ຫວານເປັນລົມ ຂົມເປັນຢາ

1.521 07 ມ.ກ. 2019 ນານາສາລະ

    ເຫັນ​ວ່າ​ຂົມ​ຄວາມ​ເວົ້າ​ທາງ​ໃນ​ຢ່າ​ຟ້າວ​ຈົ່ມ​ຫຼາຍ​ເນີ ລາງ​ເທື່ອ​ຂົມ​ຂີ້­ເພ້ຍ ເມືອ​ໜ້າ​ຫາກ​ຊິ​ນົວ ຜູ້​ຂຽນ​ເຂົ້າ­ໃຈ​ວ່າ: ຫວານ ແລະ ຂົມ ທັງ​ສອງ​ຕ່າງ ກໍ່​ເປັນ​ຢາ​ດີ ຕ່າງ​ແຕ່​ວ່າ ແມ່​ຜູ້​ປົວ​ພະ­ຍາດ​ຈະ​ສະ­ຫຼາດ​ປຸງ​ຢາ​ໃຫ້​ຂ້າ​ພະ­ຍາດ​ໄດ້​ດີ​ພຽງ​ໃດ ? ຖ້າ​ໃຫ້​ຍົກ​ຕົວ­ຢ່າງ​ຂອງ​ພະ­ຍາດ​ທີ່​ຮ້າຍ​ແຮງ​ເກີດ​ຂຶ້ນ​ໃນ​ຊີ­ວິດ​ມະ­ນຸດ​ທີ່​ທ່ານ ໂຮ່​ຈີ​ມິງ ຂຽນ​ໄວ້​ໃນ​ປື້ມ​ແກ້​ໄຂ​ວິ­ທີ​ເຮັດ​ວຽກ ຍ່ອມ​ມີ​ພະ­ຍາດ​ຫຼາຍ​ຊະ­ນິດ ເຊັ່ນ: ພະ­ຍາດ​ດີ​ແຕ່​ເວົ້າ ພະ­ຍາດ​ລູບ​ແຂ່ງ​ເລຍ​ຂາ ພະ­ຍາດ​ອາດ­ຍາ​ສິດ ພະ­ຍາດ​ອັດ­ຕາ​ທິ​ປະ​ໄຕ ບໍ່​ຟັງ­ສຽງ​ມະ­ຫາ­ຊົນ... ຄວາມ​ຈິງ​ປື້ມ​ຫົວ​ນັ້ນ​ມັນ​ເຄີຍ​ເປັນ​ຄູ່​ມື​ຂອງ​ນັກ​ປະ­ຕິ­ວັດ ເຊິ່ງ​ດຽວ­ນີ້​ບໍ່​ແນ່​ໃຈ​ວ່າ​ມັນ​ອາດ​ຖືກ​ຫຼົງ​ລືມ​ໄປ​ດົນ​ແລ້ວ​ສຳ­ລັບ​ບາງ​ຄົນ.

    ພະ­ຍາດ​ອັດ­ຕາ​ທິ​ປະ​ໄຕ ຄື: ບໍ່​ຢາກ​ຟັງ­ສຽງ​ມະ­ຫາ­ຊົນ ອາດ​ຍັງ​ມີ​ປາ­ກົດ​ເຫັນ​ໃນ​ຜູ້​ບໍ­ລິ­ຫານ​ລະ­ດັບ​ສູງ​ບາງ​ຄົນ ຫຼື ບາງ​ໜ່ວຍ​ງານ ເຊິ່ງ​ຜູ້​ມີ​ພະ­ຍາດ​ນີ້ ຈະ​ຕົກ​ຢູ່​ໃນ​ລັກ​ຊະ­ນະ​ຂາດ​ນ້ຳ­ຕານ​ຢູ່​ຕະ­ຫຼອດ​ເວ­ລາ ດັ່ງ­ນັ້ນ ເຂົາ​ຜູ້​ນີ້​ຈຶ່ງ​ມັກ​ແຕ່​ຄຳ​ຍ້ອງ­ຍໍ​ຊົມ­ເຊີຍ ຫຼື ຄຳ​ເວົ້າ​ຫວານ​ຫູ​ຊື່ນ​ໃຈ ຖ້າ​ຍາມ​ໃດ​ຜູ້­ກ່ຽວ​ໄດ້​ຟັງ​ຄຳ​ເຫັນ​ລົດ​ຊາດ​ຂົມ ກໍ່​ຈະ​ຂຸ່ນ​ໃຈ​ທັນ­ທີ ຫຼື ບາງ­ທີ ເຜີໆ ຫຼົງ​ຄິດ​ວ່າ​ຜູ້​ມີ​ຄຳ​ເຫັນ​ກົງ­ກັນ­ຂ້າມ​ເຂົາ​ຕໍ່­ຕ້ານ ບໍ່​ເຫັນ​ຕາມ​ແນວ­ທາງ​ຂອງ​ຕົນ ພະ­ຍາດ​ອັນ​ນີ້​ຖ້າ​ເກີດ​ກັບ​ຜູ້​ມີ​ອຳ­ນາດ​ບໍ­ລິ­ຫານ​ຄົນ​ໃດ ອາດ​ຊັກ​ພາ­ໃຫ້​ກົດ​ໜ່ວງ​ຖ່ວງ​ດຶງ​ຄວາມ​ກ້າວ­ໜ້າ​ຂອງ​ອົງ​ກອນ ອົງ­ການ​ຂອງ​ລັດ-ເອ­ກະ​ຊົນ ຫຼື ວ່າ​ບາງ­ເທື່ອ​ອາດ ເປັນ​ສາ­ເຫດ​ບໍ່​ຢາກ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ໃນ​ໜ່ວຍ​ງານ​ຂອງ​ຕົນ ທັງໆ​ທີ່​ໄດ້​ຮຽນ​ມະ­ຕິ​ຈາກ​ຂັ້ນ​ເທິງ​ແລ້ວ​ວ່າ: ຊັບ­ພະ­ຍາ­ກອນ​ມະ­ນຸດ​ເປັນ​ປັດ​ໄຈ​ຕັດ­ສິນ​ຊີ້​ຂາດ​ຄວາມ​ກ້າວ­ໜ້າ​ຂອງ​ວຽກ ຫຼື ຂອງ​ປະ­ເທດ​ຊາດ ແລະ ສັງ­ຄົມ.

