ຂ່າວຫຼ້າສຸດ

ຫວນຄືນມູນເຊື້ອກີລາໂອແລມປິກລາວ ຄົບຮອບ 40 ປີ

216 25 ທ.ວ. 2018 ວົງຈອນກີລາ
ຫວນຄືນມູນເຊື້ອກີລາໂອແລມປິກລາວ ຄົບຮອບ 40 ປີ

    ພິ­ທີ​ເລົ່າ​ມູນ­ເຊື້ອ​ວັນ​ສ້າງ­ຕັ້ງ​ກີ­ລາ​ໂອ​ແລມ​ປິກ​ລາວ ຄົບ­ຮອບ 40 ປີ (25/12/1978-25/12/2018) ຈັດ​ຂຶ້ນ​ວັນ​ທີ 21 ທັນ­ວາ 2018 ທີ່​ຫ້ອງ​ປະ­ຊຸມ​ໃຫຍ່​ຄະ­ນະ​ກຳ­ມະ­ການ​ກີ­ລາ​ໂອ​ແລມ​ປິກ​ແຫ່ງ​ຊາດ​ລາວ (ຄອລ) ມີ​ທ່ານ ບົວ​ລານ ສິ­ລິ​ປັນ­ຍາ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ທັງ​ເປັນ​ຮອງ​ປະ­ທານ ຄອລ ທ່ານ ກະ­ເສມ ອິນ​ທະ­ລາ ຮອງ​ປະ­ທານ ຄອລ ມີ​ບັນ­ດາ​ພະ­ນັກ­ງານ​ຄູ-ອາ­ຈານ ໂຮງ­ຮຽນ​ພອນ​ສະ­ຫວັນ​ກີ­ລາ-ກາ​ຍະ​ກຳ ແລະ ນັກ­ຮຽນ​ມັດ­ທະ­ຍົມ​ສົມ­ບູນ​ອ້ອມ​ຂ້າງ​ເຂົ້າ​ຮ່ວມ.

    ທ່ານ ກະ­ເສມ ອິນ​ທະ­ລາ ກ່າວ​ວ່າ: ຄອລ ໄດ້​ຖືກ​ສ້າງ­ຕັ້ງ​ຂຶ້ນ​ໂດຍ​ການ​ເຫັນ​ດີ​ຂອງ​ການ​ນຳ​ພັກ-ລັດ ເຊິ່ງ​ໄດ້​ອອກ­ດຳ­ລັດ​ລົງ​ວັນ​ທີ 25 ທັນ­ວາ 1978 ໂດຍ​ການ​ລົງ​ລາຍ​ເຊັນ​ຂອງ​ທ່ານ ໜູ​ຮັກ ພູມ​ສະ­ຫວັນ ປະ­ທານ​ສະ­ພາ​ລັດ­ຖະ­ມົນ­ຕີ ແນວ­ໃດ​ກໍ່​ຕາມ ເພື່ອ​ເປັນ​ການ​ສະ­ໜັບ­ສະ­ໜູນ​ນະ­ຄອນ­ຫຼວງ​ມົດ​ສະ​ກູ ສະ​ພະ​ພາບ​ໂຊ​ວຽດ ທີ່​ໄດ້​ຮັບ​ກຽດ​ເປັນ​ເຈົ້າ­ພາບ​ຈັດ­ການ​ແຂ່ງ­ຂັນ​ກີ­ລາ​ໂອ​ແລມ​ປິກ ຄັ້ງ​ທີ 22 ປີ 1980 ຍ້ອນ​ວ່າ​ບັນ­ດາ​ປະ­ເທດ​ນາຍ­ທຶນ​ໄດ້​ຂວ້າມ​ບາດ​ຕໍ່​ສະ­ຫະ­ພາບ​ໂຊ​ວຽດ ໂດຍ​ບໍ່​ສົ່ງ​ນັກ­ກີ­ລາ​ໃນ​ນາມ​ປະ­ເທດ​ເຂົ້າ​ຮ່ວມ​ກີ­ລາ​ໂອ​ແລມ​ປິກ​ຄັ້ງ​ນັ້ນ ໃນ​ເມື່ອ​ໄດ້​ສ້າງ­ຕັ້ງ ຄອລ ແລ້ວ​ຕ້ອງ​ໄດ້​ຂໍ​ເປັນ​ສະ­ມາ­ຊິກ​ກັບ​ຄະ­ນະ​ກຳ­ມະ­ການ​ໂອ​ແລມ​ປິກ​ສາ­ກົນ (IOC) ເພື່ອ​ມີ​ສິດ​ຈັດ​ສົ່ງ​ນັກ­ກີ­ລາ​ເຂົ້າ​ຮ່ວມ​ແຂ່ງ­ຂັນ​ກີ­ລາ​ໂອ​ແລມ​ປິກ​ໃນ​ຄັ້ງ​ນັ້ນ.

    ເພື່ອ​ໃຫ້​ສອດ­ຄ່ອງ​ກັບ​ລະ­ບຽບ ແລະ ຫຼັກ­ການ​ຂອງ IOC ສປປ ລາວ ຕ້ອງ​ໄດ້​ຟື້ນ​ຟູ ແລະ ສ້າງ­ຕັ້ງ​ສະ­ຫະ­ພັນ​ກີ­ລາ​ແຫ່ງ​ຊາດ​ເຂົ້າ​ເປັນ​ສະ­ມາ­ຊິກ​ຂອງ IOC ໃນ​ຄັ້ງ​ນັ້ນ ດັ່ງ­ນັ້ນ ສປປ ລາວ ໄດ້​ຟື້ນ​ຟູ 7 ສະ­ຫະ­ພັນ​ກີ­ລາ​ແຫ່ງ​ຊາດ​ໃຫ້​ເປັນ​ສະ­ມາ­ຊິກ​ຂອງ IOC ແລະ ຖືກ​ຮັບ­ຮອງ​ໃຫ້​ເປັນ​ສະ­ມາ­ຊິກ​ສົມ­ບູນ ໃນ​ປີ 1979 ຈາກ​ນັ້ນ​ຄະ­ນະ​ກຳ­ມະ­ການ ຊຸດ​ທີ I ໄດ້​ກະ­ກຽມ​ນັກ­ກີ­ລາ 3 ປະ­ເພດ ເພື່ອ​ເຂົ້າ​ຮ່ວມ​ແຂ່ງ­ຂັນ​ກີ­ລາ​ໂອ​ແລມ​ປິກ ຄັ້ງ​ທີ 22 ໂດຍ​ໄດ້​ຮັບ​ການ​ຊ່ວຍ­ເຫຼືອ​ຈາກ​ປະ­ເທດ​ເຈົ້າ­ພາບ ຮັບ​ເອົາ​ນັກ­ກີ­ລາ​ລາວ​ເຂົ້າ​ສູນ​ເຝິກ­ຊ້ອມ​ຢູ່​ນະ­ຄອນ­ຫຼວງ​ມົດ​ສະ​ກູ ເປັນ​ເວ­ລາ 3 ເດືອນ ໃນ​ປີ 1980 ແລະ ໄດ້​ເລີ່ມ​ເຂົ້າ​ຮ່ວມ​ການ​ແຂ່ງ­ຂັນ​ກີ­ລາ​ໂອ​ແລມ​ປິກ​ນັບ​ແຕ່​ປີ 1980 ເປັນ­ຕົ້ນ​ມາ​ຈົນ​ເຖິງ​ປັດ­ຈຸ­ບັນ.

ຂ່າວທີ່ກ່ຽວຂ້ອງ