ການຈັດຕັ້ງປະຕິບັດແຜນງົບປະມານປີ 2018 ບໍ່ບັນລຸເປົ້າໝາຍ

444 08 ມ.ກ. 2019 ຂ່າວໜ້າ​ໜຶ່ງ
ການຈັດຕັ້ງປະຕິບັດແຜນງົບປະມານປີ 2018 ບໍ່ບັນລຸເປົ້າໝາຍ

    ກະ­ຊວງ​ການ​ເງິນ ຈັດ​ກອງ​ປະ­ຊຸມ​ສະ­ຫຼຸບ​ວຽກ​ງານ​ການ​ເງິນ ປະ­ຈຳ​ປີ 2018 ແລະ ທິດ​ທາງ​ແຜນ­ການ​ປະ­ຈຳ​ປີ 2019 ຂຶ້ນ​ວັນ​ທີ 7-8 ມັງ­ກອນ 2019 ຢູ່​ຫໍ​ປະ­ຊຸມ​ແຫ່ງ​ຊາດ ໂດຍ​ເປັນ​ປະ­ທານ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ມີ​ບັນ­ດາ​ຄະ­ນະ​ນຳ​ກະ­ຊວງ ອົງ­ການ​ທຽບ​ເທົ່າ ກົມ​ອ້ອມ​ຂ້າງ​ກະ­ຊວງ​ການ​ເງິນ ແລະ ພະ­ແນກ­ການ​ເງິນ​ທົ່ວ​ປະ­ເທດ​ເຂົ້າ​ຮ່ວມ.

    ເພື່ອ​ສະ­ຫຼຸບ​ຕີ​ລາ­ຄາ​ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ​ແຫ່ງ​ລັດ​ປີ 2018 ພ້ອມ​ທັງ​ປຶກ­ສາ​ຫາ­ລື​ທິດ​ທາງ​ແຜນ­ການ ແລະ ມາດ​ຕະ​ການ­ຈັດ­ຕັ້ງ​ປະ­ຕິ­ບັດ​ປີ 2019 ຮັບ​ຟັງ​ການ​ສະ­ເໜີ​ບັນ­ດາ​ຮ່າງ​ນິ­ຕິ​ກຳ​ທີ່​ຕິດ​ພັນ​ກັບ​ຂະ­ແໜງ­ການ​ເງິນ ເປັນ­ຕົ້ນ​ວຽກ​ງານ​ສາມ​ສ້າງ​ຂອງ​ຂະ­ແໜງ­ການ​ເງິນ ຮ່າງ​ຂໍ້​ຕົກ­ລົງ​ວ່າ​ດ້ວຍ​ການ​ເງິນ​ບ້ານ ແລະ ບັນ­ຫາ​ສຳ­ຄັນ​ອື່ນໆ​ຈຳ­ນວນ​ໜຶ່ງ.