    ຄວາມ​ຫວານ​ມັກ​ເຮັດ​ໃຫ້​ຄົນ​ເປັນ​ລົມ ເຊິ່ງ​ພວກ​ເຮົາ​ສາ­ມາດ​ສັງ­ເກດ​ໄດ້​ວ່າ ເວ­ລາ​ເຮົາ​ກິນ​ເຂົ້າ­ໜຽວ​ຫຼາຍ​ເກີນ​ໄປ​ໃນ​ຄາບ​ເຂົ້າ​ໃດ​ໜຶ່ງ ຈະ​ເຮັດ​ໃຫ້​ຜູ້­ກ່ຽວ​ຢາກ​ນອນ ເພາະ​ໃນ​ເຂົ້າ­ໜຽວ​ມີ​ທາດ​ຫວານ (ນ້ຳ­ຕານ​ຫຼາຍ) ດັ່ງ­ນັ້ນ ຄຳ​ເວົ້າ​ຫວານ​ຫູ ກໍ່​ສາ­ມາດ​ເຮັດ​ໃຫ້​ຫົວ­ໜ້າ​ຕິດ​ໃນ​ລົດ​ຊາດ​ຫວານໆ ຈົນ​ບໍ່​ຮູ້­ເມື່ອ​ຄີງ ເພາະ​ເວ­ລາ​ລາຍ​ງານ​ໃຫ້​ຫົວ­ໜ້າ​ຟັງ ຜັດ​ມີ​ແຕ່​ແນວ​ດີໆ ເຖິງ​ແມ່ນ​ວ່າ​ຈະ​ມີ​ຂໍ້​ບົກ​ຜ່ອງ ຫຼື ຜິດ­ພາດ​ຫຼາຍ​ປານ­ໃດ​ຂອງ​ຕົນ​ກໍ່​ປົກ​ປິດ​ໄວ້ ຫຼື ບາງ​ຄັ້ງ​ຫົວ­ໜ້າ​ຖາມ​ເຈາະ​ຈີ້ມ​ສະ­ພາບ​ການ ກໍ່​ມີ​ແຕ່​ລາຍ​ງານ​ໃນ​ສິ່ງ​ທີ່​ຖືກ​ໃຈ​ຫົວ­ໜ້າ ເຊິ່ງ​ຕົກ​ໃນ​ລັກ­ສະ­ນະ​ໃນ​ນິ­ທານ ສຽວ­ສະ­ຫວາດ: ເສ­ນາ­ໝາກ­ຂີ້­ກາ ດີ​ແຕ່​ວ່າ ໃນ​ນິ­ທານ​ເລື່ອງ​ນີ້​ຜູ້​ເປັນ​ພະ​ລາ­ຊາ ສະ­ຫຼາດ ຕັດ­ສິນ​ໃຈ​ຖືກ­ຕ້ອງ ເລືອກ​ເອົາ​ຄຳ​ເຫັນ​ຂອງ​ສຽວ­ສະ­ຫວາດ ບອກ​ວ່າ​ໝາກ​ຂີ້­ກາ​ມັນ​ມີ​ລົດ​ຂົມ ເລື່ອງ​ຂອງ­ຫວານໆ​ຂົມໆ​ນີ້ ຂຶ້ນ​ກັບ​ແພດ​ໝໍ ຜູ້​ປຸງ​ຢາ ຖ້າ​ເວົ້າ​ເຖິງ​ການ​ບໍ­ລິ­ຫານ​ວຽກ​ກໍ່​ຂຶ້ນ​ກັບ​ຫົວ­ໜ້າ​ທີ່​ຄວນ​ຫຼີກ­ເວັ້ນ ການ​ຕັດ­ສິນ​ໃຈ​ແບບ Win-Win ເພາະ​ຜົນ​ປະ­ໂຫຍດ​ໄດ້​ພຽງ​ສອງ​ຄົນ ຖ້າ­ວ່າ All Win ຄື​ທຸກ​ຄົນ​ຈະ​ໄດ້​ປະ­ໂຫຍດ ເສ­ນາ­ໝາກ­ຂີ້­ກາ ກໍ່​ແມ່ນ​ນິ­ທານ​ເລື່ອງ​ໜຶ່ງ​ທີ່​ພວກ​ເສ­ນາ​ອາ­ມາດ​ຄອຍ​ແຕ່​ລູບ​ແຂ່ງ​ເລຍ​ຂາ ພະ​ລາ­ຊາ ຫວັງ​ວ່າ​ສັງ­ຄົມ​ລາວ​ປັດ­ຈຸ­ບັນ​ຈະ​ບໍ່​ມີ​ເສ­ນາ­ໝາກ­ຂີ້­ກາ.

ຂ່າວທີ່ກ່ຽວຂ້ອງ