ຂ່າວຫຼ້າສຸດ

ບຸນກອງເຂົ້າບ້ານໃຫຍ່ນາຈະເລີນ ຈະຈັດຂຶ້ນທ້າຍອາທິດນີ້

292 07 ມ.ກ. 2019 ຂ່າວໜ້າ​ໜຶ່ງ
ບຸນກອງເຂົ້າບ້ານໃຫຍ່ນາຈະເລີນ ຈະຈັດຂຶ້ນທ້າຍອາທິດນີ້

    ບຸນ​ກອງ​ເຂົ້າ​ແມ່ນ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ-ຂອງ​ຊົນ­ເຜົ່າ ເຊິ່ງ​ແມ່ນ​ມູນ​ມໍ­ລະ­ດົກ​ອັນ​ລ້ຳ​ຄ່າ​ຂອງ​ບັນ­ພະ­ບຸ­ລຸດ​ຂອງ​ຊາດ​ລາວ ໄດ້​ປະ­ຕິ­ບັດ​ສືບ­ຕໍ່​ກັນ​ມາ​ຫຼາຍ​ຍຸກ​ຫຼາຍ​ສະ­ໄໝ​ຫຼາຍ­ເຊັ່ນ­ຄົນ ພໍ​ຕົກ​ມາ​ຮອດ​ເດືອນ​ຍີ່​ກົງ​ກັບ​ເດືອນ 2 ລາວ ກໍ່​ໄດ້​ສຳ­ເລັດ​ໃນ​ການ​ເກັບ​ກູ້​ຜົນ​ຜະ­ລິດ​ລະ­ດູ­ຝົນ ຈາກ​ນັ້ນ ກໍ່​ໄດ້​ພ້ອມ­ພຽງ​ຮຽງ​ໜ້າ​ເຮັດ­ບຸນ​ກອງ​ເຂົ້າ ເພື່ອ​ເປັນ​ການ​ລ້ຽງ​ເຈົ້າ​ຖິ່ນ​ເຈົ້າ​ຖານ ຜູ້​ປົກ​ປັກ​ຮັກ­ສາ​ໄຮ່­ນາ ຮົ້ວ​ສວນ ຕາມ​ຄວາມ​ເຊື່ອ​ຖື.

    ວັນ​ທີ 3 ມັງ­ກອນ 2019 ເມືອງ​ສັງ​ທອງ​ຮ່ວມ​ກັບ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ແລະ ກະ­ຊວງ ຖວ​ທ ຈັດ​ກອງ​ປະ­ຊຸມ​ປຶກ­ສາ​ຫາ­ລື​ກຽມ​ຄວາມ​ພ້ອມ​ການ​ຈັດ​ງານ​ບຸນ​ກອງ​ເຂົ້າ ຂຶ້ນ​ທີ່​ບ້ານ​ໃຫຍ່​ນາ​ຈະ­ເລີນ ໂດຍ​ເປັນ​ປະ­ທານ​ຮ່ວມ​ຂອງ​ທ່ານ ດາວ​ເພັດ ອາ​ລຸນ ເຈົ້າ­ເມືອງ​ສັງ​ທອງ ທ່ານ ຄຳ​ປະ­ດິດ ເຂັມ​ມາ­ນິດ ຫົວ­ໜ້າ​ພະ​ແນກ ຖວ​ທ ນວ ແລະ ທ່ານ ພັດ­ທະ­ນາ​ສອນ ທິນ​ພັກ­ດີ ຮອງ​ຫົວ­ໜ້າ​ກົມ​ວັດ­ທະ­ນະ­ທຳ ມະ­ຫາ­ຊົນ ມີ​ບັນ­ດາ​ຫົວ­ໜ້າ​ຫ້ອງ­ການ ອຳ­ນາດ​ການ​ປົກ­ຄອງ​ບ້ານ​ອ້ອມ​ຂ້າງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ດາວ​ເພັດ ອາ​ລຸນ ກ່າວ​ວ່າ: ຂໍ​ແຈ້ງ​ຂ່າວ​ບຸນ​ມາ​ຍັງ​ການ​ນຳ​ຂັ້ນ​ສູງ​ກາງ ນວ ເມືອງ ນັກ­ທຸ­ລະ­ກິດ ຊາວ​ຄ້າ­ຂາຍ ປະ­ຊາ­ຊົນ​ຊາບ​ທົ່ວ​ເຖິງ​ກັນ ຢູ່​ເມືອງ​ສັງ​ທອງ​ໃນ​ວັນ​ທີ 12 ມັງ­ກອນ 2019 ເປັນ​ມື້​ຕັ້ງ​ບຸນ​ກອງ​ເຂົ້າ​ປະ­ຈຳ​ປີ ຂຶ້ນ​ທີ່​ບ້ານ​ໃຫຍ່​ນາ​ຈະ­ເລີນ ແລະ ການ​ຈັດ​ບຸນ​ກອງ​ເຂົ້າ​ຂຶ້ນ ເພື່ອ​ເປັນ​ການ­ຈັດ­ຕັ້ງ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ IV ຂອງ​ອົງ­ຄະ​ນະ​ພັກ​ເມືອງ ໂດຍ​ສະ­ເພາະ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ເມືອງ​ສັງ​ທອງ​ຕິດ​ພັນ​ກັບ​ວຽກ​ງານ 3 ສ້າງ ແລະ ປີ​ທ່ອງ​ທ່ຽວ​ລາວ 2018 ພ້ອມ​ທັງ​ເປັນ​ການ​ອະ­ນຸ​ຮັກ​ຮັກ­ສາ​ວັດ­ທະ­ນະ­ທຳ​ອັນ​ເກົ່າ​ແກ່ ແລະ ເປັນ​ການ​ສຶກ​ສາ​ອົບ­ຮົມ​ປູກ​ຈິດ​ສຳ­ນຶກ​ຖັນ​ແຖວ​ຊາວ​ໜຸ່ມ ເຍົາ­ວະ​ຊົນ ອະ­ນຸ­ຊົນ ໃຫ້​ມີ​ຄວາມ​ສາ­ມັກ­ຄີ ມີ​ນ້ຳ­ໃຈ​ຮັກ​ເຊື້ອ​ແພງ​ຊາດ ຮັກ​ບ້ານ​ເກີດ​ເມືອງ​ນອນ ຮັບ​ຮູ້​ເຂົ້າ­ໃຈ​ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ.