    ທ່ານ ສົມ​ດີ ດວງ​ດີ ກ່າວ​ວ່າ: ການ­ຈັດ­ຕັ້ງ​ປະ­ຕິ­ບັດ​ແຜນ​ງົບ­ປະ­ມານ​ປີ 2018 ມີ​ຫຼາຍ​ດ້ານ​ພົບ​ຄວາມ​ຫຍຸ້ງ­ຍາກ ແລະ ທ້າ​ທາຍ​ສູງ ບັນ­ຫາ​ລວມ​ແມ່ນ​ຍັງ​ເປັນ​ແຜນ­ທີ່​ສືບ­ຕໍ່​ແກ້​ໄຂ​ສະ­ພາບ​ຄວາມ​ຝືດ­ເຄືອງ​ດ້ານ​ການ​ເງິນ-ງົບ­ປະ­ມານ ທີ່​ເກີດ​ຂຶ້ນ​ໃນ​ຫຼາຍ​ສົກ​ປີ­ຜ່ານ­ມາ ເຊິ່ງ​ຕ້ອງ​ໃຊ້​ເວ­ລາ​ພໍ​ສົມ­ຄວນ​ຈຶ່ງ​ສາ­ມາດ​ຟື້ນ​ໂຕ ແລະ ກັບ­ເຂົ້າ​ສູ່​ສະ­ພາບ​ປົກ­ກະ­ຕິ​ໄດ້ ພ້ອມ​ນີ້ ສະ­ພາບ​ແວດ​ລ້ອມ​ພາກ​ພື້ນ ແລະ ສາ­ກົນ ໂດຍ​ລວມ​ຍັງ​ບໍ່​ທັນ​ເອື້ອ​ອຳ­ນວຍ​ເທົ່າ​ທີ່​ຄວນ ບັນ­ຫາ​ການ​ເຕີບ​ໂຕ​ດ້ານ​ເສດ­ຖະ­ກິດ​ຂອງ​ບັນ­ດາ​ປະ­ເທດ​ໃນ​ພາກ​ພື້ນ ແລະ ຄູ່​ຄ້າ​ຂອງ​ປະ­ເທດ​ເຮົາ​ຍັງ​ບໍ່​ທັນ​ຟື້ນ​ໂຕ​ດີ ສະ­ພາບ​ການ​ເງິນ​ຂອງ​ໂລກ​ຍັງ​ມີ​ການ​ຜັນ​ແປ​ຫຼາຍ​ດ້ານ ເປັນ­ຕົ້ນ ອັດ­ຕາ​ດອກ​ເບ້ຍ​ຂອງ​ຕະ­ຫຼາດ​ການ​ເງິນ​ສາ­ກົນ​ເພີ່ມ​ຂຶ້ນ​ສູງ ລາ­ຄາ​ນ້ຳ­ມັນ​ມີ​ຈັງ­ຫວະ​ເໜັງ​ຕີງ​ໄວ ສົ່ງ​ຜົນ​ເຮັດ​ໃຫ້​ຕົ້ນ​ທຶນ​ການ​ຄ້າ ການ​ລົງ­ທຶນ ແລະ ການ​ຜະ­ລິດ​ສູງ​ຂຶ້ນ ບົນ​ພື້ນ­ຖານ​ສະ­ພາບ​ເງື່ອນ­ໄຂ​ພາຍ​ນອກ ແລະ ພາຍ​ໃນ​ປະ­ເທດ ພວກ​ເຮົາ​ໄດ້​ພ້ອມ​ກັນ​ສູ້​ຊົນ​ຈັດ​ຕັ້ງ​ປະ­ຕິ­ບັດ​ແຜນ​ງົບ­ປະ­ມານ​ແຫ່ງ​ລັດ​ປີ 2018 ສາ­ມາດ​ຈັດ​ຕັ້ງ​ປະ­ຕິ­ບັດ​ລາຍ​ຮັບ​ງົບ­ປະ­ມານ​ແຫ່ງ​ລັດ 95,45% ຂອງ​ແຜນ­ການ​ປີ ສະ­ເພາະ​ລາຍ​ຮັບ​ພາຍ​ໃນ​ໄດ້ 100,34% ຂອງ​ແຜນ­ການ​ປີ ສ່ວນ​ລາຍ​ຈ່າຍ​ປະ­ຕິ­ບັດ​ໄດ້ 97,11% ອີງ­ໃສ່​ຕົວ​ເລກ​ສະ­ຫຼຸບ​ເບື້ອງ​ຕົ້ນ​ຂອງ​ການ­ຈັດ­ຕັ້ງ​ປະ­ຕິ­ບັດ​ລາຍ​ຮັບ ແລະ ລາຍ​ຈ່າຍ​ໝົດ​ປີ ຄາດ​ວ່າ​ໃນ​ປີ 2018 ຈະ​ມີ​ການ​ຂາດ​ດຸນ​ງົບ­ປະ­ມານ 4,96% ຂອງ GDP (ແຜນ​ຂາດ​ດຸນ​ທີ່​ສະ­ພາ​ຮອງ​ຮັບ 4,92% ຂອງ GDP) ເຊິ່ງ​ໂດຍ​ລວມ​ການ​ຈັດ​ເກັບ​ລາຍ​ຮັບ​ເຂົ້າ​ງົບ­ປະ­ມານ ຍັງ​ບໍ່​ສາ­ມາດ​ບັນ­ລຸ​ຄາດ­ໝາຍ​ທີ່​ສະ­ພາ​ແຫ່ງ​ຊາດ​ໄດ້​ກຳ­ນົດ​ໄວ້.

