ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 09/01/2019

220 09 ມ.ກ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້​ມີ​ເລື່ອງ​ນະ­ໂຍ­ບາຍ​ເພີ່ມ​ປະ­ຊາ­ກອນ​ຢູ່ ອິ​ຕາ​ລີ ຕໍ່​ໃສ່​ຂ່າວ​ກ່ຽວ​ກັບ​ກົດ­ໝາຍ​ຕ້ານ​ການ​ກໍ່​ການ​ຮ້າຍ​ທີ່ ອີ​ຣ່ານ ແລະ ເລື່ອງ​ການ​ໃຊ້​ສື່​ສັງ­ຄົມ​ອອນ​ລາຍ​ເພື່ອ​ທຳ­ລາຍ​ຊື່​ສຽງ​ກຽດ​ສັກ​ສີ​ຂອງ​ຄົນ​ອື່ນ ທີ່ ສ ອາ​ເມ​ຣິ​ກາ.

    ທີ່ ອິ​ຕາ​ລີ: ສະ­ຖິ­ຕິ ປີ 2017 ຊີ້​ອອກ​ວ່າ: ເດັກ​ເກີດ​ໃໝ່​ໃນ​ປະ­ເທດ​ອິ​ຕາ​ລີ​ນັ້ນ ໄດ້​ຫຼຸດ​ລົງ​ເປັນ​ປະ­ຫວັດ​ການ ຄື​ມີ​ພຽງ 464.000 ຄົນ ເທົ່າ​ນັ້ນ ທຽບ​ກັບ​ປະ­ຊາ­ກອນ​ຂອງ​ປະ­ເທດ​ທີ່​ມີ 60 ລ້ານ​ກວ່າ​ຄົນ ໃນ​ຂະ­ນະ​ທີ່​ເດັກ​ເກີດ​ໃໝ່ ນັບ​ມື້​ຫຼຸດ​ລົງ​ນັ້ນ ຈຳ­ນວນ​ຜູ້​ເຖົ້າ​ຜັດ​ເພີ່ມ​ຂຶ້ນ​ເປັນ​ເງົາ​ຕາມ​ໂຕ ແລະ ບັນ­ຫາ​ຂາດ­ແຄນ​ແຮງ​ງານ​ກໍ່​ຄົງ​ຈະ​ຫຼີກ​ບໍ່​ມົ້ມ​ໃນ​ອະ­ນາ­ຄົດ ເພື່ອ​ແກ້​ບັນ­ຫາ​ທ້າ​ທາຍ​ດັ່ງ­ກ່າວ ທາງ​ການ​ອິ​ຕາ​ລີ ໄດ້​ປະ­ກາດ​ໃຫ້ ປີ 2019 ຫາ ປີ 2021 ເປັນ​ປີ​ເພີ່ມ​ຈຳ­ນວນ​ເດັກ​ເກີດ​ໃໝ່​ດ້ວຍ​ນະ­ໂຍ­ບາຍ​ທີ່​ແສນ​ຈູງ​ໃຈ ຄື​ທາງ​ການ​ປະ­ກາດ​ວ່າ ຄູ່​ຜົວ​ເມຍ​ໃດ ທີ່​ສາ­ມາດ​ມີ​ລູກ​ຄົນ­ທີ 3 ໄດ້ ໃນ​ໄລ­ຍະ​ທີ່​ກຳ­ນົດ​ໄວ້​ນັ້ນ ຈະ​ໄດ້​ຮັບ​ລາ­ງວັນ​ເປັນ​ເນື້ອ­ທີ່​ດິນ​ສຳ­ລັບ​ກະ­ສິ­ກຳ ແລະ ລ້ຽງ­ສັດ​ໄປ​ຄອບ​ຄອງ ແລະ ນຳ​ໃຊ້​ເປັນ​ເວ­ລາ 20 ປີ​ເຕັມໆ ນະ­ໂຍ­ບາຍ “ດິນ​ແລກ​ເດັກ” ນີ້​ແມ່ນ​ຫົວ­ຄິດ​ປະ­ດິດ​ສ້າງ​ຂອງ​ທ່ານ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ອິ​ຕາ​ລີ ຊື່​ທ່ານ ກຽນ ມາ​ໂກ ເຊັນ​ຕີ​ນຽວ (Gian Marco Centinaio) ນະ­ໂຍ­ບາຍ​ຜະ­ລິດ​ເດັກ​ນີ້ ໄດ້​ຖືກ​ຕ້ອນ­ຮັບ​ໂດຍ​ດີ​ຈາກ​ທົ່ວ​ສັງ­ຄົມ ແຕ່​ກໍ່​ມີ​ຫາງ​ສຽງ​ຈາກ​ບາງ​ພາກ­ສ່ວນ​ທີ່​ເວົ້າ​ວ່າ: ນະ­ໂຍ­ບາຍ​ນີ້ ຄວນ​ເລັ່ງ​ໃສ່​ຄອບ­ຄົວ​ຜົວ​ເມຍ ທີ່​ແຕ່ງ­ດອງ​ກັນ​ຢ່າງ​ຖືກ­ຕ້ອງ​ເທົ່າ​ນັ້ນ ບໍ່​ຄວນ​ກວມ​ເອົາ​ຜູ້​ທີ່​ມີ​ລູກ​ໂດຍ​ບໍ່​ໄດ້​ແຕ່ງ­ດອງ ນະ­ໂຍ­ບາຍ “ດິນ​ແລກ​ເດັກ” ເລັ່ງ​ໃສ່​ຄອບ­ຄົວ​ໃນ​ຊົນ­ນະ­ບົດ​ເປັນ­ຕົ້ນ​ຕໍ.

