ກຽມຈັດງານວາງສະແດງ ຜະລິດຕະພັນເຟີນີເຈີໄມ້ລາວ ຄັ້ງທີ 5

394 04 ມ.ກ. 2019 ຂ່າວໜ້າ​ໜຶ່ງ

    ງານ​ວາງ­ສະ­ແດງ​ຜະ­ລິດ​ຕະ​ພັບ​ສິນ​ເຟີ​ນີ​ເຈີ​ໄມ້​ລາວ ຄັ້ງ​ທີ 5 ຈະ​ຈັດ​ຂຶ້ນ​ລະ­ຫວ່າງ​ວັນ​ທີ 12-20 ມັງ­ກອນ 2019 ຢູ່​ສູນ​ການ​ຄ້າ​ໄອ​ເຕັກ ນະ­ຄອນ­ຫຼວງ​ວຽງ​ຈັນ ປັດ­ຈຸ­ບັນ​ມີ​ຄວາມ​ພ້ອມ 100% ຂະ­ນະ​ທີ່​ຄາດ​ວ່າ​ຈະ​ຄຶກ­ຄັກ​ກວ່າ​ຄັ້ງ​ກ່ອນໆ.

    ທ່ານ ກອງ​ມາ­ລາ ພົມ­ມາ​ໄລ ຮອງ​ປະ­ທານ​ສະ­ມາ­ຄົມ​ເຟີ​ນີ​ເຈີ​ລາວ ຜູ້​ຊີ້​ນຳ​ການ​ຈັດ​ງານ​ວາງ­ສະ­ແດງ​ຜະ­ລິດ​ຕະ​ພັນ​ເຟີ​ນີ​ເຈີ​ໄມ້​ລາວ ຄັ້ງ​ທີ 5 ເປີດ­ເຜີຍ​ໂດຍ​ຄາດ​ວ່າ​ຈະ​ມີ​ມູນ​ຄ່າ​ຊື້-ຂາຍ​ປະ­ມານ 10 ຕື້​ກີບ ຈາກ​ຜູ້​ທີ່​ຈະ​ເຂົ້າ​ຊົມ 2 ແສນ​ຄົນ ທັງ​ນີ້ ເພື່ອ​ປະ­ຕິ­ບັດ​ຕາມ​ນະ­ໂຍ­ບາຍ​ສົ່ງ­ເສີມ​ການ​ຜະ­ລິດ​ເຄື່ອງ​ເຟີ​ນີ​ເຈີ​ໄມ້​ລາວ ທັງ​ເປັນ​ການ​ໂຄ­ສະ­ນາ​ເຜີຍ­ແຜ່​ໃຫ້​ສັງ­ຄົມ​ຮູ້​ຜະ­ລິດ​ຕະ​ພັນ​ເຟີ​ນີ​ເຈີ​ໄມ້​ລາວ​ຫຼາຍ​ຂຶ້ນ ລວມ​ທັງ​ໃຫ້​ຜູ້​ຜະ­ລິດ​ສາ­ມາດ​ເຂົ້າ​ຫາ​ຕະ­ຫຼາດ ແລະ ຈຳ­ໜ່າຍ​ສິນ­ຄ້າ​ໄດ້ ທັງ​ພາຍ​ໃນ ແລະ ຕ່າງ­ປະ­ເທດ ກ້າວ​ເຂົ້າ​ສູ່​ການ​ສ້າງ​ຕາ​ໜ່າງ​ກາ­ນວາງ­ສະ­ແດງ​ສິນ­ຄ້າ​ເຟີ​ນີ​ເຈີ​ກັບ​ພາກ​ພື້ນ ແລະ ສາ­ກົນ ໃນ​ອະ­ນາ­ຄົດ ພ້ອມ​ກັນ​ນັ້ນ ກໍ່​ເພື່ອ​ຜັນ​ຂະ­ຫຍາຍ​ເນື້ອ​ໃນ​ແຈ້ງ​ການ​ຄຳ​ສັ່ງ​ເລກ​ທີ 15/ນຍ ໃຫ້​ປາ­ກົດ​ຜົນ​ເປັນ​ຈິງ ເປັນ​ການ​ອະ­ນຸ​ຮັກ​ຮັກ­ສາ​ປ່າ­ໄມ້ ການ​ນຳ​ໃຊ້​ໃຫ້​ເກີດ​ປະ­ໂຫຍດ​ສູງ​ສຸດ ແລະ ມີ​ໄມ້​ໄວ້​ໃຊ້​ຢ່າງ​ຍືນ​ຍົງ ໂດຍ​ການ​ປຸງ​ແຕ່ງ​ໃຫ້​ເປັນ​ຜະ­ລິດ​ຕະ​ພັນ​ສຳ­ເລັດ​ຮູບ​ຈາກ​ໄມ້​ຫວາຍ ແລະ ໄມ້­ປ່ອງ ໃຫ້​ມີ​ຫຼາຍ​ຜະ­ລິດ​ຕະ​ພັນ​ຕາມ​ສັງ­ຄົມ​ຕ້ອງ­ການ ແລະ ເປັນ​ທີ່​ນິ­ຍົມ​ກັນ​ດ້ວຍ​ການ​ນຳ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະ­ໄໝ ທັງ​ເປັນ​ການ​ສ້າງ​ມູນ​ຄ່າ​ເພີ່ມ​ໃຫ້​ຜະ­ລິດ​ຕະ​ພັນ​ເຟີ​ນີ​ເຈີ​ໄມ້​ລາວ ໃຫ້​ກາຍ­ເປັນ​ສິນ­ຄ້າ​ທີ່​ມີ​ຄຸນ​ນະ​ພາບ ແລະ ລາ­ຄາ​ສູງ ກົງ​ຕາມ​ຄວາມ​ຕ້ອງ­ການ​ຂອງ​ລູກ​ຄ້າ ແລະ ຕະ­ຫຼາດ ເຮັດ​ໃຫ້​ສາ­ມາດ​ສົ່ງ​ອອກ​ຕ່າງ­ປະ­ເທດ​ໄດ້ ຂະ­ນະ​ດຽວ​ກັນ ຍັງ​ເປັນ​ການ​ສ້າງ​ວຽກ​ເຮັດ​ງານ​ທຳ​ໃຫ້​ປະ­ຊາ­ຊົນ​ບັນ­ດາ­ເຜົ່າ ຕ້ານ​ໄພ​ວ່າງ​ວຽກ ແລະ ຊ່ວຍ​ໃຫ້​ຫຼຸດ​ພົ້ນ​ຈາກ​ຄວາມ­ທຸກ​ຍາກ​ຕື່ມ​ອີກ​ໃນ​ອະ­ນາ­ຄົດ ສົ່ງ­ເສີມ ແລະ ສ້າງ​ຄວາມ​ເຂັ້ມ­ແຂງ​ສຳ­ລັບ​ສີ­ໄມ້­ລາຍ­ມື​ຂອງ​ຄົນ​ລາວ​ເຮົາ ແລະ ຫົວ­ໜ່ວຍ​ທຸ­ລະ​ກິດ​ເຟີ​ນີ​ເຈີ​ໄມ້​ລາວ​ໃຫ້​ຂະ­ຫຍາຍ­ຕົວ ສາ­ມາດ​ເຂົ້າ​ສູ່​ຕະ­ຫຼາດ​ພາກ​ພື້ນ ແລະ ສາ­ກົນ​ໄດ້​ໃນ​ອະ­ນາ­ຄົດ ສືບ­ຕໍ່​ຈາກ​ການ​ຈັດ​ງານ​ວາງ­ສະ­ແດງ​ສິນ­ຄ້າ ປີ 2018 ຜ່ານ​ມາ​ໃຫ້​ຕໍ່​ເນື່ອງ ແລະ ຍືນ​ຍົງ.

