ຂ່າວຫຼ້າສຸດ

ສຽງກະໂພກ

1.330 04 ມ.ກ. 2019 ນານາສາລະ

    ບັນ­ຍາ­ກາດ​ຕ້ອນ­ຮັບ​ປີ​ໃໝ່ 2019 ຕ່າງ​ກັບ​ຫຼາຍ​ປີ ກ່ອນ​ນັ້ນ​ແມ່ນ​ສຽງ​ຈູດ​ໝາກ​ກະ­ໂພກ ດອກ­ໄຟ ໃນ​ຄືນ​ວັນ​ທີ 31/12/2018 ແກ່­ຍາວ ແລະ ດັງ​ສະ­ໜັ່ນ​ຫວັ່ນ­ໄຫວ​ກວ່າ​ທຸກ​ປີ... ຫຼາຍ​ຄົນ​ໃຫ້​ຄຳ​ເຫັນ​ວ່າ ເສດ­ຖະ­ກິດ​ດີ​ວ່າ​ຊັ້ນ!.

    ເບິ່ງ​ອີກ​ໃນ​ແງ່​ໜຶ່ງ ຫຼາຍ​ຄົນ​ກັງ­ວົນ​ໃຈ ເພາະ​ມັນ​ເປັນ​ສຽງ​ລົບ​ກວນ​ຄົນ​ອື່ນ ໂດຍ​ສະ­ເພາະ​ແມ່ນ​ເດັກ­ນ້ອຍ ແລະ ຜູ້​ອາ­ຍຸ​ສູງ... ຕາມ​ທຳ​ມະ​ດາ ເຂົາ​ຈູດ​ໃນ​ເວ­ລາ​ປ່ຽນ​ຈາກ​ປີ​ເກົ່າ​ເປັນ​ປີ​ໃໝ່​ທໍ່​ນັ້ນ ໃຊ້​ເວ­ລາ​ດົນ​ສຸດ​ກໍ່​ປະ­ມານ 10-20 ນາ­ທີ ແຕ່​ປີ​ນີ້​ປາ­ກົດ​ວ່າ ບາງ​ບ້ານ... ບາງ​ບ່ອນ ເລີ່ມ​ຈູດ​ແຕ່ 21 ໂມງ ໄປ​ຈົນ​ຊອດ​ແຈ້ງ... ບໍ່​ທໍ່​ນັ້ນ ວັນ​ທີ 2 ມັງ­ກອນ 2019 ກໍ່​ຍັງ​ຈູດ​ຢູ່.

    ສຽງ​ແຕກ​ຂອງ​ມັນ​ດັງ​ແຮງ​ສ່ຳ​ໃດ? ສຳ­ລັບ​ຢູ່​ນະ­ຄອນ­ຫຼວງ​ວຽງ​ຈັນ ແມ່ນ​ຮູ້​ດີ ! ຜູ້​ຂຽນ​ເປີດ Face Book ເວ­ລາ 23 ໂມງ​ຂອງ​ຄືນ​ວັນ​ທີ 1/1/2019 ມີ​ຄົນ Post ລະ­ບາຍ​ອອກ​ໜ້າ Face Book ຫຼາຍ​ສົມ­ຄວນ​ເລື່ອງ​ນີ້! ຜູ້​ກະ­ທົບ​ແມ່ນ​ຜູ້​ມີ​ລູກ­ນ້ອຍ ແລະ ຜູ້​ອາ­ຍຸ​ສູງ​ໃນ​ຄວາມ​ອຸ­ປະ​ຖັມ.

    ແລ້ວ​ຊິ​ເຮັດ​ຈັ່ງ​ໃດ ? ຕໍ່­ໜ້າ​ນີ້​ແມ່ນ​ບຸນ­ປີ­ໃໝ່​ຂອງ​ພີ່­ນ້ອງ​ຈີນ+ຫວຽດ­ນາມ​ຕ່າງ​ດ້າວ ກໍ່​ຄື ນັກ­ທຸ­ລະ­ກິດ ພໍ່­ຄ້າ​ຊາວ​ຂາຍ​ຫຼາຍ​ແສນ​ຄົນ​ອາ­ໄສ​ຢູ່​ນະ­ຄອນ­ຫຼວງ​ວຽງ​ຈັນ ຊິ​ບໍ່​ຈູດ​ໝາກ​ກະ­ໂພກ ດອກ­ໄຟ​ຫຼາຍ​ກວ່າ​ປີ​ໃໝ່​ສາ­ກົນ​ບໍ ? ແລ້ວ​ເດັກ­ນ້ອຍ ຜູ້​ອາ­ຍຸ​ສູງ ຈະ​ຢູ່​ຢ່າງ­ໃດ ? ນີ້​ຄື​ບັນ­ຫາ​ທີ່​ຕັ້ງ​ຂຶ້ນ.

