ມຽນ​ມາ ຜັນ​ຂະຫຍາຍ​ການ​ອອກ​ວີ​ຊາ​ກັບ​ດ່ານ​ໃຫ້​ແກ່​ນັກ​ທ່ອງ​ທ່ຽວ​ອິນ​ເດຍ

348 19 ທ.ວ. 2018 ຂ່າວຕ່າງປະເທດ
ມຽນ​ມາ ຜັນ​ຂະຫຍາຍ​ການ​ອອກ​ວີ​ຊາ​ກັບ​ດ່ານ​ໃຫ້​ແກ່​ນັກ​ທ່ອງ​ທ່ຽວ​ອິນ​ເດຍ

    ຂໍ້​ມູນ​ຂ່າວສານ​ຈາກ​ໜັງສືພິມ Times of India ໃຫ້​ຮູ້​ວ່າ ມຽນ​ມາ​ໄດ້​ຕົກລົງ ອອກ​ວີ​ຊາ​ກັບ​ດ່ານ​ໃຫ້​ແກ່​ນັກ​ທ່ອງ​ທ່ຽວ​ອິນ​ເດຍ ໂດຍ​ເລີ່ມ​ມີ​ຜົນ​ບັງຄັບ​ໃຊ້​ນັບ​ແຕ່​ວັນ​ທີ 13 ທັນວາ​ນີ້​ເປັນຕົ້ນ​ໄປ.

    ຜູ້​ທີ່​ຖື​ໜັງສືຜ່ານແດນ (ປັດ​ສະ​ປໍ) ອິນ​ເດຍ ຈະ​ໄດ້​ຮັບ​ວີ​ຊາ​ກັບ​ດ່ານ ຢູ່​ໃນ​ສະໜາມ​ບິນ​ສາກົນ ຢາງ​ກຸງ ມັນ​ດາ​ເລ ແລະ ​ເນ​ປີ​ດໍ ໂດຍ​ມີຄ່າ​ທຳນຽມ​ຢູ່​ທີ່ 50 ໂດ​ລາ​ສະຫະລັດ.

     ມາດ​ຕະການ​ດັ່ງກ່າວ ຈະ​ເປັນ​ການ​ອະນຸຍາດ​ໃຫ້​ຊາວ​ອິນ​ເດຍ ເດີນທາງ​ໄປ​ຍັງ​ມຽນ​ມາ ໂດຍ​ທີ່​ບໍ່​ຕ້ອງ​ຂໍ​ວີ​ຊາ​ໄວ້​ກ່ອນ ຈາກ​ອົງການ​ຜູ້ຕາງໜ້າ​ດ້ານ​ການ​ທູດ​ຂອງ​ມຽນ​ມາ ຢູ່​ໃນ​ອິນ​ເດຍ ຫຼື​ເອກະສານ​ຂໍ​ວີ​ຊາ​ທາງ​ເອ​ເລັກ​ໂຕຣ​ນິກ.

     ໃນ​ຂະນະ​ດຽວ​ກັນ ໃນ​ຫຼາຍ​ເດືອນ​ທີ່​ຜ່ານ​ມາ ບາງ​ປະເທດ ໂດຍ​ສະເພາະ​ກໍ​ແມ່ນ​ບັນດາ​ປະເທດ​ໃນ​ເຂດ​ອ່າວ ໄດ້​ຜັນ​ຂະຫຍາຍ​ຫຼາຍ​ມາດ​ຕະການ ເພື່ອ​ດຶງ​ດູດ​ນັກ​ທ່ອງ​ທ່ຽວ​ຈາກ​ອິນ​ເດຍ. ສະຫະລັດ ອາ​ຣັບ ເອ​ມີ​ເຣດ (UAE) ອອກ​ວີ​ຊາ​ກັບ​ດ່ານ​ໃຫ້​ແກ່​ພົນລະເມືອງ​ອິນ​ເດຍ ທີ່​ໄດ້​ມີ​ວີ​ຊາ​ເຂົ້າ​ໄປ ສ ອາ​ເມ​ຣິ​ກາ ຢ່າງ​ຖືກຕ້ອງ​ຕາມ​ລະບຽບ​ການ.

    ຄ້າຍຄື​ກັນ​ນັ້ນ ໂອ​ມານ ກໍ​ອອກ​ວີ​ຊາ​ປະເພດ​ດັ່ງກ່າວ​ໃຫ້​ແກ່​ຊາວ​ອິນ​ເດຍ ທີ່​ອາ​ໃສ​ຢູ່​ໃນ ສ ອາ​ເມ​ຣິ​ກາ ຫຼື​ມີ​ວີ​ຊາ​ເຂົ້າ​ເມືອງ​ໄປ​ໃນ ສ ອາ​ເມ​ຣິ​ກາ ກາ​ນາ​ດາ ອົດ​ສະ​ຕຣາ​ລີ ອັງກິດ ຍີ່ປຸ່ນ ແລະ ບັນດາ​ປະເທດ​ໃນ​ເຂດ ເຊນ​ເກນ. ໃນ​ຂະນະ​ດຽວ​ກັນ ກາ​ຕາ ອະນຸຍາດ​ໃຫ້​ພົນລະເມືອງ​ອິນ​ເດຍ ແລະ ພົນລະເມືອງ​ອີກ 45 ປະເທດ ອາ​ໃສ​ຢູ່​ປະເທດ​ຕົນ​ໄດ້​ສູງ​ສຸດ 60 ວັນ ໂດຍ​ທີ່​ບໍ່​ຈຳເປັນ​ຂໍ​ວີ​ຊາ​ກ່ອນ.

 

ຂ່າວທີ່ກ່ຽວຂ້ອງ