ຂ່າວຫຼ້າສຸດ

ປະຊາຊົນສອງບ້ານ ໄດ້ຊົມໃຊ້ເສັ້ນທາງປູຢາງ

287 07 ມ.ກ. 2019 ຂ່າວໜ້າ​ໜຶ່ງ
ປະຊາຊົນສອງບ້ານ ໄດ້ຊົມໃຊ້ເສັ້ນທາງປູຢາງ

    ພິ­ທີ​ມອບ-ຮັບ​ເສັ້ນ­ທາງ​ລະ­ຫວ່າງ​ບ້ານ​ນາ​ສ້າງ​ໄຜ່​ຫາ​ບ້ານ​ໄຮ່​ຄຳ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ຈັດ​ຂຶ້ນ​ວັນ​ທີ 4 ມັງ­ກອນ 2019 ທີ່​ຫ້ອງ­ການ​ປົກ­ຄອງ​ບ້ານ​ນາ​ສ້າງ​ໄຜ່ ມີ​ທ່ານ ທະ­ວີ​ໄຊ ໄຊ​ປະ­ເສີດ ຫົວ­ໜ້າ​ຫ້ອງ­ການ​ໂຍ­ທາ​ທິ​ການ ແລະ ຂົນ­ສົ່ງ​ເມືອງ​ໄຊ​ເຊດ​ຖາ ທ່ານ ກອງ​ໄຫວ ອຸ­ດົມ ຮອງ​ປະ­ທານ​ບໍ­ລິ­ສັດ ແສນ​ອຸ­ດົມ ຈຳ­ກັດ​ຜູ້​ດຽວ ພ້ອມ​ດ້ວຍ​ອຳ­ນາດ​ການ​ປົກ­ຄອງ​ບ້ານ ແລະ ປະ­ຊາ­ຊົນ​ເຂົ້າ​ຮ່ວມ.

    ໂຄງ­ການ​ກໍ່­ສ້າງ​ເສັ້ນ­ທາງ​ດັ່ງ­ກ່າວ​ເປັນ​ໂຄງ­ການ​ຂອງ​ລັດ ໄດ້​ຮັບ​ງົບ­ປະ­ມານ​ໃນ​ສົກ​ປີ 2013-2014 ໃນ​ເບື້ອງ​ຕົ້ນ​ແມ່ນ​ລັດ​ວິ​ສາ​ຫະ​ກິດ​ຂົວ-ທາງ​ຊົນ­ນະ­ບົດ​ເປັນ​ຜູ້​ຮັບ​ເໝົາ​ກໍ່­ສ້າງ ພາຍ­ຫຼັງ​ທີ່​ຈັດ​ຕັ້ງ​ປະ­ຕິ­ບັດ​ມາ​ໄດ້​ໄລ­ຍະ​ໜຶ່ງ​ໜ້າ​ວຽກ​ສຳ­ເລັດ​ວຽກ​ຊັ້ນ​ພື້ນ​ດິນ ແລະ ວາງ​ທໍ່​ໃນ​ປີ 2016 ຕໍ່​ມາ​ບໍ­ລິ­ສັດ​ດັ່ງ­ກ່າວ​ຂາດ­ເຂີນ​ທຶນ­ຮອນ ຈຶ່ງ​ບໍ່​ສາ­ມາດ​ສືບ­ຕໍ່​ໂຄງ­ການ​ໄດ້ ແລະ ໄດ້​ມອບ​ໂຄງ­ການ​ຄືນ​ໃຫ້​ລັດ ໂດຍ​ໄລ່​ຄືນ​ບໍ​ລິ​ມາດ ແລະ ງົບ­ປະ­ມານ​ທີ່​ບໍ­ລິ­ສັດ​ໄດ້​ຮັບ​ຊຳ­ລະ​ໄປ ຫຼັງ​ຈາກ​ນັ້ນ ໄດ້​ເປີດ​ການ​ປະ­ມູນ​ຄືນ­ໃໝ່ ຕາມ​ໜ້າ​ວຽກ​ທີ່​ຍັງ​ບໍ່​ທັນ​ແລ້ວ​ຕາມ​ຮ່າງ​ງົບ­ປະ­ມານ​ໃນ​ເດືອນ​ພຶດ­ສະ­ພາ 2018 ໂດຍ​ແມ່ນ​ບໍ­ລິ­ສັດ ແສນ​ອຸ­ດົມ ຈຳ­ກັດ​ຜູ້​ດຽວ ເປັນ​ຜູ້​ຊະ­ນະ​ການ​ປະ­ມູນ ແລະ ສືບ­ຕໍ່​ຈັດ​ຕັ້ງ​ປະ­ຕິ­ບັດ​ໂຄງ­ການ​ໃນ​ເດືອນ​ທັນ­ວາ 2018 ແລະ ໃຊ້​ເວ­ລາ​ກໍ່­ສ້າງ 30 ວັນ​ສຳ­ເລັດ ເຊິ່ງ​ເສັ້ນ­ທາງ​ດັ່ງ­ກ່າວ​ມີ​ຄວາມ​ຍາວ 3.611 ແມັດ ແລະ ກວ້າງ 6 ແມັດ ເປັນ​ທາງ​ປູ­ຢາງ​ສອງ​ຊັ້ນ ມູນ​ຄ່າ​ກໍ່­ສ້າງ​ທັງ​ໝົດ 5,4 ຕື້​ກີບ.

ຂ່າວທີ່ກ່ຽວຂ້ອງ