ບານບ້ວງລາວ ຍາດໄດ້ທີ 2 ຢູ-20 ທີ່ກຳປູເຈຍ

85 07 ມ.ກ. 2019 ວົງຈອນກີລາ
ບານບ້ວງລາວ ຍາດໄດ້ທີ 2 ຢູ-20 ທີ່ກຳປູເຈຍ

    ທ່ານ ອາ​ລົງ​ກອນ ເພັງ​ສະ​ຫວັດ ເລ­ຂາ­ທິ­ການ​ສະ­ຫະ­ພັນ​ບານ­ບ້ວງ​ແຫ່ງ​ຊາດ​ລາວ ໄດ້​ແຈ້ງ​ໃຫ້​ຊາບ​ວ່າ: ວັນ​ທີ 27-29 ທັນ­ວາ 2018 ສະ­ຫະ­ພັນ​ບານ­ບ້ວງ​ແຫ່ງ​ຊາດ​ລາວ ໄດ້​ສົ່ງ​ທັບ​ນັກ­ກີ­ລາ​ບານ­ບ້ວງ​ທີມ​ຊາດ​ລາວ​ຮຸ່ນ​ອາ­ຍຸ​ບໍ່​ເກີນ 20 ປີ ເຂົ້າ​ຮ່ວມ​ການ​ແຂ່ງ­ຂັນ​ບານ­ບ້ວງ ຢູ-20 ລະ­ດັບ​ດິ​ວິ​ຊັນ 2 ລາຍ­ການ ຟີ​ບາ-ກຳ­ປູ­ເຈຍ ເຟຣນ​ຊິບ 2018 ທີ່​ນະ­ຄອນ­ຫຼວງ​ພະ­ນົມ​ເປັນ ປະ­ເທດ​ກຳ­ປູ­ເຈຍ ເປັນ​ເຈົ້າ­ພາບ ເຊິ່ງ​ເບື້ອງ​ຕົ້ນ​ມີ​ທີມ​ເຂົ້າ​ຮ່ວມ​ແຂ່ງ­ຂັນ 5 ຊາດ ປະ­ກອບ​ມີ: ກຳ­ປູ­ເຈຍ (ເຈົ້າ­ພາບ) ລາວ ຫວຽດ­ນາມ ບຣູ​ໄນ ແລະ ມຽນ​ມາ ແຕ່​ທີມ​ຊາດ​ມຽນ​ມາ ຂໍ​ຖອນ​ຕົວ​ກະ­ທັນ­ຫັນ ເຮັດ​ໃຫ້​ເຫຼືອ​ພຽງ 4 ທີມ ມາ​ຈັດ​ເປັນ​ກຸ່ມ​ດຽວ​ແຂ່ງ­ຂັນ​ພົບ​ກັນ​ໝົດ ຄັດ​ເອົາ​ທີມ​ທີ່​ມີ​ຄະ­ແນນ​ດີ​ທີ່​ສຸດ​ໄດ້​ແຊັມ​ໄປ​ຄອງ ແລະ ທີມ​ທີ່​ຕິດ​ອັນ​ດັບ​ທີ 1 ທີ 2 ແລະ ທີ 3 ຈະ​ໄດ້​ຖືກ​ເລື່ອນ​ຂຶ້ນ​ໄປ​ຫຼິ້ນ​ໃນ​ລະ­ດັບ​ດິ​ວິ​ຊັນ 1 ທີ່​ມີ 5 ຊາດ ຢືນ​ລໍ­ຖ້າ ປະ­ກອບ​ມີ ໄທ ສິງ­ກະ­ໂປ ມາ​ເລ​ເຊຍ ອິນ​ໂດ​ເນ​ເຊຍ ແລະ ຟີ​ລິບ​ປິນ ທີ່​ຈະ​ສືບ­ຕໍ່​ຈັດ​ແຂ່ງ­ຂັນ​ໃນ​ເດືອນ​ເມ­ສາ 2019.

