ຂ່າວຫຼ້າສຸດ

ນາຍົກ ເນັ້ນຈັດຕັ້ງປະຕິບັດແຜນພັດທະນາເສດຖະກິດງົບປະມານ ໃຫ້ເປັນຮູບປະທຳ

453 09 ມ.ກ. 2019 ຂ່າວໜ້າ​ໜຶ່ງ
ນາຍົກ ເນັ້ນຈັດຕັ້ງປະຕິບັດແຜນພັດທະນາເສດຖະກິດງົບປະມານ ໃຫ້ເປັນຮູບປະທຳ

    ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ໄດ້​ໂອ້​ລົມ ແລະ ໃຫ້​ທິດ​ຊີ້​ນຳ​ຕໍ່​ກອງ​ປະ­ຊຸມ​ສະ­ຫຼຸບ​ວຽກ​ງານ​ແຜນ­ການ-ການ​ເງິນ​ປະ­ຈຳ​ປີ 2018 ແລະ ທິດ​ທາງ​ປະ­ຈຳ​ປີ 2019 ໃນ​ວັນ​ທີ 8 ມັງ­ກອນ 2019 ເຊິ່ງ​ສະ­ແດງ​ຄວາມ​ຊົມ­ເຊີຍ​ຕໍ່​ຄະ­ນະ​ນຳ​ກະ­ຊວງ ແລະ ພະ­ນັກ­ງານ​ທັງ​ໝົດ​ຈາກ​ສູນ​ກາງ-ທ້ອງ­ຖິ່ນ ທີ່​ໄດ້​ເອົາ­ໃຈ­ໃສ່​ທຸ້ມ­ເທ​ເຫື່ອ­ແຮງ ສະ­ຕິ​ປັນ­ຍາ​ໃນ​ການ​ສ້າງ­ສາ​ພັດ­ທະ­ນາ​ປະ­ເທດ​ຊາດ ເຮັດ​ໃຫ້​ເສດ­ຖະ­ກິດ​ສືບ­ຕໍ່​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ ສະ­ພາບ​ດ້ານ​ງົບ­ປະ­ມານ​ໄດ້​ຮັບ​ການ​ແກ້​ໄຂ​ມີ​ທ່າ​ອ່ຽງ​ທີ່​ຕັ້ງ­ໜ້າ​ຂຶ້ນ ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ບັນ­ດາ­ເຜົ່າ ໄດ້​ຮັບ​ການ​ປັບ­ປຸງ​ນັບ​ມື້​ດີ​ຂຶ້ນ ອັດ­ຕາ​ຄວາມ­ທຸກ​ຍາກ​ມີ​ທ່າ​ອ່ຽງ​ຫຼຸດ​ລົງ​ເປັນ​ກ້າວໆ.

