ປະເທດແມ່ນ້ຳຂອງ-ແມ່ນ້ຳລ້ານຊ້າງ ແລກປ່ຽນສິລະປະ

259 19 ທ.ວ. 2018 ຂ່າວໜ້າ​ໜຶ່ງ

    ງານ​ບຸນ​ວັດ­ທະ­ນະ­ທຳ ແລະ ສິ­ລະ​ປະ​ຂອງ​ບັນ­ດາ​ປະ­ເທດ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ ຄັ້ງ​ທີ 8 “2018 Culture and Arts Festival of Countries in Lancang-Mekong River Basin” ໄດ້​ຈັດ​ຂຶ້ນ​ທີ່​ນະ­ຄອນ​ຊຽງ​ຮຸ່ງ ກິ່ງ​ແຂວງ​ສິບ​ສອງ​ພັນ​ນາ ສປ ຈີນ ວັນ​ທີ 12-14 ທັນ­ວາ 2018 ເປັນ​ປະ­ທານ​ກ່າວ​ເປີດ​ໂດຍ​ທ່ານ ເຈົ່າ ຢ່າ ຊິງ ຮອງ​ເຈົ້າ​ກິ່ງ​ແຂວງ​ສິບ​ສອງ​ພັນ​ນາ ມີ​ຜູ້​ແທນ​ຈາກ ຈີນ ກຳ­ປູ­ເຈຍ ລາວ ມຽນ​ມາ ໄທ ແລະ ຫວຽດ­ນາມ ເຂົ້າ​ຮ່ວມ.

    ງານ​ບຸນ​ດັ່ງ­ກ່າວ ແນ­ໃສ່​ເພີ່ມ​ທະ­ວີ​ການ​ຮ່ວມ​ມື​ແລກ­ປ່ຽນ​ສິ­ລະ​ປະ ວັດ­ທະ­ນະ­ທຳ ເຊິ່ງ​ກັນ ແລະ ກັນ ແຕ່​ລະ​ປະ­ເທດ​ໄດ້​ນຳ​ເອົາ​ລາຍ​ການ­ສະ­ແດງ​ສິ­ລະ​ປະ​ທີ່​ໂດດ​ເດັ່ນ​ຂອງ​ຕົນ ມາ​ຮ່ວມ​ການ­ສະ­ແດງ​ແລກ­ປ່ຽນ ສຳ­ລັບ​ລາວ​ເຮົາ​ມີ 3 ລາຍ​ການ­ສະ­ແດງ ຄື: ບົດ​ເພງ ຈຳ­ປາ​ເມືອງ​ລາວ ເປົ່າ​ແຄນ​ລາວ ແລະ ການ​ຮ້ອງ­ເພງ​ລວມ​ໝູ່​ນຳ​ນັກ​ສິ­ລະ​ປິນ​ປະ­ເທດ​ລຸ່ມ​ແມ່­ນ້ຳ​ຂອງ.

    ນອກ​ນີ້ ພາຍ​ໃນ​ງານ​ຍັງ​ໄດ້​ວາງ­ສະ­ແດງ​ຮູບ​ພາບ​ຖ່າຍ ແລະ ຮູບ­ແຕ້ມ​ຫຼາຍ​ກວ່າ 2.000 ແຜ່ນ ຈາກ​ນັກ​ຖ່າຍ­ຮູບ​ຫຼາຍ​ກວ່າ 100 ຄົນ ທີ່​ສ່ອງ​ແສງ​ເຖິງ​ຄວາມ​ອຸ­ດົມ​ຮັ່ງ­ມີ​ທາງ​ດ້ານ​ທຳ​ມະ​ຊາດ ແລະ ການ​ດຳ­ລົງ​ຊີ­ວິດ​ຂອງ​ປະ­ຊາ­ຊົນ ທີ່​ອາ­ໄສ​ຢູ່​ລຸ່ມ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ​ແຫ່ງ​ນີ້.

    ລັດ­ຖະ­ບານ​ລາວ ໄດ້​ເປີດ​ບັ້ນ​ໂຄ­ສະ­ນາ​ການ­ທ່ອງ­ທ່ຽວ​ລາວ ແລະ ໄດ້​ກຳ­ນົດ​ປີ​ທ່ອງ​ທ່ຽວ​ລາວ 2018 ຈຳ­ນວນ​ນັກ​ທ່ອງ​ທ່ຽວ​ຈີນ ເຂົ້າ​ມາ​ທ່ຽວ​ລາວ ໄດ້​ເພີ່ມ​ຂຶ້ນ​ຢ່າງ​ຕໍ່​ເນື່ອງ ປີ 2017 ນັກ​ທ່ອງ​ທ່ຽວ​ຈີນ​ເຂົ້າ​ມາ​ທ່ຽວ​ລາວ​ຫຼາຍ​ກວ່າ 6 ແສນ​ຄົນ ໃນ 9 ເດືອນ ປີ 2018 ມີ​ເຖິງ 6 ແສນ​ຄົນ ເພີ່ມ​ຂຶ້ນ 35% ທຽບ­ໃສ່​ໄລ­ຍະ​ເວ­ລາ​ດຽວ​ກັນ​ຂອງ​ປີ 2017 ສຳ­ລັບ​ປີ 2019 ຈະ​ກຳ­ນົດ​ເປັນ​ປີ​ທ່ອງ​ທ່ຽວ ລາວ-ຈີນ ເຫັນ​ວ່າ​ຫຼາຍ​ກິດ­ຈະ­ກຳ​ຈະ​ຈັດ​ຕັ້ງ​ປະ­ຕິ­ບັດ​ຢູ່​ລາວ ແລະ ຢູ່​ຈີນ ແນ­ໃສ່​ເຮັດ​ໃຫ້­ການ​ໄປ­ມາ­ຫາ­ສູ່​ກັນ​ຫຼາຍ​ຂຶ້ນ ແລະ ນັກ​ທ່ອງ​ທ່ຽວ​ປະ­ເທດ​ທີ 3 ໄປ​ທ່ຽວ​ລາວ ແລະ ຈີນ ເຊິ່ງ​ລາວ​ເຮົາ​ມີ​ຄວາມ​ຄາດ​ຫວັງ​ວ່າ​ຈະ​ຕ້ອນ­ຮັບ​ນັກ​ທ່ອງ​ທ່ຽວ​ຈີນ​ຫຼາຍ​ກວ່າ 1 ລ້ານ​ຄົນ​ໃນ​ປີ 2019.

ຂ່າວທີ່ກ່ຽວຂ້ອງ