ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 08/01/2019

291 08 ມ.ກ. 2019 ຫົວຂໍ້ຂ່າວອື່ນໆ

    ພົບ​ກັນ​ວັນ​ນີ້ ລອງ​ໄປ​ເບິ່ງ​ມາດ​ຕະ­ການ​ມາ​ເລ​ເຊຍ ເພື່ອ​ຈຳ­ກັດ​ການ​ດື່ມ​ສິ່ງ​ມຶນ­ເມົາ ຕໍ່​ໃສ່​ແຜນ​ກຳ­ຈັດ​ຂີ້​ເຫຍື້ອ​ຢາງ​ປະ­ເພດ​ຫຍາບ ແລະ ໜຽວ ຢູ່ ສ.ເກົາ­ຫຼີ.

    ທີ່ ມາ​ເລ​ເຊຍ: ໃນ​ປັດ­ຈຸ­ບັນ​ສະ­ໜາມ­ຮົບ​ຕ້ານ​ເຄື່ອງ​ດື່ມ​ປະ­ເພດ​ມຶນ­ເມົາ ເຊັ່ນ: ຊະ­ນິດ​ທີ່​ມີ​ທາດ​ເຫຼົ້າ 100% ແລະ ຊະ­ນິດ​ທີ່​ມີ​ທາດ​ເຫຼົ້າ​ປະ­ສົມ​ຕາມ​ອັດ­ຕາ​ສ່ວນ ມາ​ເລ​ເຊຍ ປະ­ເທດ​ທີ່​ຄົນ​ສ່ວນ​ໃຫຍ່​ນັບ­ຖື​ສາ­ສະ­ໜາ​ມຸດ​ສະ​ລິມ​ນັ້ນ ການ​ບໍ­ລິ­ໂພກ​ເຄື່ອງ​ດື່ມ​ປະ­ເພດ​ມຶນ­ເມົາ​ມີ​ອັດ­ຕາ​ສ່ວນ​ໜ້ອຍ​ທຽບ​ຫຼາຍ​ປະ­ເທດ ແຕ່​ປານ​ນັ້ນ ທາງ​ການ​ຂອງ​ປະ­ເທດ​ນີ້ ຍັງ​ໃຊ້​ຄວາມ​ພະ­ຍາ­ຍາມ​ຢ່າງ​ບໍ່​ລົດ​ລະ ເພື່ອ​ຈຳ­ກັດ​ຮັດ​ແຄບ​ການ​ເຂົ້າ​ເຖິງ​ເຄື່ອງ​ດື່ມ​ປະ­ເທດ​ມຶນ­ເມົາ ຕົວ­ຢ່າງ ໃນ​ວັນ​ທີ 17 ເດືອນ​ຕຸ­ລາ ປີ 2018 ນີ້ ທາງ​ການ​ມາ​ເລ​ເຊຍ ໄດ້​ຕົກ­ລົງ​ເພີ່ມ​ອາ­ຍຸ​ຕ່ຳ​ສຸດ​ຂອງ​ຜູ້​ສາ­ມາດ​ຊື້​ເຄື່ອງ​ດື່ມ​ປະ­ສົມ​ທາດ​ເຫຼົ້າ ຈາກ​ໃນ​ເມື່ອ​ກ່ອນ 18 ປີ ມາ​ເປັນ 21 ປີ ໃນ​ປັດ­ຈຸ­ບັນ ຂໍ້​ຕົກ­ລົງ​ນີ້ ມີ​ຜົນ​ສັກ­ສິດ​ທັນ­ທີ​ໂລດ (ໃນ​ວັນ​ທີ 17 ຕຸ­ລາ 2018 ນັ້ນ​ເອງ) ພາຍ​ໃຕ້​ຂໍ້​ຕົກ­ລົງ​ດັ່ງ­ກ່າວ ຫົວ­ໜ່ວຍ​ຈຳ­ໜ່າຍ​ເຄື່ອງ​ດື່ມ​ປະ­ສົມ​ທາດ​ເຫຼົ້າ​ຕ້ອງ​ຕິດ​ສະ­ຫຼາກ​ເຕືອນ​ສະ­ຕິ​ຜູ້​ດື່ມ​ວ່າ: “ເຄື່ອງ​ດື່ມ​ທີ່​ມີ​ທາດ​ເຫຼົ້າ​ເປັນ​ອັນ­ຕະ­ລາຍ​ຕໍ່​ສຸ­ຂະ­ພາບ” ຄ້າຍໆ​ກັບ​ຄຳ­ເຕືອນ​ທີ່​ຫຼາຍ​ປະ­ເທດ​ຕິດ​ໃສ່​ຊອງ­ຢາ​ສູບ ນອກ­ຈາກ​ນັ້ນ ປ້າຍ​ຄຳ­ເຕືອນ​ນີ້ ຍັງ​ຕ້ອງ​ຕິດ​ໄວ້​ປະ­ຕູ​ທາງ​ເຂົ້າ​ສູ່​ບໍ­ລິ­ເວນ​ເຮັດ​ທຸ­ລະ​ກິດ​ຂາຍ­ເຄື່ອງ​ດື່ມ​ທີ່​ມີ​ທາດ​ເຫຼົ້າ​ປະ­ສົມ​ອີກ​ດ້ວຍ ສ່ວນ​ບັນ­ດາ​ຫົວ­ໜ່ວຍ​ປະ­ກອບ​ການ​ຜະ­ລິດ​ເຄື່ອງ​ດື່ມ​ປະ­ເພດ​ເຫຼົ້າ ຍັງ​ຕ້ອງ​ໄດ້​ພິມ​ຂໍ້​ມູນ​ກ່ຽວ​ກັບ​ເກນ​ອາ­ຍຸ​ຕ່ຳ​ສຸດ ທີ່​ສາ­ມາດ​ຊື້​ເຄື່ອງ​ດື່ມ​ປະ­ເພດ​ນີ້​ໄດ້ ໂດຍ​ໃຫ້​ພິມ​ໃສ່​ຜະ­ລິດ​ຕະ​ພັນ​ທັງ​ໝົດ​ສຳ­ລັບ​ຜູ້​ລະ­ເມີດ​ຂໍ້​ຕົກ­ລົງ​ນັ້ນ ຈະ​ຕ້ອງ​ໄດ້​ຈ່າຍ​ເປັນ​ຄ່າ​ປັບ​ໃໝ​ເຖິງ 10.000 ຣິງ​ກິດ (ປະ­ມານ 20 ລ້ານ​ກີບ) ຫຼື ຖືກ​ຈຳ​ຄຸກ​ສູງ​ສຸດ 2 ປີ.

