ຂ່າວຫຼ້າສຸດ

ນະຄອນຫຼວງວຽງຈັນ ສຳເລັດການປັກດຳເຂົ້ານາແຊງ 8.000 ກວ່າເຮັກຕາ

287 09 ມ.ກ. 2019 ຂ່າວໜ້າ​ໜຶ່ງ
ນະຄອນຫຼວງວຽງຈັນ ສຳເລັດການປັກດຳເຂົ້ານາແຊງ 8.000 ກວ່າເຮັກຕາ

    ລະ­ດູ­ຝົນ​ປີ 2018 ທົ່ວ​ປະ­ເທດ​ໄດ້​ຮັບ​ຜົນ​ກະ­ທົບ​ຢ່າງ​ໜັກ­ໜ່ວງ​ຈາກ​ໄພ​ນ້ຳ​ຖ້ວມ ເຊິ່ງ​ໄດ້​ສ້າງ​ຄວາມ​ເສຍ​ຫາຍ​ໃຫ້​ເນື້ອ­ທີ່​ການ​ຜະ­ລິດ​ລະ­ດູ­ຝົນ ຂອງ​ຊາວ​ກະ­ສິ­ກອນ​ຫຼາຍ​ທ້ອງ­ຖິ່ນ ໂດຍ​ສະ­ເພາະ ເຂດ​ເນື້ອ­ທີ່​ການ​ຜະ­ລິດ​ທີ່​ຕ່ຳ ແລະ ລຽບ​ຕາມ​ແມ່­ນ້ຳ​ຕ່າງໆ ນະ­ຄອນ­ຫຼວງ​ວຽງ​ຈັນ (ນວ) ກໍ່​ແມ່ນ​ໜຶ່ງ​ໃນ​ບັນ­ດາ​ແຂວງ​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ຢ່າງ​ຫຼວງ­ຫຼາຍ ເປັນ­ຕົ້ນ ເນື້ອ­ທີ່​ຢູ່​ຕາມ​ແຄມ​ນ້ຳ​ງື່ມ ແລະ ນ້ຳ­ຂອງ ເຮັດ​ໃຫ້​ເຂົ້າ­ນາ​ປີ ແລະ ພືດ​ຜັກ​ລົ້ມ​ຕາຍ​ຫຼາຍ​ພັນ​ເຮັກ­ຕາ ສະ­ພາບ​ການ​ດັ່ງ­ກ່າວ ພັກ-ລັດ​ໄດ້​ຊີ້​ນຳ​ໃຫ້​ພາກ­ສ່ວນ​ກ່ຽວ­ຂ້ອງ ໂດຍ​ສະ­ເພາະ ພະ​ແນກ​ກະ­ສິ­ກຳ ແລະ ປ່າ­ໄມ້ ແຕ່​ລະ​ທ້ອງ­ຖິ່ນ​ປຸກ­ລະ­ດົມ​ຊຸກ­ຍູ້​ຊາວ​ກະ­ສິ­ກອນ​ເຮັດ​ການ​ຜະ­ລິດ​ລະ­ດູ­ແລ້ງ​ສົກ​ປີ 2018-2019 ຢ່າງ​ເປັນ​ຂະ​ບວນ​ຟົດ­ຟື້ນ.