    ທີ່ ອີ​ຣານ: ຫວ່າງ​ບໍ່​ດົນ​ມາ​ນີ້ ລັດ​ຖະ​ສະ­ພາ​ປະ­ເທດ ອີ​ຣານ ໄດ້​ລົງ­ມະ­ຕິ​ຮັບ­ຮອງ​ເອົາ​ກົດ­ໝາຍ​ຫ້າມ​ສະ­ໜັບ­ສະ­ໜູນ​ດ້ານ​ການ​ເງິນ​ໃຫ້​ກຸ່ມ​ກໍ່​ການ​ຮ້າຍ ໂດຍ​ມີ​ສຽງ​ເຫັນ​ດີ 143 ສຽງ ຕໍ່ 120 ສຽງ ນີ້​ເປັນ​ກົດ­ໝາຍ​ສະ­ບັບ​ທີ 4 ໃນ​ຂອບ​ກົດ­ໝາຍ​ຕ້ານ​ການ​ກໍ່​ການ​ຮ້າຍ​ທີ່​ອີ​ຣານ ໄດ້​ຮັບ­ຮອງ​ເອົາ​ທາງ​ການ​ອີ​ຣານ ໄດ້​ໃຫ້​ຮູ້​ວ່າ: ການ​ຮັບ­ຮອງ​ເອົາ​ກົດ­ໝາຍ​ສະ­ບັບ​ນີ້ ແມ່ນ​ເພື່ອ​ເຮັດ​ໃຫ້​ບັນ­ດາ​ກົດ­ໝາຍ​ຂອງ​ປະ­ເທດ​ມີ​ມາດ­ຕະ­ຖານ​ລະ­ດັບ​ສາ­ກົນ ແລະ ເພື່ອ​ເປີດ​ປະ­ຕູ​ເຂົ້າ​ຮ່ວມ​ເປັນ​ພາ­ຄີ ສົນ­ທິ­ສັນ­ຍາ​ສະ­ຫະ​ປະ­ຊາ​ຊາດ ວ່າ​ດ້ວຍ​ການ​ເກືອດ​ຫ້າມ​ສະ­ໜັບ­ສະ­ໜູນ​ດ້ານ​ການ​ເງິນ​ໃຫ້​ລັດ­ທິ​ກໍ່​ການ​ຮ້າຍ ສ່ວນ​ທ່ານ ໂມ​ຮາມ​ມາດ ຈາ​ວາດ ຊາ​ຣິບ ລັດ­ຖະ­ມົນ­ຕີ​ການ​ຕ່າງ­ປະ­ເທດ ອີ​ຣານ ໄດ້​ມີ​ຄຳ​ເຫັນ​ກ່ຽວ​ກັບ​ກົດ­ໝາຍ ສະ­ບັບ​ນີ້​ວ່າ ທ່ານ​ເອງ ແລະ ທ່ານ​ປະ­ທາ­ນາ­ທິ­ບໍ­ດີ ບໍ່​ສາ­ມາດ​ຮັບ­ປະ­ກັນ​ໄດ້​ວ່າ ກົດ­ໝາຍ​ສະ­ບັບ​ນີ້​ຈະ​ຊ່ວຍ​ແກ້​ບັນ­ຫາ​ທຸກ​ຢ່າງ​ໃຫ້​ຕົກ​ໄປ ທ່ານ​ແນ່​ໃຈ​ພຽງ​ວ່າ ຖ້າ ອີ​ຣານ ບໍ່​ເຂົ້າ​ເປັນ​ພາ­ຄີ​ສົນ­ທິ­ສັນ­ຍາ ສປຊ ທີ່​ກ່າວ​ມາ​ຂ້າງ​ເທິງ​ນັ້ນ ສະ­ຫະ­ລັດ​ອາ​ເມ​ຣິ​ກາ ກໍ່​ຈະ​ມີ​ຂໍ້​ອ້າງ​ເພື່ອ​ສ້າງ​ບັນ­ຫາ​ຫຼາຍ​ຂຶ້ນ​ສຳ­ລັບ​ອີ​ຣານ.

