ຂ່າວຫຼ້າສຸດ

ສົນທິສັນຍາ INF ແມ່ນຫຍັງ ?

696 24 ທ.ວ. 2018 ນານາສາລະ

    INF ແມ່ນ​ຊື່​ຫຍໍ້​ຂອງ​ສົນ­ທິ­ສັນ­ຍາ Intermediate Range Nuclear Forces ເຊິ່ງ​ແມ່ນ​ສົນ­ທິ­ສັນ­ຍາ​ວ່າ​ດ້ວຍ​ການ​ກຳ­ຈັດ​ລູກ​ສອນ​ໄຟ​ຂະ­ໜາດ​ກາງ ແລະ ຂະ­ໜາດ​ໃກ້ ການ​ນຳ​ຂອງ​ສະ­ຫະ­ລັດ​ອາ​ເມ​ຣິ​ກາ ແລະ ການ​ນຳ​ອະ­ດີດ ສ ໂຊ​ວຽດ ໄດ້​ລົງ​ນາມ​ສົນ­ທິ­ສັນ­ຍາ INF ເມື່ອ​ວັນ​ທີ 8 ທັນ­ວາ 1987 ໃນ​ສັນ­ຍາ​ສອງ​ຝ່າຍ​ຕົກ­ລົງ​ກັນ ບໍ່​ຜະ­ລິດ ບໍ່​ທົດ​ລອງ ບໍ່​ຜັນ​ຂະ­ຫຍາຍ​ບັນ­ດາ​ລູກ ສອນ​ໄຟ​ນຳ​ວິ­ຖີ ແລະ ລູກ​ສອນ​ໄຟ​ເຄື່ອນ​ທີ່​ເທິງ​ໜ້າ­ດິນ ທັງ​ຂະ­ໜາດ​ກາງ ແລະ ຂະ­ໜາດ​ໃກ້ (ແຕ່ 500 ຫາ 5.500 ກິ­ໂລ­ແມັດ) ບໍ່​ວ່າ​ຈະ​ເປັນ​ອາ­ວຸດ​ນິວ​ເຄຼຍ ຫຼື ອາ­ວຸດ​ອື່ນ​ກໍ່​ຕາມ ຕາມ​ສົນ­ທິ­ສັນ­ຍາ​ດັ່ງ­ກ່າວ ເຖິງ​ປີ 1991 ມີ​ອາ­ວຸດ​ຕ້ອງ​ຫ້າມ​ດັ່ງ­ກ່າວ​ຖືກ​ນຳ­ໄປ​ທຳ­ລາຍ​ຫຼາຍ​ກວ່າ 2.700 ໜ່ວຍ.

    ອີງ​ຕາມ​ແຫຼ່ງ​ຂ່າວ​ຕ່າງ­ປະ­ເທດ ໃຫ້​ຮູ້​ວ່າ: ສົນ­ທິ­ສັນ­ຍາ INF ເປັນ​ເລື່ອງ​ກ່າວ​ຂານ​ທົ່ວ​ໂລກ ຍ້ອນ​ວ່າ​ໃນ​ວັນ​ທີ 20 ຕຸ­ລາ 2018 ປະ­ທາ­ນາ­ທິ­ບໍ­ດີ​ອາ​ເມ​ຣິ​ກາ ໂດ​ນານ ທຣຳ ຖະ­ແຫຼງ​ວ່າ ອາ​ເມ​ຣິ​ກາ​ຈະ​ຖອນ​ຕົວ​ອອກ​ຈາກ​ສົນ­ທິ­ສັນ­ຍາ​ນີ້ ໂດຍ​ໃຫ້​ເຫດ­ຜົນ​ວ່າ ຣັດ​ເຊຍ ບໍ່​ປະ­ຕິ­ບັດ​ຕາມ​ສົນ­ທິ­ສັນ­ຍາ​ດັ່ງ­ກ່າວ ໂດຍ​ໃຫ້​ເວ­ລາ 60 ວັນ ເລີ່ມ​ແຕ່​ວັນ​ທີ 1 ມັງ­ກອນ 2019 ໄປ.

    ເລື່ອງ​ມາ​ແດງ​ຂຶ້ນ​ຕື່ມ ເມື່ອ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ພອມ​ເພ​ໂອ ຂອງ​ອາ​ເມ​ຣິ​ກາ​ປະ­ກາດ​ໃນ​ກອງ​ປະ­ຊຸມ​ອົງ­ການ​ນາ​ໂຕ (North Atlantic Treaty Organization = NATO) ຢູ່​ແບນ​ຊິກ ໃນ​ວັນ​ທີ 5 ທັນ­ວາ 2018 ວ່າ: “ຈະ​ຍົກ­ເລີກ​ສົນ­ທິ­ສັນ­ຍາ INF ພາຍ​ໃນ 60 ວັນ ໂດຍ​ອ້າງ​ວ່າ ຣັດ​ເຊຍ ບໍ່​ປະ­ຕິ­ບັດ​ຕາມ​ສົນ­ທິ­ສັນ­ຍາ​ດັ່ງ­ກ່າວ ແລະ ຍັງ​ມີ​ອີກ​ຫຼາຍ​ປະ­ເທດ​ສົ່ງ­ເສີມ​ການ​ສ້າງ​ກອງ​ກຳ­ລັງ​ລູກ​ສອນ​ໄຟ​ນິວ​ເຄຼຍ”.

