ຂ່າວຫຼ້າສຸດ

ເທສະການອາຫານລາວ ຈະຈັດຂຶ້ນໃນທ້າຍເດືອນນີ້

214 09 ມ.ກ. 2019 ຂ່າວໜ້າ​ໜຶ່ງ
ເທສະການອາຫານລາວ ຈະຈັດຂຶ້ນໃນທ້າຍເດືອນນີ້

    ພິ­ທີ​ຖະ­ແຫຼງ​ຂ່າວ​ເທ​ສະ­ການ​ອາ­ຫານ​ລາວ ປະ­ຈຳ​ປີ ຈັດ​ຂຶ້ນ​ວັນ​ທີ 7 ມັງ­ກອນ 2019 ຢູ່​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ ໂດຍ​ມີ​ທ່ານ​ນາງ ຈັນ­ທະ​ຈອນ ວົງ​ໄຊ ຮອງ​ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ ປະ­ທານ​ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ ປະ­ທານ​ຄະ­ນະ​ກຳ­ມະ­ການ​ຈັດ​ງານ ທ່ານ​ນາງ ບົວ​ຈັນ ສີ​ຫາ​ນາດ ຮອງ​ປະ­ທານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ຈັນ­ທະ​ຈອນ ວົງ​ໄຊ ກ່າວ​ວ່າ: ຈຸດ­ປະ­ສົງ​ຂອງ​ງານ​ດັ່ງ­ກ່າວ ເພື່ອ​ສືບ­ຕໍ່​ຊຸກ­ຍູ້ ແລະ ສົ່ງ­ເສີມ​ຫົວ­ໜ່ວຍ​ທຸ­ລະ​ກິດ​ຂອງ​ແມ່­ຍິງ ນັບ​ທັງ​ການ​ຜະ­ລິດ ການ​ປູກ​ພືດ​ກະ­ສິ­ກຳ ລ້ຽງ­ສັດ ປຸງ​ແຕ່ງ ທຸ­ລະ​ກິດ​ຮ້ານ​ອາ­ຫານ ການ​ໂຮງ­ແຮມ ແລະ ອື່ນໆ​ຢູ່​ນະ­ຄອນ­ຫຼວງ​ວຽງ​ຈັນ ແລະ ຕ່າງ​ແຂວງ​ໃຫ້​ມີ​ໂອ­ກາດ​ມາ​ວາງ­ສະ­ແດງ ແລະ ຂາຍ​ຜະ­ລິດ​ຕະ​ພັນ​ຂອງ​ຕົນ ທັງ​ເປັນ​ການ​ສ້າງ​ໃຫ້​ຜູ້​ປະ­ກອບ​ການ​ແມ່­ຍິງ​ທັງ­ຫຼາຍ ມີ​ໂອ­ກາດ​ໄດ້​ແລກ­ປ່ຽນ​ບົດ­ຮຽນ​ປະ­ສົບ​ການ ໃນ​ການ​ພັດ­ທະ­ນາ​ຜົນ​ຜະ­ລິດ​ຂອງ​ຕົນ ໃຫ້​ສາ­ມາດ​ຕອບ​ສະ­ໜອງ​ໄດ້​ຕາມ​ຄວາມ​ຕ້ອງ­ການ​ຂອງ​ຕະ­ຫຼາດ​ໃນ​ປັດ­ຈຸ­ບັນ ເປັນ​ການ​ປຸກ­ລະ­ດົມ​ໃຫ້​ຜູ້​ປະ­ກອບ​ການ​ແມ່­ຍິງ​ມີ​ຄວາມ​ຄິດ​ແບບ​ໃໝ່ ໃນ​ການ​ຜະ­ລິດ​ເປັນ​ສິນ­ຄ້າ ສາ­ມາດ​ຂາຍ​ອອກ​ສູ່​ຕະ­ຫຼາດ​ສາ­ກົນ ແລະ ສ້າງ​ເຄືອ​ຄ່າຍ​ການ​ຄ້າ​ຢ່າງ​ກວ້າງ­ຂວາງ​ໃນ​ທົ່ວ​ປະ­ເທດ ນອກ​ນີ້ ຍັງ​ເປັນ​ການ​ໂຄ­ສະ­ນາ​ເຜີຍ­ແຜ່​ອາ­ຫານ​ພື້ນ­ເມືອງ​ລາວ ຈາກ​ຜະ­ລິດ​ຕະ​ພັນ​ປອດ​ສານ­ພິດ​ທີ່​ດີ​ຕໍ່​ສຸ­ຂະ­ພາບ.

