ບານເຕະຍິງຊີງແຊັມອາຊີ 16 ປີ ເລື່ອນໄປຈັດຕົ້ນເດືອນມີນາ

86 07 ມ.ກ. 2019 ວົງຈອນກີລາ
ບານເຕະຍິງຊີງແຊັມອາຊີ 16 ປີ ເລື່ອນໄປຈັດຕົ້ນເດືອນມີນາ

    ອີງ​ຕາມ​ຂໍ້​ມູນ​ຈາກ​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ (ສຕລ) ໃຫ້​ຮູ້­ເມື່ອ​ບໍ່​ດົນ​ນີ້​ວ່າ: ສະ­ຫະ­ພັນ​ບານ­ເຕະ​ອາ­ຊີ (AFC) ໄດ້​ເລື່ອນ​ການ​ແຂ່ງ­ຂັນ​ບານ­ເຕະ​ຍິງ​ຊີງ​ແຊັມ​ອາ­ຊີ​ຮຸ່ນ​ອາ­ຍຸ 16 ປີ ຮອບ​ຄັດ​ເລືອກ ຮອບ​ທີ 2 (AFC U-16 WOMEN’S CHAMPIONSHIP 2019 QUALIFIERS ROUND 2) ເຊິ່ງ​ລາວ​ເຮົາ​ໄດ້​ຮັບ​ກຽດ​ເປັນ​ເຈົ້າ­ພາບ​ຈາກ​ວັນ​ທີ 27 ກຸມ­ພາ ຫາ 3 ມີ­ນາ 2019 ມາ​ເປັນ​ວັນ​ທີ 3-7 ມີ­ນາ 2019 ເນື່ອງ​ຈາ​ກວ່າ​ວັນ​ທີ 27 ກຸມ­ພາ 2019 ຈະ​ໄດ້​ມີ​ການ​ແຂ່ງ­ຂັນ AFC CUP 2019 ເຊິ່ງ​ສະ­ໂມ­ສອນ​ລາວ​ໂຕ​ໂຢ​ຕ້າ​ເອັຟ​ຊີ ຈະ​ເປີດ​ບ້ານ​ສະ­ໜາມ​ກີ­ລາ​ແຫ່ງ​ຊາດ ຫຼັກ 16 ຕ້ອນ­ຮັບ​ການ​ມາ​ຢາມ​ສະ­ໂມ­ສອນ KAYA FC-ILOILO ຈາກ​ປະ­ເທດ​ຟີ​ລິບ​ປິນ.

    ສຳ­ລັບ​ການ​ແຂ່ງ­ຂັນ​ບານ­ເຕະ​ຍິງ​ຊີງ​ແຊັມ​ອາ­ຊີ​ຮຸ່ນ​ອາ­ຍຸ 16 ປີ ທີມ​ຊາດ​ລາວ​ຢູ່​ຮ່ວມ​ກຸ່ມ A ປະ­ກອບ​ມີ: ອົດ​ສະ​ຕຣາ​ລີ ລາວ (ເຈົ້າ­ພາບ) ຫວຽດ­ນາມ ແລະ ອີ​ຣານ ສ່ວນ​ກຸ່ມ B ຈະ​ແຂ່ງ­ຂັນ​ວັນ​ທີ 27 ກຸມ­ພາ ຫາ 3 ມີ­ນາ 2019 ປະ­ກອບ​ມີ: ຈີນ ບັງ​ກະ­ລາ​ເທດ ຟີ​ລິບ​ປິນ ແລະ ມຽນ​ມາ.

    ສ່ວນ​ຕາ­ຕະ­ລາງ​ແຂ່ງ­ຂັນ​ວັນ​ທີ 3 ມີ­ນາ 2019 ເວ­ລາ 18:30 ໂມງ ລາວ ພົບ ຫວຽດ­ນາມ ວັນ​ທີ 5 ມີ­ນາ 2019 ເວ­ລາ 18:30 ໂມງ ອີ​ຣານ ພົບ ລາວ ແລະ ວັນ​ທີ 7 ມີ­ນາ 2019 ເວ­ລາ 18:30 ໂມງ ອົດ​ສະ​ຕຣາ​ລີ ພົບ ລາວ ທັງ 3 ນັດ ແຂ່ງ­ຂັນ​ຢູ່​ທີ່​ສະ­ໜາມ​ກີ­ລາ​ແຫ່ງ​ຊາດ ຫຼັກ 16 ທຸກ​ນັດ​ມີ​ຖ່າຍ​ທອດ​ສົດ Mycujoo ອັນ​ດັບ 1 ແລະ ອັນ​ດັບ 2 ຂອງ​ແຕ່​ລະ​ກຸ່ມ ຈະ​ໄດ້​ຜ່ານ​ເຂົ້າ​ຮອບ​ສຸດ​ທ້າຍ​ຢູ່​ທີ່​ປະ­ເທດ​ໄທ ເຊິ່ງ​ຈະ​ແຂ່ງ­ຂັນ​ໃນ​ວັນ​ທີ 15-28 ກັນ­ຍາ 2019.

ຂ່າວທີ່ກ່ຽວຂ້ອງ