ຂ່າວຫຼ້າສຸດ

ຟີຟາ ຍັງສະໜັບສະໜູນການເພີ່ມທີມໃນບານໂລກ 2022

158 07 ມ.ກ. 2019 ວົງຈອນກີລາ
ຟີຟາ ຍັງສະໜັບສະໜູນການເພີ່ມທີມໃນບານໂລກ 2022

    ທ່ານ ຈານ​ນີ້ ອິນ​ຟານ​ຕີ​ໂນ້ ປະ­ທານ​ສະ­ຫະ­ພັນ​ບານ­ເຕະ​ນາໆຊາດ ຫຼື ຟີ​ຟາ ໃຫ້​ສຳ­ພາດ​ຕໍ່​ສື່​ມວນ​ຊົນ ໃນ​ໂອ­ກາດ​ເຂົ້າ​ຮ່ວມ​ກອງ​ປະ­ຊຸມ​ກີ­ລາ​ນາໆຊາດ​ທີ່​ເມືອງ​ດູ​ໄບ ສະ­ຫະ­ລັດ​ອາ​ຣັບ​ເອ​ມີ​ເຣ​ສ ເມື່ອ​ບໍ່​ດົນ​ນີ້​ວ່າ: ສ່ວນ​ຕົວ​ເຫັນ​ດີ​ສະ­ໜັບ­ສະ­ໜູນ​ການ​ເພີ່ມ​ທີມ​ຕາມ​ການ​ສະ­ເໜີ​ຂອງ​ສະ­ຫະ­ພັນ​ບານ­ເຕະ​ອາ​ເມ​ຣິ​ກາ​ໃຕ້ ໃນ​ປີ 2022 ທີ່​ກາ​ຕ້າ ແຕ່​ຕ້ອງ​ຟັງ​ຫາງ​ສຽງ​ຈາກ​ຄະ­ນະ​ກຳ­ມະ­ການ ແລະ ຊາດ​ສະ­ມາ­ຊິກ ພ້ອມ​ກັບ​ຄວາມ​ພ້ອມ​ຂອງ​ເຈົ້າ­ພາບ ແລະ ເງື່ອນ­ໄຂ​ອື່ນໆ.

    ອິນ​ຟານ​ຕີ​ໂນ້ ເນັ້ນ​ຕື່ມ​ວ່າ: ຖ້າ​ເພີ່ມ​ທີມ​ແລ້ວ​ມີ​ຜົນ​ປະ­ໂຫຍດ​ຕົນ​ເອງ​ເຫັນ​ດີ ຖ້າ​ເຈົ້າ­ພາບ​ກາ​ຕ້າ​ມີ​ສະ­ໜາມ​ບໍ່​ພຽງ­ພໍ​ຮອງ​ຮັບ ພວກ​ເຮົາ​ສາ­ມາດ​ໃຫ້​ປະ­ເທດ​ໃກ້​ຄຽງ​ກາ​ຕ້າ​ທີ່​ມີ​ເງື່ອນ­ໄຂ​ດີ​ເປັນ​ເຈົ້າ­ພາບ​ບາງ​ນັດ​ກໍ່​ໄດ້ ເຊື່ອ​ວ່າ​ຈະ​ມີ​ຜົນ​ປະ­ໂຫຍດ​ຕໍ່​ປະ­ເທດ​ທີ່​ເປັນ​ເຈົ້າ­ພາບ ແລະ ທີມ​ທີ່​ເຂົ້າ​ຮ່ວມ.

    ຕາມ​ກຳ­ນົດ​ກ່ອນ​ໜ້າ​ນີ້ ບານ​ໂລກ​ຮອບ​ສຸດ​ທ້າຍ​ແຕ່​ປີ 1998-2022 ມີ 32 ທີມ ແລະ ຈະ​ເພີ່ມ​ເປັນ 48 ທີມ ໃນ​ບານ​ໂລກ​ປີ 2026 ທີ່​ສະ­ຫະ­ລັດ​ອາ​ເມ​ຣິ​ກາ ເມັກ​ຊິ​ໂກ ແລະ ກາ​ນາ​ດາ ເປັນ​ເຈົ້າ­ພາບ​ຮ່ວມ​ກັນ ແຕ່​ແນວ​ຄິດ​ການ​ເພີ່ມ​ທີມ​ດ່ວນ​ໃນ​ປີ 2022 ຂອງ​ສະ­ຫະ­ພັນ​ບານ­ເຕະ​ອາ​ເມ​ຣິ​ກາ​ໃຕ້ ເມື່ອ​ສຶກ​ສາ​ແລ້ວ​ເຫັນ​ວ່າ​ມີ​ຫຼາຍ​ຊາດ​ສະ­ມາ­ຊິກ​ໃນ​ທົ່ວ​ໂລກ​ເຫັນ​ດີ​ເຊັ່ນ​ກັນ ເພາະ​ຈະ​ເພີ່ມ​ໂອ­ກາດ​ໃຫ້​ປະ­ເທດ​ຂອງ​ຕົນ ໄດ້​ໄປ​ບານ​ໂລກ​ຮອບ​ສຸດ​ທ້າຍ​ສູງ​ຂຶ້ນ ພ້ອມ​ກັບ​ສ້າງ​ລາຍ​ໄດ້ ແລະ ສີ­ສັນ​ໃຫ້​ແກ່​ການ​ແຂ່ງ­ຂັນ ແຕ່​ບາງ​ຊາດ​ທີ່​ທີມ​ຕົນ​ແຂງ​ແກ່ນ​ຜັດ​ບໍ່​ເຫັນ​ດີ ເພາະ​ຢ້ານ​ມັນ​ຂາດ​ຄຸ­ນະ­ພາບ ສີ­ຕີນ​ທີ່​ໃກ້​ຄຽງ​ສູ​ສີ​ຂອງ​ທີມ​ທີ່​ເຂົ້າ​ຮ່ວມ.

ຂ່າວທີ່ກ່ຽວຂ້ອງ