    ຜ່ານ​ການ​ແຂ່ງ­ຂັນ​ຜົນ­ງານ​ນັກ­ກີ­ລາ​ບານ­ບ້ວງ ທີມ​ຊາດ​ລາວ​ໃນ​ການ​ລົງ​ສະ­ໜາມ 3 ນັດ ສາ­ມາດ​ສ້າງ​ຜົນ­ງານ​ໄດ້​ດີ​ເປັນ​ອັນ​ດັບ 2 ນັດ​ທຳ​ອິດ­ສາ​ມາດ​ເອົາ​ຊະ­ນະ​ເຈົ້າ­ພາບ ກຳ­ປູ­ເຈຍ ໄປ​ແບບ​ຫວຸດ​ຫວິດ 73-62 ຄະ­ແນນ ເສຍ​ໃຫ້​ຫວຽດ­ນາມ 54-96 ຄະ­ແນນ ແລະ ນັດ​ສຸດ​ທ້າຍ​ເອົາ​ຊະ­ນະ​ບຣູ​ໄນ 113-63 ຄະ­ແນນ ເຊິ່ງ​ເປັນ​ຄະ­ແນນ​ສະ­ຖິ­ຕິ​ໃໝ່​ເຮັດ​ໄດ້​ຫຼາຍ​ກວ່າ 100 ຄະ­ແນນ ເຊິ່ງ​ເປັນ​ແຕ້ມ​ສູງ​ສຸດ​ຂອງ​ລາວ ໃນ​ການ​ແຂ່ງ­ຂັນ​ລະ­ດັບ​ພາກ​ພື້ນ ພ້ອມ​ທັງ​ສ້າງ​ປະ­ຫວັດ­ສາດ​ໃຫ້​ວົງ​ການ​ບານ­ບ້ວງ​ລາວ ຍາດ​ໄດ້​ອັນ​ດັບ 2 ມາ​ຄອງ ແລະ ຍັງ​ໄດ້​ສ້າງ​ສະ­ຖິ­ຕິ​ໃໝ່​ສຳ­ລັບ​ນັກ­ກີ­ລາ​ຊຸດ​ນີ້ ແມ່ນ​ສາ­ມາດ​ຄັດ​ເລືອກ​ມາ​ໄດ້​ຈາກ​ນະ­ຄອນ­ຫຼວງ​ວຽງ​ຈັນ ແຂວງ​ຫຼວງ​ພະ​ບາງ ສະ­ຫວັນ​ນະ​ເຂດ ແລະ ຈຳ­ປາ​ສັກ.

    ທ່ານ​ກ່າວ​ຕື່ມ​ອີ​ກວ່າ: ຕໍ່​ຜົນ­ງານ​ດັ່ງ­ກ່າວ​ຕ້ອງ​ຂໍ​ຍອມ­ຮັບ​ຈິດ­ໃຈ ແລະ ຍ້ອງ­ຍໍ​ຊົມ­ເຊີຍ​ມາ​ຍັງ​ຄູ​ເຝິກ ແລະ ນັກ­ກີ­ລາ​ທຸກ​ຄົນ ທີ່​ໄດ້​ເສຍ­ສະ­ຫຼະ​ເຂົ້າ​ຮ່ວມ​ແຂ່ງ­ຂັນ ສາ­ມາດ​ສ້າງ​ຜົນ­ສຳ­ເລັດ​ຄັ້ງ​ນີ້ ເຖິງ​ວ່າ​ພວກ​ເຮົາ​ຈະ​ມີ​ອຸ­ປະ­ສັກ​ຕ່າງໆ ແລະ ຂາດ​ຜູ້​ໃຫ້­ການ​ສະ­ໜັບ­ສະ­ໜູນ​ກໍ່​ຕາມ ແຕ່​ນັບ​ຈາກ​ນີ້​ເປັນ­ຕົ້ນ​ໄປ ສະ­ຫະ­ພັນ​ບານ­ບ້ວງ​ແຫ່ງ​ຊາດ ຈະ​ພະ­ຍາ­ຍາມ​ສູ້​ຊົນ​ນຳ­ພາ​ນັກ­ກີ­ລາ​ອອກ​ເຄື່ອນ​ໄຫວ​ຕາມ​ເງື່ອນ­ໄຂ​ທີ່​ມີ ສືບ­ຕໍ່​ຈັດ​ແຂ່ງ­ຂັນ​ເຍົາ­ວະ​ຊົນ 3 ຮຸ່ນ​ຄື: ຮຸ່ນ​ອາ­ຍຸ​ບໍ່​ເກີນ 12 ປີ 14 ປີ ແລະ 16 ປີ ເພື່ອ​ສ້າງ​ເງື່ອນ­ໄຂ​ໃນ​ການ​ສ້າງ​ເຂົາ­ເຈົ້າ​ກ້າວ​ສູ່​ທີມ​ຊາດ​ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