    ທ່ານ ຫຼ້າ​ສາຍ ນວນ​ທາ​ສິງ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ໃຫ້​ສຳ­ພາດ​ວັນ​ທີ 8 ມັງ­ກອນ 2019 ວ່າ: ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ໄດ້​ສຸມ​ໃສ່​ການ​ກະ­ກຽມ​ຄວາມ​ພ້ອມ ແລະ ຊຸກ­ຍູ້​ໃຫ້​ຊາວ​ກະ­ສິ­ກອນ​ຟື້ນ​ຟູ​ການ​ຜະ­ລິດ​ຫຼັງ​ນ້ຳ​ຖ້ວມ ກໍ່​ຄື ການ​ຜະ­ລິດ​ລະ­ດູ­ແລ້ງ​ປີ 2019 ເຊິ່ງ​ຜ່ານ​ມາ​ພະ​ແນກ​ໄດ້​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ສະ­ໜອງ​ປັດ​ໄຈ​ການ​ຜະ­ລິດ​ຈຳ­ນວນ​ໜຶ່ງ ໃຫ້​ຊາວ​ກະ­ສິ­ກອນ​ເມືອງ​ທີ່​ຖືກ​ນ້ຳ​ຖ້ວມ​ເສຍ​ຫາຍ ເຊັ່ນ: ແນວ​ພັນ​ເຂົ້າ 17 ໂຕນ ພືດ​ຜັກ 20 ກວ່າ​ຊະ­ນິດ ແລະ ຝຸ່ນ​ຈຳ­ນວນ​ໜຶ່ງ ມູນ​ຄ່າ 304 ລ້ານ​ກີບ ໃຫ້​ຫ້ອງ­ການ​ກະ­ສິ­ກຳ ແລະ ປ່າ­ໄມ້​ເມືອງ 6 ເມືອງ ນຳ­ໄປ​ແຈກ​ຢາຍ​ໃຫ້​ປະ­ຊາ­ຊົນ​ທີ່​ຖືກ​ຜົນ​ກະ­ທົບ ເພື່ອ​ເປັນ​ການ​ຊຸກ­ຍູ້​ການ​ຜະ­ລິດ​ໃຫ້​ໄດ້​ຕາມ​ແຜນ­ການ ພະ​ແນກ​ໄດ້​ອອກ​ຂໍ້​ຕົກ­ລົງ​ໃນ​ການ​ລົງ​ຊຸກ­ຍູ້​ຢູ່ 9 ເມືອງ ໄດ້​ເປີດ​ຂະ​ບວນ​ການ​ປ່ອຍ​ນ້ຳ​ຊົນ­ລະ­ປະ­ທານ ຂະ​ບວນ​ການ​ປັບ­ປຸງ​ດິນ ໂດຍ​ການ​ໄຖ​ກົບ​ຕໍ​ເຟືອງ ຕົກ­ກ້າ​ນາ­ແຊງ ເປີດ​ຂະ​ບວນ​ການ​ປູກ​ສາ­ລີ​ອາ­ຫານ​ສັດ ແລະ ຂະ​ບວນ​ການ​ນຳ​ໃຊ້​ກົນ​ຈັກ​ໃນ​ການ​ຜະ­ລິດ.

    ສຳ­ລັບ​ເນື້ອ­ທີ່​ແຜນ­ການ​ຜະ­ລິດ​ລະ­ດູ­ແລ້ງ​ປີ 2019 ແມ່ນ​ອີງ­ໃສ່​ພື້ນ​ທີ່​ການ​ຜະ­ລິດ ກຳ­ນົດ​ຕາມ​ຄວາມ​ສາ­ມາດ​ໃນ​ການ​ສະ­ໜອງ​ນ້ຳ ແລະ ອີງ­ໃສ່​ແຜນ­ການ​ຟື້ນ​ຟູ​ຫຼັງ​ນ້ຳ​ຖ້ວມ ພະ​ແນກ​ໄດ້​ກຳ­ນົດ​ເນື້ອ­ທີ່​ປູກ​ເຂົ້າ­ນາ­ແຊງ 15.900 ເຮັກ­ຕາ ພືດ​ຜັກ 7.138 ເຮັກ­ຕາ ແລະ ພືດ​ອຸດ­ສາ­ຫະ­ກຳ 1.625 ເຮັກ­ຕາ ຜ່ານ​ການ­ຈັດ­ຕັ້ງ​ປະ­ຕິ­ບັດ​ນັບ​ແຕ່​ທ້າຍ​ປີ 2018 ມາ​ຮອດ​ປັດ­ຈຸ­ບັນ​ສາ­ມາດ​ຕົກ­ກ້າ​ນາ­ແຊງ​ໄດ້ 1.047 ໂຕນ ເທົ່າ​ກັບ 82% ຂອງ​ແຜນ­ການ​ປັກ​ດຳ​ໄດ້ 8.176 ເຮັກ­ຕາ ເທົ່າ​ກັບ 51% ປູກ​ພືດ​ຜັກ​ໄດ້ 2.367 ເຮັກ­ຕາ ເທົ່າ​ກັບ 66% ແລະ ພືດ​ອຸດ­ສາ­ຫະ­ກຳ​ໄດ້ 650 ເຮັກ­ຕາ ເທົ່າ​ກັບ 40%.

ຂ່າວທີ່ກ່ຽວຂ້ອງ