ຂ່າວຫຼ້າສຸດ

ສື່ມວນຊົນລາວ ຮຽນຮູ້ທັກສະການຂຽນຂ່າວກ່ຽວກັບມໍລະດົກ

421 19 ທ.ວ. 2018 ຂ່າວໜ້າ​ໜຶ່ງ
ສື່ມວນຊົນລາວ ຮຽນຮູ້ທັກສະການຂຽນຂ່າວກ່ຽວກັບມໍລະດົກ

    ກະ­ຊວງ​ຖະ­ແຫຼງ​ຂ່າວ ແລະ ສື່­ສານ​ຫວຽດ­ນາມ ໄດ້​ຈັດ​ເຝີກ​ອົບ­ຮົມ​ທັກ​ສະ­ການ​ຂຽນ​ຂ່າວ​ກ່ຽວ​ກັບ​ມໍ­ລະ­ດົກ ໃຫ້​ແກ່​ສື່​ມວນ​ຊົນ​ລາວ ຂຶ້ນ​ວັນ​ທີ 17-18 ທັນ­ວາ 2018 ທີ່​ຮ່າ​ໂນ້ຍ ສສ ຫວຽດ­ນາມ ມີ​ທ່ານ ຫງວ​ຽນ ທ໋າຍ ທຽນ ຮອງ​ຫົວ­ໜ້າ​ກົມ​ສື່​ມວນ​ຊົນ ກະ­ຊວງ​ຖະ­ແຫຼງ​ຂ່າວ ແລະ ສື່­ສານ​ຫວຽດ­ນາມ ທ່ານ ອິນ​ປອນ ນະ­ຄອນ​ສີ ຮອງ​ຫົວ­ໜ້າ​ກົມ​ສື່​ມວນ​ຊົນ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ບັນ­ດາ​ສື່​ມວນ​ຊົນ​ລາວ​ຈາກ​ສື່​ເອ​ເລັກ​ໂຕຣ​ນິກ ແລະ ສື່​ສິ່ງ​ພິມ​ເຂົ້າ​ຮ່ວມ.

    ສຳ­ລັບ​ການ​ເຝີກ​ອົບ­ຮົມ​ຄັ້ງ​ນີ້ ສື່​ມວນ​ຊົນ​ລາວ ຈະ​ໄດ້​ຮັບ​ຟັງ​ການ​ສະ­ເໜີ​ກ່ຽວ​ກັບ​ຄວາມ​ໝາຍ​ສຳ­ຄັນ ແລະ ຄວາມ​ເປັນ​ມາ​ຂອງ​ວຽກ​ງານ​ອົງ­ການ​ອຸຍ​ເນັສ​ໂກ (UNESCO) ສັນ­ຍະ­ລັກ ນາມ­ມະ­ຍົດ ແລະ ບາງ​ເງື່ອນ­ໄຂ​ໃນ​ການ​ຂຽນ​ບົດ​ສະ­ເໜີ​ເອົາ​ນາມ­ມະ­ຍົດ​ເປັນ​ມໍ­ລະ­ດົກ​ໂລກ ການ​ສະ­ເໜີ​ແຫຼ່ງ​ທ່ອງ​ທ່ຽວ​ດ້ານ​ມໍ­ລະ­ດົກ​ໂລກ​ຂອງ​ຫວຽດ­ນາມ ພ້ອມ​ນັ້ນ​ຍັງ​ໄດ້​ແລກ­ປ່ຽນ​ຖອດ​ຖອນ​ບົດ­ຮຽນ​ກັບ​ວິ­ທະ­ຍາ­ກອນ​ທີ່​ມີ​ຄວາມ​ຮູ້ ແລະ ປະ­ສົບ​ການ​ໃນ​ດ້ານ​ທັກ​ສະ­ການ​ຂຽນ​ຂ່າວ​ຈາກ​ຫວຽດ­ນາມ ແລະ ບັນ­ຫາ​ອື່ນໆ ທີ່​ຕິດ​ພັນ​ກັບ​ວຽກ​ງານ​ການ​ປົກ​ປັກ​ຮັກ­ສາ ແລະ ຄຸ້ມ​ຄອງ​ມໍ­ລະ­ດົກ​ທາງ​ດ້ານ​ປະ­ຫວັດ­ສາດ ວັດ­ທະ­ນະ­ທຳ ແລະ ທຳ​ມະ​ຊາດ​ຂອງ​ຫວຽດ­ນາມ.

    ໃນ​ໂອ­ກາດ​ການ­ເຄື່ອນ­ໄຫວ​ຢ້ຽມ­ຢາມ ແລະ ເຮັດ​ວຽກ​ຂອງ​ຄະ­ນະ​ສື່​ມວນ​ຊົນ​ລາວ​ໃນ​ວັນ​ທີ 16-26 ທັນ­ວາ 2018 ນອກ­ຈາກ​ເຂົ້າ​ຮ່ວມ​ເຝີກ​ອົບ­ຮົມ​ແລ້ວ ຍັງ​ໄດ້​ເຄື່ອນ​ໄຫວ​ຢ້ຽມ­ຢາມ​ສະ­ຖານ­ທີ່​ມໍ­ລະ­ດົກ​ທາງ​ດ້ານ​ວັດ­ທະ­ນະ­ທຳ ປະ­ຫວັດ­ສາດ ທຳ​ມະ​ຊາດ ແລະ ຢ້ຽມ­ຢາມ​ພື້ນ­ຖານ​ການ​ຜະ­ລິດ​ຢູ່​ນະ­ຄອນ­ຫຼວງ​ຮ່າ​ໂນຍ ແຂວງ​ກວາງ​ບິງ ແລະ ນະ­ຄອນ​ໂຮ່​ຈີ​ມີງ ຕື່ມ​ອີກ.

ຂ່າວທີ່ກ່ຽວຂ້ອງ