    ເວົ້າ​ເລື່ອງ​ສຽງ ກົດ­ໝາຍ ລະ­ບຽບ​ກໍ່​ອອກ​ມາ​ແລ້ວ ເຊັ່ນ: ສຽງ​ໃນ​ທີ່​ສາ­ທາ­ລະ­ນະ ຕາມ​ແຈ້ງ​ການ​ຂອງ​ເຈົ້າ​ຄອງ​ຫຼາຍ​ປີ​ມາ​ແລ້ວ ແມ່ນ​ບໍ່​ໃຫ້​ເກີນ 100 ດີ​ຊີ​ເບວ (Decibel).

    ບັນ­ຫາ​ຂອງ​ເລື່ອງ​ນີ້​ແມ່ນ​ການ​ກວດ­ກາ ແລະ ລົງ­ໂທດ​ດ້ວຍ​ຮູບ​ການ​ຕ່າງໆ ເພື່ອ​ໃຫ້​ຄົນ​ເຂົ້າ​ສູ່​ລະ­ບຽບ​ບໍ່​ສ້າງ​ສຽງ​ລຳ​ຄານ​ບຽດ­ບຽນ​ຄົນ​ອື່ນ ການ​ກວດ­ກາ​ນີ້​ຕ້ອງ​ແມ່ນ​ອຳ­ນາດ​ການ​ປົກ­ຄອງ​ບ້ານ​ເປັນ​ເຈົ້າ​ການ ສົມ­ທົບ​ກັບ​ເຈົ້າ​ໜ້າ­ທີ່​ເຄື່ອນ​ໄຫວ ລາດ­ຕະ­ເວນ​ຍາມ​ມື້­ບຸນ​ເຮັດ ຄື​ການ​ປາບ​ການ​ຫົດ​ນ້ຳ​ທີ່​ບໍ່​ເໝາະ​ສົມ​ໃນ​ຍາມ​ບຸນ­ປີ­ໃໝ່​ລາວ.

    ຕ້ອງ​ຍອມ­ຮັບ​ນຳ​ກັນ​ວ່າ: ເວົ້າ​ງ່າຍ ແຕ່​ການ­ຈັດ­ຕັ້ງ​ປະ­ຕິ­ບັດ​ຍາກ​ຫຼາຍ ແຕ່​ເຖິງ​ຢ່າງ­ໃດ ການ­ຈັດ­ຕັ້ງ​ກໍ່​ຕ້ອງ​ເຮັດ​ຕ້ອງ​ປາບ ບໍ່​ຊັ້ນ​ແກ່­ຍາວ​ຊຳ​ເຮື້ອ​ໄປ ບ້ານ​ເມືອງ​ກໍ່​ພົບ​ກັບ​ຄວາມ​ບໍ່​ສະ­ຫງົບ​ສຸກ... ເບິ່ງ​ບັນ­ຫາ​ຄື​ນ້ອຍໆ ແຕ່​ໃນ​ຕົວ​ຈິງ​ມັນ​ເສຍ​ຄວາມ​ຮູ້­ສຶກ​ເຖິງ​ຄວາມ​ເຂັ້ມ­ແຂງ​ຂອງ​ການ­ຈັດ­ຕັ້ງ ຜູ້­ກ່ຽວ​ພັນ​ໂດຍ​ກົງ​ແມ່ນ​ຄອບ­ຄົວ ຄັນ​ສະ​ຖາ​ບັນ​ນີ້​ບໍ່​ອອກ​ມາ​ກ່າວ​ເຕືອນ ຊີ້​ແຈງ ແມ່ນ​ແກ້​ບໍ່​ຕົກ ບໍ່​ທໍ່​ນັ້ນ​ຍັງ​ເປັນ​ຜູ້​ກະ­ທຳ​ເອງ​ແຮ່ງ​ໄປ​ກັນ​ໃຫຍ່.

    ຂໍ​ໃຫ້​ທຸກ​ພາກ­ສ່ວນ​ຊ່ວຍ​ກັນ​ແກ້​ໄຂ ຂໍ​ຍໍ​ມື ບໍ່​ໃຫ້​ປີ​ໃໝ່​ທີ່​ຈະ​ເຖິງ​ຂອງ​ພີ່­ນ້ອງ​ຕ່າງ​ດ້າວ ກາຍ­ເປັນ​ຄືນ​ໜຶ່ງ​ທີ່​ໜ້າ​ຫວາດ​ກົວ​ສຳ­ລັບ​ເດັກ­ນ້ອຍ ແລະ ຜູ້​ອາ­ຍຸ​ສູງ.

ຂ່າວທີ່ກ່ຽວຂ້ອງ