ໂຮງໝໍແຂວງຢຸນນານ ຊ່ວຍຜ່າຕັດແກ່ນຕາຂຸ້ນໂດຍບໍ່ເສຍຄ່າ

399 19 ທ.ວ. 2018 ຂ່າວໜ້າ​ໜຶ່ງ
ໂຮງໝໍແຂວງຢຸນນານ ຊ່ວຍຜ່າຕັດແກ່ນຕາຂຸ້ນໂດຍບໍ່ເສຍຄ່າ

    ໂຮງ­ໝໍ​ປະ­ຊາ­ຊົນ​ເລກ 2 ແຂວງ​ຢຸນ​ນານ ສປ ຈີນ ຮ່ວມ​ກັບ​ສູນ​ປິ່ນ­ປົວ ແລະ ຮັກ­ສາ​ສຸ­ຂະ­ພາບ​ຕາ ກະ­ຊວງ​ສາ­ທາ­ລະ­ນະ​ສຸກ ໄດ້​ເປີດ​ບໍ​ລິ​ການ­ຜ່າ­ຕັດ​ແກ່ນ​ຕາ​ຂຸ້ນ ໂດຍ​ບໍ່​ໄດ້​ເສຍ​ຄ່າ ຂຶ້ນ​ວັນ​ທີ 17-21 ທັນ­ວາ 2018 ທີ່​ສູນ​ປິ່ນ­ປົວ ແລະ ຮັກ­ສາ​ສຸ­ຂະ­ພາບ​ຕາ ທົ່ງ​ປົ່ງ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ມີ​ທ່ານ ບຸນ​ໜັກ ໄຊ­ຊະ­ນະ​ສົງ­ຄາມ ຫົວ­ໜ້າ​ກົມ​ປິ່ນ­ປົວ ແລະ ຟື້ນ​ຟູ​ໜ້າ­ທີ່​ການ ກະ­ຊວງ​ສາ­ທາ­ລະ­ນະ​ສຸກ ທ່ານ​ນາງ ຟານ ຊິນ ຮອງ​ອຳ­ນວຍ​ການ​ໂຮງ­ໝໍ​ປະ­ຊາ­ຊົນ​ເລກ 2 ແຂວງ​ຢຸນ​ນານ ພ້ອມ​ດ້ວຍ​ຄະ­ນະ​ພະ­ນັກ­ງານ​ວິ­ຊາ​ການ 2 ຝ່າຍ​ເຂົ້າ​ຮ່ວມ.

    ທ່ານ ສີ​ເພັດ​ທະ​ວົງ ສີ​ສະ­ເຫຼີມ​ສັກ ຮອງ​ອຳ­ນວຍ​ການ​ສູນ​ປິ່ນ­ປົວ ແລະ ຮັກ­ສາ​ສຸ­ຂະ­ພາບ​ຕາ ກ່າວ​ວ່າ: ຕາງ­ໜ້າ​ຄະ­ນະ​ອຳ­ນວຍ​ການ​ສູນ ພ້ອມ​ທັງ​ແພດ​ພະ­ຍາ­ບານ​ຕາ ຕະ­ຫຼອດ​ເຖິງ​ປະ­ຊາ­ຊົນ​ບັນ­ດາ­ເຜົ່າ​ສະ­ແດງ​ຄວາມ​ຍິນ​ດີ ແລະ ຕ້ອນ­ຮັບ​ຢ່າງ​ອົບ​ອຸ່ນ ຕໍ່​ຄະ­ນະ​ທີມ​ງານ​ແພດ​ພະ­ຍາ­ບານ​ຈາກ​ໂຮງ­ໝໍ​ປະ­ຊາ­ຊົນ​ເລກ 2 ແຂວງ​ຢຸນ​ນານ ທີ່​ມີ​ຈິດ­ໃຈ​ອັນ​ສູງ​ສົ່ງ​ນຳ​ເອົາ​ວັດ­ຖຸ-ອຸ­ປະ­ກອນ​ການ​ແພດ​ເຂົ້າ​ມາ​ຊ່ວຍ­ເຫຼືອ ຜ່າ­ຕັດ​ພະ­ຍາດ​ແກ່ນ​ຕາ​ຂຸ້ນ​ໂດຍ​ບໍ່​ເສຍ​ຄ່າ ໃຫ້​ປະ­ຊາ­ຊົນ​ລາວ​ຜູ້​ທີ່​ມີ​ບັນ­ຫາ​ເລື່ອງ​ສາຍ­ຕາ​ພິ­ການ ແລະ ເປັນ​ໂຄງ­ການ​ໜຶ່ງ​ທີ່​ມີ​ປະ​ສິດ­ທິ​ຜົນ​ດີ ທີ່​ນຳ​ເອົາ​ແສງ​ສະ­ຫວ່າງ​ຄືນ​ມາ​ໃຫ້​ເຂົາ­ເຈົ້າ​ເຫຼົ່າ­ນັ້ນ​ກັບ​ມາ​ມີ​ຊີ­ວິດ​ໃໝ່ ແລະ ໄດ້​ໃຫ້​ເຂົາ­ເຈົ້າ​ເຫຼົ່າ­ນັ້ນ ໄດ້​ໃຊ້​ຊີ­ວິດ​ທີ່​ດີ​ໃນ​ການ​ທຳ​ມາ​ຫາ​ກິນ ແລະ ປະ­ກອບ­ສ່ວນ​ເຂົ້າ​ໃນ​ການ​ສ້າງ­ສາ​ປະ­ເທດ​ຊາດ.

    ໃນ​ໂອ­ກາດ​ນີ້ ໂຮງ­ໝໍ​ປະ­ຊາ­ຊົນ​ເລກ 2 ແຂວງ​ຢຸນ​ນານ ຍັງ​ໄດ້​ນຳ​ເອົາ​ອຸ­ປະ­ກອນ​ການ​ແພດ ແລະ ຢາ​ຈຳ­ນວນ​ໜຶ່ງ ມູນ​ຄ່າ 678.391 ຢວນ ຫຼື ປະ­ມານ 839,66 ລ້ານ​ກີບ ມອບ​ໃຫ້​ສູນ​ປິ່ນ­ປົວ ແລະ ຮັກ­ສາ​ສຸ­ຂະ­ພາບ​ຕາ ເພື່ອ​ນຳ​ໃຊ້​ເຂົ້າ​ໃນ​ວຽກ​ງານ​ດັ່ງ­ກ່າວ ກ່າວ​ມອບ​ໂດຍ​ທ່ານ ໂຢ ມຸງ­ຄຸນ ຫົວ­ໜ້າ​ຫ້ອງ­ການ ພະ​ແນກ​ສາ​ທາ ແຂວງ​ຢຸນ​ນານ ແລະ ກ່າວ​ຮັບ​ໂດຍ​ທ່ານ ສີ​ເພັດ​ທະ​ວົງ ສີ​ສະ­ເຫຼີມ​ສັກ.

ຂ່າວທີ່ກ່ຽວຂ້ອງ