    ສຳ­ລັບ​ກິດ­ຈະ­ກຳ​ໃນ​ວັນ​ບຸນ​ກອງ​ເຂົ້າ​ປີ​ນີ້ ຈະ​ຈັດ​ຂຶ້ນ​ໃນ​ວັນ​ທີ 12 ມັງ­ກອນ 2019 ຈະ​ມີ​ຄາ​ລະ​ວານ​ລົດ​ຈາກ ນວ ມາ​ແວ່​ບ້ານ​ອ່າງ​ໃຫຍ່ ເມືອງ​ສີ​ໂຄດ​ຕະ­ບອງ ເພື່ອ​ເຂົ້າ​ຮ່ວມ​ເຮັດ​ກິດ­ຈະ­ກຳ​ຕ່າງໆ ເບິ່ງ​ເຂດ​ສະ­ຫງວນ​ປາ­ບຶກ ຈາກ​ນັ້ນ ເຄື່ອນ​ອອກ​ສາມ​ແຍກ​ບ້ານ​ປາກ​ຕອນ ເມືອງ​ສັງ​ທອງ ຈະ​ແຍກ​ອອກ​ເປັນ​ສອງ​ກຸ່ມ​ຄື: ກຸ່ມ​ທີ 1 ເຄື່ອນ​ມາ​ເສັ້ນ­ທາງ​ລຽບ​ພູ​ພະ­ນັງ ແລະ ກຸ່ມ​ທີ 2 ເຄື່ອນ​ມາ​ເສັ້ນ­ທາງ​ລຽບ​ແຄມ​ຂອງ ແລ້ວ​ມາ​ພົບ​ກັນ​ຢູ່​ສຳ­ນັກ­ງານ​ປົກ­ຄອງ​ເມືອງ​ສັງ​ທອງ ເພື່ອ​ເຕົ້າ­ໂຮມ​ຂະ​ບວນ​ຄາ​ລະ​ວານ ແລະ ຮັບ​ຟັງ​ການ​ກ່າວ​ຕ້ອນ­ຮັບ​ຈາກ​ຄະ­ນະ​ນຳ​ເມືອງ ຈາກ​ນັ້ນ ຈະ​ເຄື່ອນ​ຂະ​ບວນ​ເຂົ້າ​ສູ່​ບ້ານ​ໃຫຍ່​ນາ​ຈະ­ເລີນ ເພື່ອ​ເຂົ້າ​ຮ່ວມ​ພິ­ທີ​ສະ­ເຫຼີມ­ສະ­ຫຼອງ​ບຸນ ສ່ວນ​ພາຍ​ໃນ​ງານ​ຈະ​ມີ​ກ້ອນ​ກຳ­ລັງ​ແຫ່​ຕິດ­ຕໍ່​ກັນ 6 ຂະ​ບວນ​ເຊັ່ນ: ຂະ​ບວນ​ການ​ນຳ​ຂັ້ນ​ສູນ​ກາງ ແລະ ທ້ອງ­ຖິ່ນ ຖື​ຂັນ​ໝາກ­ເບັງ ຂະ​ບວນ​ຊາວ​ໜຸ່ມ-ເຍົາ­ວະ​ຊົນ ຂະ​ບວນ​ກຳ­ລັງ ປກຊ-ປກສ ຂະ​ບວນ​ສິ­ລະ​ປະ ຂະ​ບວນ​ມວນ​ຊົນ ຫຼັງ​ຈາກ​ນັ້ນ ຈະ​ໄດ້​ຮັບ​ຟັງ​ການ​ຜ່ານ​ປະ­ຫວັດ​ຫຍໍ້​ຂອງ​ວັນ​ບຸນ ພ້ອມ​ທ່ຽວ​ຊົມ​ການ­ສະ­ແດງ​ສິ­ລະ​ປະ​ວັນ­ນະ­ຄະ­ດີ ແລະ ໝໍ​ລຳ​ເລື່ອງ​ຕໍ່­ກອນ​ຈຳ­ນວນ​ຫຼາຍ​ລາຍ­ການ.

ຂ່າວທີ່ກ່ຽວຂ້ອງ