    ສຳ­ລັບ​ແຜນ​ງົບ­ປະ­ມານ​ແຫ່ງ​ລັດ​ປີ 2019 ແມ່ນ​ສືບ­ຕໍ່​ສູ້​ຊົນ​ແກ້​ໄຂ​ບັນ­ຫາ​ຄວາມ​ຫຍຸ້ງ­ຍາກ​ດ້ານ​ງົບ­ປະ­ມານ ແລະ ຫັນ­ປ່ຽນ​ໃໝ່ ໂດຍ​ກ້າວ​ສູ່​ການ​ປະ­ຕິ​ຮູບ ການ​ຄຸ້ມ​ຄອງ​ການ​ເງິນ​ພາກ​ລັດ​ຢ່າງ​ຕັ້ງ­ໜ້າ ຫັນ​ເປັນ​ທັນ​ສະ­ໄໝ​ຢ່າງ​ທັນ​ການ ກວ້າງ­ຂວາງ ເຮັດ​ໃຫ້­ການ​ເກັບ​ລາຍ​ຮັບ ແລະ ປະ­ຕິ­ບັດ​ລາຍ​ຈ່າຍ​ງົບ­ປະ­ມານ​ມີ​ປະ​ສິດ­ທິ​ຜົນ​ເຂັ້ມ​ງວດ​ກວ່າ​ເກົ່າ ແນ­ໃສ່​ເຮັດ​ໃຫ້​ເສດ­ຖະ­ກິດ​ແຫ່ງ​ຊາດ​ເຕີບ​ໂຕ​ຕາມ​ຄາດ­ໝາຍ​ວາງ​ໄວ້​ຢ່າງ​ໜ້ອຍ 6,7% ຫຼື ເທົ່າ​ກັບ 165.475 ຕື້​ກີບ ເຊິ່ງ​ຄາດ­ໝາຍ​ທີ່​ສະ­ພາ​ແຫ່ງ​ຊາດ​ຮັບ­ຮອງ ປະ­ກອບ​ມີ​ຄາດ­ໝາຍ​ລາຍ​ຮັບ​ຕ້ອງ​ສູ້​ຊົນ​ໃຫ້​ໄດ້ 26.305,29 ຕື້​ກີບ ຫຼື ປະ­ມານ 16% ຂອງ GDP ໃນ​ນີ້ ລາຍ​ຮັບ​ພາຍ​ໃນ 24.240 ຕື້​ກີບ ທຽບ​ເທົ່າ 14,65% ຂອງ GDP ສ່ວນ​ຄາດ­ໝາຍ​ລາຍ​ຈ່າຍ​ງົບ­ປະ­ມານ​ບໍ່​ເກີນ 33.394,07 ຕື້​ກີບ ເທົ່າ​ກັບ 20,18% ຂອງ GDP ແລະ ຄາດ​ຄະ­ເນ​ຈະ​ຂາດ​ດຸນ 7.088,78 ຕື້​ກີບ ເທົ່າ​ກັບ 4,28% ຂອງ GDP ເຊິ່ງ​ຍັງ​ເປັນ​ການ​ຂາດ​ດຸນ​ໃນ​ລະ­ດັບ​ສູງ​ສົມ­ຄວນ ແລະ ມີ​ຄວາມ​ຈຳ­ເປັນ​ຕ້ອງ​ໄດ້​ລະ­ດົມ​ແຫຼ່ງ​ດຸນ​ດ່ຽງ​ຈາກ​ພາຍ​ໃນ ແລະ ຕ່າງ­ປະ­ເທດ ໃຫ້​ພຽງ­ພໍ​ກັບ​ຄວາມ​ຈຳ­ເປັນ​ລາຍ​ຈ່າຍ​ຕ່າງໆ ຕາມ​ແຜນ­ການ​ທີ່​ກຳ­ນົດ​ໄວ້.

ຂ່າວທີ່ກ່ຽວຂ້ອງ