ລະວັງພະຍາດໄຂ້ຫວັດ ແລະ ປອດອັກເສບໃນໄລຍະລະດູໜາວ

125 08 ມ.ກ. 2019 ຫົວຂໍ້ຂ່າວອື່ນໆ

    ໃນ​ສະ­ພາບ​ອາ­ກາດ​ທີ່​ໜາວ​ເຢັນ ພວກ​ເຮົາ​ຕ້ອງ​ໄດ້​ເອົາ­ໃຈ­ໃສ່​ໃນ​ການ​ຮັກ­ສາ​ສຸ­ຂະ­ພາບ​ຂອງ​ຕົນ​ເອງ​ເປັນ​ພິ­ເສດ ໂດຍ​ການ​ປະ­ຕິ­ບັດ​ຫຼັກ­ການ​ອະ­ນາ­ໄມ 3 ສະ­ອາດ ກິນ​ອາ­ຫານ​ໃຫ້​ຄົບ 5 ໝູ່ ສິ່ງ​ສຳ­ຄັນ​ຕ້ອງ​ເຮັດ​ໃຫ້​ຮ່າງ­ກາຍ​ອົບ​ອຸ່ນ ແລະ ຕ້ອງ​ເອົາ­ໃຈ­ໃສ່​ປ້ອງ​ກັນ​ພະ­ຍາດ​ທີ່​ມັກ​ເກີດ​ໃນ​ລະ­ດູ​ໜາວ ເຊັ່ນ: ພະ­ຍາດ​ໄຂ້​ຫວັດ ແລະ ໄຂ້­ຫວັດ­ໃຫຍ່ ເຊິ່ງ​ມີ​ອາ​ການ­ສະ­ແດງ​ອອກ​ໃນ​ເບື້ອງ​ຕົ້ນ​ແມ່ນ ຕັນ​ດັງ ນ້ຳ​ມູກ​ໄຫຼ ໄອ ຈາມ ເຈັບ​ຫົວ​ແຮງ ມີ​ໄຂ້​ສູງ ເມື່ອຍ​ຕາມ​ຕົນ​ຕົວ ແລະ ອາດ​ມີ ອາ­ການ​ປຸ້ນ­ທ້ອງ ເຊິ່ງ​ວິ­ທີ​ປິ່ນ­ປົວ​ຕ້ອງ​ນອນ​ພັກ­ຜ່ອນ​ໃຫ້​ພຽງ­ພໍ ເຊັດ​ຕົນ​ຕົວ ແລະ ກິນ​ຢາ​ຫຼຸດ ຜ່ອນ​ໄຂ້ ເມື່ອ​ອາ­ການ​ບໍ່​ດີ​ຂຶ້ນ​ຄວນ​ໄປ​ພົບ​ແພດ.

    ອີກ​ພະ­ຍາດ​ໜຶ່ງ ນອກ­ຈາກ​ເປັນ­ຫວັດ ແມ່ນ​ພະ­ຍາດ​ປອດ​ອັກ­ເສບ ເຊິ່ງ​ຈະ​ມີ​ອາ­ການ​ໄອ ແໜ້ນ​ເອິກ ມີ​ໄຂ້​ສູງ ແລະ ຫາຍ­ໃຈ​ຫອບ ມັກ​ພົບ​ຫຼັງ​ຈາກ​ເປັນ­ໄຂ້​ຫວັດ​ຊ້ຳ​ເຮື້ອ ຫຼື ຮຸນ​ແຮງ ວິ­ທີ​ປິ່ນ­ປົວ​ແມ່ນ​ຄວນ​ໄປ​ພົບ​ແພດ ແລະ ອີກ​ພະ­ຍາດ​ໜຶ່ງ ສ່ວນ​ໃຫຍ່​ມັກ​ເກີດ​ກັບ​ເດັກ­ນ້ອຍ ແມ່ນ​ພະ­ຍາດ­ໝາກ­ສຸກ​ໝາກ​ໃສ ໂດຍ​ອາ­ການ​ເລີ່ມ​ຕົ້ນ​ແມ່ນ​ຈະ​ມີ​ໄຂ້​ຕ່ຳ ຕໍ່​ມາ​ຈະ​ມີ​ຜື່ນ​ແດງ ຕຸ່ມ​ນູນ​ໃສໆ ຈາກ​ນັ້ນ​ຈະ​ເປັນ​ຕຸ່ມ​ໜອງ ສ່ວນ​ວິ­ທີ​ຮັກ­ສາ​ແມ່ນ​ຕາມ​ອາ­ການ​ຄົນ​ເຈັບ ສ່ວນ​ໃຫຍ່​ຈະ​ເຊົາ​ຈາກ​ອາ­ການ​ດັ່ງ­ກ່າວ​ໃນ​ເວ­ລາ​ບໍ່​ດົນ ອີກ​ພະ­ຍາດ​ໜຶ່ງ​ທີ່​ໜ້າ​ເປັນ​ຫ່ວງ​ແມ່ນ​ພະ­ຍາດ​ຖອກ­ທ້ອງ ໂດຍ​ຈະ​ມີ​ອາ­ການ​ຖ່າຍ​ເປັນ​ນ້ຳ​ຮ່ວມ​ກັບ​ອາ­ການ​ໄຂ້ ແລະ ປວດ­ຮາກ ເຊິ່ງ​ວິ­ທີ​ປິ່ນ­ປົວ​ແມ່ນ​ຕ້ອງ​ດື່ມ­ນ້ຳ​ຫຼາຍໆ ໂດຍ​ສະ­ເພາະ​ແມ່ນ​ນ້ຳ​ທີ່​ປະ­ສົມ​ເກືອ​ແຮ່ ຖ້າ​ອາ­ການ​ຍັງ​ບໍ່​ດີ​ຂຶ້ນ​ໃຫ້​ໄປ​ພົບ​ແພດ.

    ບັນ­ດາ​ພະ­ຍາດ​ທີ່​ກ່າວ​ມາ​ນັ້ນ ກຸ່ມ​ສ່ຽງ​ທີ່​ມັກ​ເກີດ​ພະ­ຍາດ​ແມ່ນ​ເດັກ­ນ້ອຍ ແລະ ຜູ້​ອາ­ຍຸ​ສູງ ເນື່ອງ​ຈາກ​ພູມ​ຕ້ານ­ທານ​ຕໍ່​ພະ­ຍາດ​ມີ​ຕ່ຳ ສະ­ນັ້ນ ພວກ​ເຮົາ​ຕ້ອງ​ໄດ້​ເອົາ­ໃຈ­ໃສ່​ເປັນ​ພິ­ເສດ​ກັບ​ກຸ່ມ​ຄົນ​ດັ່ງ­ກ່າວ ຖ້າ​ມີ​ອາ­ການ​ຂອງ​ພະ­ຍາດ​ໃດ​ໜຶ່ງ​ຄວນ​ເອົາ­ໃຈ­ໃສ່​ຕິດ­ຕາມ ແລະ ປະ­ຕິ­ບັດ​ຕາມ​ຄຳ​ແນະ­ນຳ​ທີ່​ກ່າວ​ມາ​ນັ້ນ ແຕ່​ຖ້າ​ອາ­ກາດ​ຍັງ​ບໍ່​ດີ​ຂຶ້ນ​ຄວນ​ໄປ​ພົບ​ແພດ​ຢ່າງ​ຮີບ​ດ່ວນ.

ຂ່າວທີ່ກ່ຽວຂ້ອງ