີ່​ເກີດ​ເຫດ.

   ໃນ​ຂະນະ​ດຽວ​ກັນ ສຳນັກ​ຂ່າວສານ Interfax ລາຍ​ງານ​ວ່າ ມີ​ເດັກນ້ອຍ​ເສຍ​ຊີວິດ 2 ຄົນ ຢູ່​ໃນ​ເຫດການ​ໄຟ​ໄໝ້​ເຮືອນ​ຂອງ​ພວກ​ເຂົາ ຢູ່​ໃນ​ບ້ານ ກຣາ​​ສ​ນີ ກູດ ໃນ​ເຂດ ຊາ​ຣາ​ຕອບ.

   ໃນ​ວັນ​ດຽວ​ກັນ ກະຊວງ​ພາວະ​ສຸກ​ເສີນ ໃນ​ສາທາລະນະ​ລັດ ຕາ​ຕາ​​ຣສ​ຖານ ທີ່​ຂຶ້ນ​ກັບ​ຣັດ​ເຊຍ ແຈ້ງ​ໃຫ້​ຮູ້​ວ່າ ໄດ້​ເກີດ​ເຫດການ​ໄຟ​ໄໝ້ ຢູ່​ໃນ​ເຮືອນ​ຫຼັງ​ໜຶ່ງ ໃນ​ນະຄອນ ກາ​ຊານ ເປັນ​ເຫດ​ໃຫ້​ມີ ຜູ້​ເສຍ​ຊີວິດ 3 ຄົນ ໃນ​ນັ້ນ​ມີ​ເດັກນ້ອຍ​ລວມ​ຢູ່​ນຳ 1 ຄົນ. ເຫດການ​ໄຟ​ໄໝ້​ອີກ​ລາຍ​ໜຶ່ງ ກໍ​ໄດ້​ເກີດ​ຂຶ້ນ​ຢູ່​ໃນ​ເຂດ​ເຮືອນ​ຫ້ອງ​ແຖວ​ແຫ່ງ​ໜຶ່ງ ຢູ່​ໃນ​ພື້ນ​ທີ່​ຊານເມືອງ​ນະຄອນ​ຫຼວງ​​ມົສ​ກູ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ 2 ຄົນ ແລະ ເດັກນ້ອຍ​ໄດ້​ຮັບ​ບາດເຈັບ 3 ຄົນ.

   ຢ້ອນ​ຄືນ​ຫຼັງ ເມື່ອ​ເດືອນ​ມີນາ ປີ 2018 ໄດ້​ເກີດ​ອັກຄີ​ໄພ​ຮ້າຍ​ແຮງ ຢູ່​ໃນ​ສູນ​ການ​ຄ້າ​ແຫ່ງ​ໜຶ່ງ ໃນ​ນະຄອນ ເກ​ເມ​ໂຣ​ໂວ ໃນ​ເຂດ​ຊີ​ເບຣີ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ 64 ຄົນ ໃນ​ນັ້ນ​ມີ​ເດັກນ້ອຍ ລວມ​ຢູ່​ນຳ 41 ຄົນ. 

ຂ່າວທີ່ກ່ຽວຂ້ອງ