    ສຳ­ລັບ​ການ​ຈັບ­ຈອງ​ຫ້ອງ​ວາງ­ສະ­ແດງ​ທີ່​ມີ 175 ຫ້ອງ ທ່ານ ກອງ​ມາ­ລາ ພົມ­ມາ​ໄລ ກ່າວ​ວ່າ: ມາ​ຮອດ​ປັດ­ຈຸ­ບັນ ມີ​ຫົວ­ໜ່ວຍ​ທຸ­ລະ​ກິດ​ຈັບ­ຈອງ​ເຕັມ​ແລ້ວ ໂດຍ​ຫົວ­ໜ່ວຍ​ທຸ­ລະ​ກິດ ແລະ ໂຮງ­ງານ​ທີ່​ເຂົ້າ​ຮ່ວມ 72 ຫົວ­ໜ່ວຍ​ນັ້ນ ນະ­ຄອນ­ຫຼວງ​ວຽງ​ຈັນ ມີ 53 ຫົວ­ໜ່ວຍ ຕ່າງ​ແຂວງ 13 ຫົວ­ໜ່ວຍ ແລະ ປະ­ເທດ​ໄທ 6 ຫົວ­ໜ່ວຍ ນອກ​ນີ້ ຍັງ​ມີ​ຫົວ­ໜ່ວຍ​ທຸ­ລະ​ກິດ​ໂອ​ດ໊ອບ​ຈຳ­ນວນ​ໜຶ່ງ ເຊິ່ງ​ກິດ­ຈະ­ກຳ​ໃນ​ງານ​ມີ​ກາ­ນວາງ­ສະ­ແດງ​ຊື້-ຂາຍ​ສິນ­ຄ້າ ສາ­ທິດ​ການ​ຜະ­ລິດ​ເຄື່ອງ​ເຟີ​ນີ​ເຈີ​ໄມ້ ແລະ ແກະ­ສະ­ຫຼັກ​ໄມ້ ຈັບ​ສະ­ຫຼາກ​ຊີງ​ລາ­ງວັນ ສະ­ແດງ​ສິ­ລະ​ປະ ແລະ ອື່ນໆ.

ຂ່າວທີ່ກ່ຽວຂ້ອງ