    ງານ​ວາງ­ສະ­ແດງ​ຄັ້ງ​ນີ້ ຈັດ​ຂຶ້ນ​ໂດຍ​ສະ­ມາ­ຄົມ​ນັກ­ທຸ­ລະ­ກິດ​ແມ່­ຍິງ​ລາວ ພາຍ​ໃຕ້​ການ​ຊີ້​ນຳ​ຂອງ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ມີ​ຮ້ານ​ມາ​ວາງ­ສະ­ແດງ 180 ຮ້ານ ໃນ​ນີ້ ຜູ້​ໃຫ້­ການ​ສະ­ໜັບ­ສະ­ໜູນ 32 ຮ້ານ ຫົວ­ໜ່ວຍ​ທຸ­ລະ​ກິດ​ຂອງ​ແມ່­ຍິງ​ຈາກ​ພາຍ​ໃນ ແລະ ຕ່າງ­ປະ­ເທດ 148 ຮ້ານ ເຊິ່ງ​ປະ­ກອບ​ມີ​ຮ້ານ​ອາ­ຫານ 140 ຮ້ານ ຫັດ­ຖະ­ກຳ ກະ­ສິ­ກຳ 20 ຮ້ານ ຈາກ​ປະ­ເທດ​ສະ­ມາ­ຊິກ​ອາ​ຊຽນ ສະ­ຖານ­ທູດ​ຕ່າງໆ 2 ຮ້ານ ຈາກ​ປະ­ເທດ​ໄທ 18 ຮ້ານ ສຳ­ລັບ​ປີ​ນີ້​ຈະ​ມີ​ຫຼາຍ​ຢ່າງ​ທີ່​ພິ­ເສດ ໂດຍ​ສະ­ເພາະ​ອາ­ຫານ​ເອ­ກະ­ລັກ​ຂອງ​ພາກ​ເໜືອ ພາກ​ກາງ ພາກ​ໃຕ້ ມາ​ຮ່ວມ​ວາງ­ສະ­ແດງ ແລະ ຂາຍ​ພາຍ​ໃນ​ງານ​ຍັງ​ມີ​ບໍ­ລິ­ການ​ກວດ​ສຸ­ຂະ­ພາບ​ໂດຍ​ບໍ່​ໄດ້​ເສຍ​ຄ່າ ເຝິກ­ອົບ­ຮົມ​ວິ­ທີ​ເຮັດ​ເຂົ້າ­ໜົມ ສາ­ທິດ​ປຸງ​ແຕ່ງ­ອາ­ຫານ​ພື້ນ­ເມືອງ​ລາວ ການ​ແບ່ງ­ປັນ​ຄວາມ​ຮູ້​ກ່ຽວ​ກັບ​ການ​ເລີ່ມ​ຕົ້ນ​ເຮັດ​ທຸ­ລະ​ກິດ ແລະ ກິດ­ຈະ­ກຳ​ອື່ນໆ ເຊິ່ງ​ງານ​ດັ່ງ­ກ່າວ​ຈະ​ຈັດ​ຂຶ້ນ​ວັນ​ທີ 23-26 ມັງ­ກອນ ຢູ່​ສວນ​ເຈົ້າ​ອະ­ນຸ­ວົງ ບໍ­ລິ­ເວນ​ແຄມ​ຂອງ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