    ທີ່ ສ.ເກົາ­ຫຼີ: ນັບ​ແຕ່​ປີ 2017 ເປັນ­ຕົ້ນ​ໄປ ຢູ່​ຕາມ​ຮ້ານ​ອາ­ຫານ ຮ້ານ​ກາ­ເຟ ໃນ​ທົ່ວ ສ ເກົາ­ຫຼີ ຈະ​ບໍ່​ມີ​ປຼັສ​ຕິກ​ທີ່​ເຮັດ​ດ້ວຍ​ຖ້ວຍ ບ່ວງ ຈານ ຈອກ ແລະ ທໍ່­ດູດ​ເຄື່ອງ​ດື່ມ ໃຫ້​ລູກ​ຄ້າ​ອີກ​ຕໍ່​ໄປ ຍ້ອນ​ວ່າ​ເຄື່ອງ­ໃຊ້​ເຫຼົ່າ​ນີ້ ເຮັດ​ດ້ວຍ​ຢ່າງ​ທີ່​ໜຽວ-ຫຍາບ ແລະ ຍາກ​ທີ່​ຈະ​ປັບ​ປ່ຽນ (ຣີ​ໄຊ​ເກິນ) ເພື່ອ​ນຳ​ມາ​ໃຊ້​ຄືນ­ໃໝ່ ໃນ​ນັ້ນ ທໍ່­ດູດ ແມ່ນ ຣີ​ໄຊ​ເກິນ ຍາກ​ທີ່​ສຸດ ນອກ­ຈາກ​ຫຍາບ​ແລ້ວ​ຍັງ​ມີ​ຂະ­ໜາດ​ນ້ອຍ ບໍ່​ພໍ­ດີ​ກັບ​ແຂ້ວ ເຄື່ອງ​ຈັກ​ຈັດ​ຣີ​ໄຊ​ເກິນ ແຜນ­ການ​ກຳ­ຈັດ​ເຄື່ອງ­ໃຊ້​ທີ່​ກ່າວ​ມາ​ນັ້ນ ແມ່ນ​ສ່ວນ​ໜຶ່ງ​ຂອງ​ຄວາມ​ພະ­ຍາ­ຍາມ​ລວມ ເພື່ອ​ຫຼຸດ­ຜ່ອນ​ຂີ້​ເຫຍື້ອ​ທີ່​ຣີ​ໄຊ​ເກິນ​ຍາກ ເພື່ອ​ບັນ­ລຸ​ເປົ້າ​ໝາຍ​ທີ່​ວາງ​ອອກ ທາງ​ກະ­ຊວງ​ສິ່ງ­ແວ­ດລ້ອມ ແລະ ອີກ 9 ກະ­ຊວງ​ກ່ຽວ­ຂ້ອງ​ໄດ້​ຍື່ນ​ແຜນ​ໄລ­ຍະ 10 ປີ​ຂອງ​ແຕ່​ລະ​ພາກ­ສ່ວນ ກ່ຽວ​ກັບ​ການ​ນຳ​ໃຊ້​ຊັບ­ພະ­ຍາ­ກອນ​ແບບ​ໝູ­ນວຽນ​ໃຫ້​ລັດ­ຖະ­ບານ​ພິ­ຈາ­ລະ­ນາ ໂດຍ​ສອດ­ຄ່ອງ​ກັບ​ກົດ­ໝາຍ​ວ່າ​ດ້ວຍ​ການ​ນຳ​ໃຊ້​ຊັບ­ພະ­ຍາ­ກອນ​ທີ່​ມີ​ຜົນ​ສັກ­ສິດ ໃນ​ເດືອນ​ມັງ­ກອນ ປີ 2018 ນະ­ໂຍ­ບາຍ​ແກ້​ໄຂ​ບັນ­ຫາ​ຂີ້​ເຫຍື້ອ​ຂອງ ສ ເກົາ­ຫຼີ ໃນ​ປັດ­ຈຸ­ບັນ​ນັ້ນ ມີ​ລັກ­ສະ­ນະ​ຄົບ​ວົງ​ຈອນ ແລະ ປະ­ຕິ­ບັດ​ເປັນ​ຂັ້ນໆ ນັບ​ແຕ່​ການ​ຜະ­ລິດ ການ​ຄຸ້ມ​ຄອງ ແລະ ຂະ​ບວນ​ການ ຣີ​ໄຊ​ເກິນ ເຊິ່ງ​ຕ່າງ​ກັບ​ເມື່ອ​ກ່ອນ​ທີ່​ເນັ້ນ​ສະ­ເພາະ​ຂະ​ບວນ​ການ ຣີ​ໄຊ​ເກິນ ພາຍ­ຫຼັງ​ການ​ຊົມ­ໃຊ້​ແລ້ວ​ເທົ່າ​ນັ້ນ.

ຂ່າວທີ່ກ່ຽວຂ້ອງ