ຂ່າວຫຼ້າສຸດ

ຣຽວມາດຣິດ ສ້າງສະຖິຕິໄດ້ແຊັມສະໂມສອນໂລກ ສູງສຸດ 4 ສະໄໝ

215 26 ທ.ວ. 2018 ວົງຈອນກີລາ

    ການ​ແຂ່ງ­ຂັນ​ເຕະ­ບານ​ຊີງ​ແຊັມ​ສະ­ໂມ­ສອນ​ໂລກ (FIFA Club World Cup) ປະ­ຈຳ​ປີ 2018 ຢູ່​ສະ­ຫະ­ລັດ​ອາ​ຣັບ​ເອ​ມີ​ເຣ​ສ (UAE) ວັນ​ທີ 12-22 ທັນ­ວາ 2018 ປິດ​ສາກ​ລົງ​ເປັນ​ທີ່​ຮຽບ​ຮ້ອຍ ໂດຍ ຣຽວ ມາດ​ຣິດ ແຊັມ​ເອີ​ຣົບ ຢູ​ຟ້າ ແຊັມ​ປ້ຽນ​ລີກ ຈາກ​ແອັສ​ປາຍ ແຊັມ​ເກົ່າ​ລາຍ­ການ​ນີ້ 2 ສະ­ໄໝ​ຊ້ອນ ປ້ອງ​ກັນ​ແຊັມ​ກັບ ອາວ​ອາຍ ທີມ​ນ້ອງ​ໃໝ່​ຈາກ​ເຈົ້າ­ພາບ ແຊັມ​ລີກ​ສູງ​ສຸດ​ຂອງ UAE.

    ເກມ​ນີ້ ມາດ​ຣິດ ເໝືອ​ກວ່າ​ຢ່າງ​ຊັດ​ເຈນ ສ້າງ­ສັນ​ເກມ​ບຸກ​ໄດ້​ຢ່າງ​ຕື່ນ­ເຕັ້ນ ໂດຍ​ເຄິ່ງ​ເວ­ລາ​ທີ 1 ນຳ​ກ່ອນ 1-0 ຈາກ ລູ​ກ້າ​ໂມ​ດຣິກ ນັກ​ເຕະ​ດີ­ເດັ່ນ​ຂອງ​ໂລກ​ປະ­ຈຳ​ປີ 2018 ໃນ​ນາ­ທີ 14 ເຄິ່ງ​ຫຼັງ​ມາ​ໄດ້​ເພີ່ມ​ອີກ 3 ປະ­ຕູ​ຈາກ ມາ​ຣ​ໂກ້ ຢໍ​ເຣັນ​ເຕ້ ນາ­ທີ 60 ຫົວ­ໜ້າ​ທີມ ເຊີ​ຈີ​ໂອ ຣາມ​ອສ ນາ­ທີ 78 ແລະ ການ​ສະ­ກັດ​ເຂົ້າ​ປະ­ຕູ​ຕົນ​ເອງ​ຂອງ ຢາ​ເຣຍ ນາ​ເດີ ຂອງ​ທີມ​ເຈົ້າ­ພາບ ນາ­ທີ 90+1 ໂດຍ​ເຈົ້າ­ພາບ​ໄດ້​ປະ­ຕູ​ປອບ​ໃຈ​ຈາກ ຊິ​ໂອ​ຕາ​ນິ ກອງ​ຫຼັງ​ຊາວ​ຍີ່­ປຸ່ນ ນາ­ທີ 86.

    ຈົບ​ເກມ ຣຽວ​ມາດ​ຣິດ ຊະ­ນະ ອາວ​ອາຍ 4-1 ປະ­ຕູ ປ້ອງ​ກັນ​ແຊັມ​ໄດ້​ສຳ­ເລັດ ເປັນ​ທີມ​ທຳ​ອິດ​ທີ່​ໄດ້​ແຊມ​ລາຍ­ການ​ນີ້ 3 ສະ­ໄໝ​ຕິດ­ຕໍ່​ກັນ ແລະ ເປັນ​ແຊັມ​ລາຍ­ການ​ນີ້​ສູງ​ສຸດ 4 ສະ­ໄໝ ແຊງ​ບາ​ຣ​ເຊ​ໂລ​ນາ ທີ່​ໄດ້ 3 ສະ­ໄໝ ໂດຍ​ໄດ້​ຮັບ​ຂັນ​ແຊັມ ພ້ອມ​ເງິນ​ລາ­ງວັນ 5 ລ້ານ​ໂດ​ລາ​ສະ­ຫະ­ລັດ (ປະ­ມານ 42,91 ຕື້​ກີບ) ຂະ­ນະ​ທີ່ ແກ​ເຣັດ ເບວ ກອງ​ກາງ​ຣຽວ​ມາດ​ຣິດ ໄດ້​ລາ­ງວັນ​ນັກ​ເຕະ​ດີ­ເດັ່ນ MVP ຄັ້ງ​ນີ້ ສ່ວນ​ລາ­ງວັນ​ທີມ​ມາ­ລະ­ຍາດ​ດີ­ເດັ່ນ ກໍ່​ເປັນ​ຂອງ​ຣຽວ​ມາດ​ຣິດ.

    ສ່ວນ​ຄູ່​ຊີງ​ທີ 3 ຄາ​ຊີ​ມ້າ ອັດ​ເລີ ແຊັມ​ອາ­ຊີ ເອ​ເອ​ຟ​ຊີ ແຊັມ​ປ້ຽນ​ລີກ ຈາກ​ຍີ່­ປຸ່ນ ເສຍ​ໃຫ້ ຣີ​ເວີ​ເພລດ ແຊັມ​ອາ​ເມ​ຣິ​ກາ​ໃຕ້ ຈາກ​ອາກ​ຊັງ​ຕິນ 0-4.

ຂ່າວທີ່ກ່ຽວຂ້ອງ