    ທີ່ ສ ອາ​ເມ​ຣິ​ກາ: ໜັງ­ສື­ພິມ ເດິ​ເນ​ເຊິນ (The Nation) ສະ­ບັບ​ວັນ​ທີ 19 ຕຸ­ລາ ປີ 2018 ໄດ້​ລາຍ​ງານ​ກ່ຽວ​ກັບ​ກໍ­ລະ­ນີ​ມີ​ນັກ​ຮ້ອງ​ແຣບ (ເພງ​ທຳ­ນອງ​ຈົ່ມ) ຊື່​ທ້າວ ທີ​ໄອ (TI) ໄດ້​ສ້າງ​ພາບ​ວີ​ດີ​ໂອ​ລາ­ມົກ ເພື່ອ​ທຳ­ລາຍ​ກຽດ ແລະ ສັກ​ສີ​ຂອງ​ທ່ານ​ນາງ ເມ​ລາ​ເນຍ ທຼຳ ສະ­ຕີ​ໝາຍ​ເລກ 1 ຂອງ ສ ອາ​ເມ​ຣິ​ກາ ນັກ​ຮ້ອງ​ແຣບ​ຄົນ​ນີ້ ໄດ້​ຊອກ​ເອົາ​ແມ່­ຍິງ​ທີ່​ມີ​ຮູບ​ຮ່າງ​ໜ້າ​ຕາ​ຄ້າຍ​ກັບ​ທ່ານ​ນາງ ມາ­ລາ​ເນຍ ທຼຳ ແລ້ວ​ຖ່າຍ​ເປັນ​ພາບ​ວີ​ດີ​ໂອ​ໃນ​ທ່າ​ເຕັ້ນ​ລະ­ບຳ​ເປືອຍ ຢູ່​ຫ້ອງ ໂອ​ວານ (Oval office) ທີ່​ທຳ​ນຽບ​ຂາວ ຂ່າວ​ບອກ​ວ່າ ໂຄ­ສົກ​ປະ­ຈຳ​ຕົວ​ສະ­ຕີ​ໝາຍ​ເລກ 1 ໄດ້​ອອກ​ມາ​ປະ­ນາມ​ການ​ກະ­ທຳ​ດັ່ງ­ກ່າວ​ເປັນ​ທີ່​ຮຽບ​ຮ້ອຍ​ແລ້ວ.

ຂ່າວທີ່ກ່ຽວຂ້ອງ