ຂ່າວຫຼ້າສຸດ

ຍ້ອງຍໍຜົນງານນັກກີລາເຂົ້າຮ່ວມ ກີລາ ມ ອາຊຽນ

323 04 ມ.ກ. 2019 ວົງຈອນກີລາ
ຍ້ອງຍໍຜົນງານນັກກີລາເຂົ້າຮ່ວມ ກີລາ ມ ອາຊຽນ

    ພິ­ທີ​ຍ້ອງ­ຍໍ​ຊົມ­ເຊີຍ​ຜົນ­ສຳ­ເລັດ ໃນ​ການ​ເຂົ້າ​ຮ່ວມ​ງານ​ກີ­ລາ ມະ­ຫາ­ວິ­ທະ­ຍາ­ໄລ​ອາ​ຊຽນ (ມ ອາ​ຊຽນ) ຄັ້ງ​ທີ 19 ທີ່​ປະ­ເທດ​ມຽນ​ມາ ລະ­ຫວ່າງ​ວັນ​ທີ 10-19 ທັນ­ວາ 2018 ຈັດ​ຂຶ້ນ​ວັນ​ທີ 29 ທັນ­ວາ 2018 ທີ່​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ມຊ) ໂດຍ​ມີ​ທ່ານ ບົວ​ລານ ສິ­ລິ​ປັນ­ຍາ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ຜູ້​ຊີ້​ນຳ​ວຽກ​ງານ​ກີ­ລາ-ກາ​ຍະ​ກຳ ທ່ານ ຄຳ​ຜາຍ ສີ​ສະ­ຫວັນ ຮອງ​ລັດ­ຖະ­ມົນ­ຕີ​ກະ­ຊວງ ສສກ ຄະ­ນະ​ນຳ​ນັກ­ກີ­ລາ​ມະ­ຫາ­ວິ­ທະ­ຍາ­ໄລ​ລາວ ພ້ອມ​ດ້ວຍ​ປະ­ທານ​ສະ­ຫະ­ພັນ​ກີ­ລາ​ມະ­ຫາ­ວິ­ທະ­ຍາ­ໄລ​ລາວ ອະ­ທິ­ການ​ບໍ­ດີ ມຊ ຄະ­ນະ​ນຳ ຄູ​ເຝິກ ແລະ ນັກ­ກີ­ລາ ເຂົ້າ​ຮ່ວມ.

    ສຳ­ລັບ​ການ​ເຂົ້າ​ຮ່ວມ​ຄັ້ງ​ນີ້ ສະ­ຫະ­ພັນ​ກີ­ລາ​ມະ­ຫາ­ວິ­ທະ­ຍາ­ໄລ​ລາວ ສົ່ງ​ຄະ­ນະ​ນັກ­ກີ­ລາ​ເຂົ້າ​ຮ່ວມ​ທັງ​ໝົດ 150 ຄົນ ໃນ​ນັ້ນ ມີ​ນັກ­ກີ­ລາ 94 ຄົນ ຍິງ 22 ຄົນ ເຂົ້າ​ຮ່ວມ​ແຂ່ງ­ຂັນ 9 ປະ­ເພດ​ກີ­ລາ​ຄື: ໂວ​ວີ​ນາມ ເປ​ຕັງ ແລ່ນ-ລານ ຍິງ​ທະ­ນູ ວູ​ຊູ ກະ­ຕໍ້+ກະ­ຕໍ້​ຊິນ​ລອນ ດອກ​ປີກ​ໄກ່ ບານ­ເຕະ ແລະ ກ໊ອຟ ຜ່ານ​ການ​ແຂ່ງ­ຂັນ​ທີມ​ນັກ­ກີ­ລາ​ລາວ ສາ­ມາດ​ຍາດ​ມາ​ໄດ້ 7 ຫຼຽນ​ຄຳ 9 ຫຼຽນ​ເງິນ ແລະ 11 ຫຼຽນ​ທອງ ຖືກ​ຈັດ​ຢູ່​ອັນ​ດັບ​ທີ 6 ຂອງ​ຕາ­ຕະ­ລາງ​ສະ­ຫຼຸບ​ຫຼຽນ ຈາກ​ທັງ​ໝົດ 11 ປະ­ເທດ​ເຂົ້າ​ຮ່ວມ ສ່ວນ 7 ຫຼຽນ​ຄຳ ໄດ້​ຈາກ ໂວ​ວີ​ນາມ 2 ຫຼຽນ​ຄຳ 3 ຫຼຽນ​ເງິນ ແລະ 2 ຫຼຽນ​ທອງ ເປ​ຕັງ 2 ຫຼຽນ​ຄຳ 1 ຫຼຽນ​ເງິນ ແລະ 3 ຫຼຽນ​ທອງ ກະ­ຕໍ້+ກະ­ຕໍ້​ຊິນ​ລອນ 1 ຫຼຽນ​ຄຳ 3 ຫຼຽນ​ເງິນ ແລະ 1 ຫຼຽນ​ທອງ ວູ​ຊູ 1 ຫຼຽນ​ຄຳ 2 ຫຼຽນ​ເງິນ ແລະ ແລ່ນ-ລານ 1 ຫຼຽນ​ຄຳ 5 ຫຼຽນ​ທອງ.

    ໃນ​ພິ­ທີ​ກະ­ຊວງ ສສກ ກໍ່​ຄື ສະ­ຫະ­ພັນ​ກີ­ລາ​ມະ­ຫາ­ວິ­ທະ­ຍາ­ໄລ​ລາວ ໄດ້​ມອບ​ໃບ​ຍ້ອງ­ຍໍ​ຊົມ­ເຊີຍ​ໃຫ້​ແກ່​ບັນ­ດາ​ສະ­ຫະ­ພັນ​ກີ­ລາ ແລະ ນັກ­ກີ­ລາ​ແຕ່​ລະ​ປະ­ເພດ ທີ່​ໄດ້​ຮັບ​ຫຼຽນ​ລາ­ງວັນ​ຈາກ​ການ​ແຂ່ງ­ຂັນ​ຄັ້ງ​ນີ້ ອີກ​ດ້ວຍ.

ຂ່າວທີ່ກ່ຽວຂ້ອງ