    ໃນ​ວັນ​ດຽວ​ກັນ ກະ­ຊວງ​ການ​ຕ່າງ­ປະ­ເທດ ຣັດ​ເຊຍ ກໍ່​ອອກ​ມາ​ຢືນ­ຢັນ​ວ່າ​ບໍ່​ເຄີຍ​ລະ­ເມີດ​ສົນ­ທິ­ສັນ­ຍາ​ປະ­ເພດ​ນີ້ ແລະ ບອກ​ວ່າ ອາ​ເມ​ຣິ​ກາ ບໍ່​ເຄີຍ​ມີ​ຫຼັກ​ຖານ​ໃດໆ​ຢືນ­ຢັນ​ວ່າ ຣັດ​ເຊຍ ລະ­ເມີດ​ສັນ­ຍາ INF ສ່ວນ​ຜູ້­ນຳ​ຣັດ​ເຊຍ ທ່ານ ວາ​ລາ​ດີ​ເມຍ ປູ​ຕິນ ເຕືອນ​ວ່າ: ຣັດ​ເຊຍ​ຈະ​ພັດ­ທະ­ນາ​ອາ­ວຸດ​ນິວ​ເຄຼຍ​ລູກ​ສອນ​ໄຟ​ຂະ­ໜາດ​ກາງ ເຊິ່ງ​ຖືກ​ສັ່ງ​ຫ້າມ​ໃນ​ສົນ­ທິ­ສັນ­ຍາ INF ໃນ​ຍຸກ​ສົງ­ຄາມ​ເຢັນ ຖ້າ​ຫາກ​ສະ­ຫະ­ລັດ​ອາ​ເມ​ຣິ​ກາ​ຖອນ​ໂຕ​ອອກ​ຈາກ​ສົນ­ທິ­ສັນ­ຍາ​ດັ່ງ­ກ່າວ.

    ທ່ານ​ກ່າວ​ຜ່ານ​ໂທລະ­ພາບ​ຂອງ​ຣັດ​ເຊຍ​ອີ​ກວ່າ: “ຂໍ້​ກ່າວ​ຫາ​ດັ່ງ­ກ່າວ​ເປັນ​ພຽງ​ຂໍ້​ອ້າງ​ໃຫ້​ສະ­ຫະ­ລັດ​ອາ​ເມ​ຣິ​ກາ​ຖອນ​ໂຕ​ອອກ​ຈາກ INF ໂດຍ​ຫຼາຍ​ປະ­ເທດ​ໄດ້​ພັດ­ທະ­ນາ​ອາ­ວຸດ​ທີ່​ຖືກ​ຫ້າມ​ນີ້​ແລ້ວ ແລະ ຕອນ​ນີ້​ເບິ່ງ​ຄື​ຫຸ້ນ​ສ່ວນ​ຊາວ​ອາ​ເມ​ຣິ​ກາ​ຂອງ​ເຮົາ ເຊື່ອ​ວ່າ​ສະ­ຖາ­ນະ​ການ​ປ່ຽນ​ໄປ​ຫຼາຍ ຈົນ​ພວກ​ເຂົາ​ຕ້ອງ​ມີ​ອາ­ວຸດ​ເຫຼົ່າ­ນັ້ນ​ເຊັ່ນ​ກັນ ເຮົາ​ຈະ​ຕອບ​ສະ­ໜອງ​ເລື່ອງ​ນີ້​ແບບ​ໃດ ? ຄຳ​ຕອບ​ງ່າຍໆ ກໍ່​ຄື ເຮົາ​ຈະ​ເຮັດ​ແບບ​ດຽວ​ກັນ”.

    ທົ່ວ​ໂລກ​ມີ​ຄວາມ​ວິ­ຕົກ​ກັງ­ວົນ​ຕໍ່​ຄຳ​ຖະ­ແຫຼງ ຂອງ​ສອງ​ປະ­ເທດ​ມະ­ຫາ​ອຳ­ນາດ​ດັ່ງ­ກ່າວ ແລະ ຖື​ເປັນ​ບາດ­ກ້າວ​ເດີນ​ໄປ​ສູ່​ອັນ­ຕະ­ລາຍ ໃນ​ການ​ແຂ່ງ­ຂັນ​ຜະ­ລິດ​ອາ­ວຸດ​ນິວ​ເຄຼຍ ເພາະ­ວ່າ INF ຄື​ຫຼັກ​ຄ້ຳ­ປະ­ກັນ​ຄວາມ​ໝັ້ນ­ຄົງ​ຂອງ​ໂລກ ຫາກ​ອາ​ເມ​ຣິ​ກາ​ຖອນ​ອອກ​ຈະ​ມີ​ຄວາມ​ສ່ຽງ​ຕາມ​ມາ ສະ­ນັ້ນ ທຸກ​ຝ່າຍ​ຕ້ອງ​ພະ­ຍາ­ຍາມ​ຜ່ອນ​ຄວາມ​ເຄັ່ງ​ຕຶງ​ລົງ ໂດຍ​ສະ­ເພາະ ອາ​ເມ​ຣິ​ກາ ແລະ ຣັດ​ເຊຍ.

    ເຫດ­ການ​ຄັ້ງ​ນີ້ ໄດ້​ເຮັດ​ໃຫ້​ບັນ­ຍາ­ກາດ​ຄວາມ​ບໍ່​ແນ່­ນອນ​ທາງ​ດ້ານ​ຄວາມ​ໝັ້ນ­ຄົງ ປົກ​ຄຸມ​ໄປ​ທົ່ວ​ໂລກ​ອີກ​ຄັ້ງ​ໜຶ່ງ.

ເລີດ ໄຊ­ຊະ­ນະ

ຂ່າວທີ່ກ່ຽວຂ້ອງ