ນັກກີລາຍົກນ້ຳໜັກ 5 ຄົນ ຖືກຢຶດຫຼຽນຫ້າມເຄື່ອນໄຫວ ຖານໃຊ້ສານກະຕຸ້ນ

164 27 ທ.ວ. 2018 ວົງຈອນກີລາ
ນັກກີລາຍົກນ້ຳໜັກ 5 ຄົນ ຖືກຢຶດຫຼຽນຫ້າມເຄື່ອນໄຫວ ຖານໃຊ້ສານກະຕຸ້ນ

    ສະຫະພັນ​ກີລາ​ຍົກ​ນ້ຳໜັກ​ສາກົນ (IWF) ເປີດເຜີຍ​ເມື່ອ​ບໍ່​ດົນ​ມາ​ນີ້ ກ່ຽວ​ກັບ​ຜົນ​ກວດ​ສອບ​ການ​ໃຊ້​ສານ​ກະ​ຕຸ້ນ​ຂອງ​ນັກກີລາ​ໃນ​ງານ​ກີລາ​ໂອ​ແລມ​ປິກ ຊີງ​ແຊ້ມ​ໂລກ ແລະ ລາຍການ​ໃຫຍ່ໆ​ລະດັບ​ສາກົນ ໂດຍ​ສະເພາະ ໃນ​ງານ​ໂອ​ແລມ​ປິກ​ເກມ 2012 ຢູ່​ລອນ​ດອນ ປະເທດ​ອັງກິດ ເຊິ່ງ​ພົບ​ວ່າ: ມີ​ນັກກີລາ​ຍົກ​ນ້ຳໜັກ​ລະດັບ​ໂອ​ແລມ​ປິກ ຈົງໃຈ​ໃຊ້​ສານ​ກະ​ຕຸ້ນ​ເອົາ​ປຽບ​ຄູ່​ແຂ່ງ ເຊິ່ງ​ປະກອບ​ມີ 5 ຄົນ​ຄື: Oleksiy Torocktiy ເຈົ້າ​ຂອງ​ຫຼຽນ​ຄຳ​ຮຸ່ນ​ນ້ຳໜັກ​ບໍ່​ເກີນ 105 ກິ​ໂລ ຊາວ​ອູ​ເກຣນ ອາຍຸ 32 ປີ ຖືກ​ຢຶດ​ຫຼຽນ​ຄືນ​ຮຽບ​ຮ້ອຍ Valentin Hristov ຊາວ​ອາ​ເຊີ​ໄບ​ຈັນ ອາຍຸ 24 ປີ ເຈົ້າ​ຂອງ​ຫຼຽນ​ທອງ ຮຸ່ນ​ນ້ຳໜັກ​ບໍ່​ເກີນ 56 ກິ​ໂລ ກໍ່​ຖືກ​ຢຶດ​ຫຼຽນ​ຄືນ​ເຊັ່ນ​ກັນ ລວມ​ທັງ​ຫຼຽນ​ທອງ ຊີງ​ແຊັມ​ໂລກ 2015 ຮຸ່ນ​ນ້ຳໜັກ​ບໍ່​ເກີນ 62 ກິ​ໂລ ແລະ ຫຼຽນ​ເງິນ ຊີງ​ແຊັມ​ເອີ​ຣົບ ຮຸ່ນ​ນ້ຳໜັກ​ບໍ່​ເກີນ 62 ກິ​ໂລ 2013.

    ຂະນະ​ທີ່ ​ຣັສລານ ນູ​ຣູ​ດີນັອຟ ຊາວ​ອຸດ​ສະ​ເບ​ກິດ​ສະຖານ ໄດ້​ທີ 4 ໂອ​ແລມ​ປິກ​ເກມ 2012 ຮຸ່ນ​ນ້ຳໜັກ​ບໍ່​ເກີນ 105 ກິ​ໂລ ເຈົ້າ​ຂອງ​ຫຼຽນ​ຄຳ ໂອ​ແລມ​ປິກ​ເກມ 2016 ຫຼຽນ​ຄຳ ແລະ ຫຼຽນ​ເງິນ ຊີງ​ແຊັມ​ໂລກ 2013 ແລະ 2014 ຫຼຽນ​ຄຳ ເອ​ຊຽນ​ເກມ 2018 ແລະ 2 ຫຼຽນ​ຄຳ ຊີງ​ແຊັມ​ອາຊີ 2012 ແລະ 2013 ຖືກ​ສັ່ງ​ຫ້າມ​ເຄື່ອນ​ໄຫວ​ທຸກ​ກິດຈະກຳ​ດ້ານ​ກີລາ​ຍົກ​ນ້ຳໜັກ ໂດຍ​ບໍ່​ມີ​ກຳນົດ ແລະ ລໍຖ້າ​ການ​ພິຈາລະນາ​ລົງໂທດ.

    ສ່ວນ Melanie Daluzyan ຊາວ​ອາກ​ເມ​ນີ ແລະ Mikalai Novikau ຊາວ​ເບ​ລາ​ຣຸ​​ສ ກໍ່​ຖືກ​ສັ່ງ​ຫ້າມ​ເຄື່ອນ​ໄຫວ​ທຸກ​ກິດຈະກຳ​ດ້ານ​ກີລາ​ຍົກ​ນ້ຳໜັກ ໂດຍ​ບໍ່​ມີ​ກຳນົດ ແລະ ລໍຖ້າ​ການ​ພິຈາລະນາ​ລົງໂທດ ປັດຈຸບັນ ຄະນະ​ກຳມະການ​ທີ່​ກ່ຽວຂ້ອງ​ກຳລັງ​ພິຈາລະນາ​ໃສ່​ບົດ​ລົງໂທດ ຄາດ​ວ່າ​ຈະ​ຖືກ​ສັ່ງ​ຫ້າມ​ເຂົ້າ​ຮ່ວມ​ໂອ​ແລມ​ປິກ ແລະ ປັບ​ໃໝ​ເງິນ​ຈຳນວນ​ໜຶ່ງ.

ຂ່າວທີ່ກ່ຽວຂ້ອງ