    ພ້ອມ​ນີ້ ທ່ານ​ຍັງ​ໄດ້​ເນັ້ນ​ບາງ​ດ້ານ​ທີ່​ຈະ​ຕ້ອງ​ໄດ້​ສຸມ​ໃສ່​ແກ້​ໄຂ ເພື່ອ​ເສີມ​ຂະ­ຫຍາຍ​ຈຸດ​ດີ​ທີ່​ເປັນ​ພື້ນ­ຖານ ແກ້​ໄຂ​ຂໍ້­ຄົງ­ຄ້າງ ເຮັດ​ໃຫ້​ວຽກ​ງານ​ແຜນ­ການ-ການ​ລົງ­ທຶນ ແລະ ວຽກ​ງານ​ການ​ເງິນ​ມີ​ການ​ຫັນ­ປ່ຽນ​ທີ່​ຕັ້ງ­ໜ້າ ແລະ ປະ­ກອບ­ສ່ວນ​ສຳ­ຄັນ​ໃນ​ການ​ພັດ­ທະ­ນາ​ລວມ​ຂອງ​ທົ່ວ​ປະ­ເທດ ໄດ້​ເນັ້ນ​ໜັກ​ບາງ​ບັນ­ຫາ ຄື: ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 6 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ແລະ ດຳ­ລັດ​ວ່າ​ດ້ວຍ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ແລະ ແຜນ​ງົບ­ປະ­ມານ​ແຫ່ງ​ລັດ ປະ­ຈຳ​ປີ 2019 ໃຫ້​ເປັນ​ຮູບ​ປະ​ທຳ ໂດຍ​ການ​ສ້າງ​ແຜນ​ໄລ­ຍະ​ໃໝ່​ຕ້ອງ​ຕິດ​ແທດ​ກັບ​ຕົວ​ຈິງ ມີ​ວິ­ທະ­ຍາ­ສາດ​ຫຼາຍ​ຂຶ້ນ ຕ້ອງ​ສ້າງ​ຄວາມ​ສາ­ມາດ​ໃຫ້​ຂະ­ແໜງ­ການ ແລະ ທ້ອງ­ຖິ່ນ​ໃນ​ການ​ເຊື່ອມ​ສານ​ເປົ້າ​ໝາຍ​ການ​ພັດ­ທະ­ນາ​ຂອງ​ສາ­ກົນ ເປັນ­ຕົ້ນ ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ການ​ເຕີບ​ໂຕ​ສີ­ຂຽວ ເຂົ້າ​ສູ່​ແຜນ​ຂອງ​ຂະ­ແໜງ­ການ ແລະ ທ້ອງ­ຖິ່ນ​ຢ່າງ​ແທ້​ຈິງ ເພື່ອ​ເຮັດ​ໃຫ້​ເສດ­ຖະ­ກິດ​ສືບ­ຕໍ່​ຂະ­ຫຍາຍ​ໂຕ​ຕາມ​ລຳ­ດັບ​ຄາດ­ໝາຍ​ທີ່​ວາງ​ໄວ້ (6,7% ຂຶ້ນ​ໄປ) ທຸກ​ຂະ­ແໜງ­ການ ແລະ ທ້ອງ­ຖິ່ນ​ຕ້ອງ​ປະ­ສານ​ສົມ­ທົບ​ກັນ​ໃນ​ການ​ສືບ­ຕໍ່​ຈັດ​ຕັ້ງ​ປະ­ຕິ­ບັດ 8 ມາດ​ຕະ­ການ​ຊຸກ­ຍູ້​ເສດ­ຖະ­ກິດ ໃຫ້​ມີ​ຄວາມ​ຄືບ​ໜ້າ​ຢ່າງ​ເປັນ​ຮູບ​ປະ​ທຳ ແລະ ລາຍ​ງານ​ຄວາມ​ຄືບ​ໜ້າ​ໃຫ້​ລັດ­ຖະ­ບານ​ແຕ່​ລະ​ໄລ­ຍະ ເລັ່ງ​ປະ­ຕິ​ຮູບ​ວຽກ​ງານ​ການ​ເງິນ​ຢ່າງ­ຮອບ­ດ້ານ ແລະ ແຂງ­ແຮງ ຕາມ​ຍຸດ​ທະ​ສາດ​ທີ່​ລັດ­ຖະ­ບານ​ໄດ້​ຮັບ­ຮອງ​ໃຫ້​ມີ​ຄວາມ​ຄືບ​ໜ້າ​ໄວ ແລະ ຮັບ­ປະ­ກັນ​ການ​ເກັບ​ລາຍ​ຮັບ​ໃຫ້​ໄດ້​ຕາມ​ແຜນ ແລະ ລື່ນ​ແຜນ ປະ­ຕິ​ຮູບ​ລະ­ບົບ​ການ​ລົງ­ທຶນ​ຂອງ​ລັດ ໃຫ້​ມີ​ການ​ຫັນ­ປ່ຽນ​ເຄັ່ງ​ຄັດ​ຕາມ​ລະ­ບຽບ​ກົດ­ໝາຍ ໃຫ້­ການ​ລົງ­ທຶນ​ມີ​ຈຸດ​ສຸມ ມີ​ປະ​ສິດ­ທິ​ຜົນ ແລະ ສອດ­ຄ່ອງ​ຕາມ​ງົບ­ປະ­ມານ ບໍ່​ໃຫ້​ມີ​ໜີ້​ສິນ​ສະ​ສົມ​ເພີ່ມ​ຂຶ້ນ ສິ່ງ​ທີ່​ສຳ­ຄັນ​ຕັດ­ສິນ​ແມ່ນ​ຈະ​ຕ້ອງ​ໄດ້​ເອົາ­ໃຈ­ໃສ່​ສຶກ​ສາ​ອົບ­ຮົມ​ແນວ​ຄິດ-ການ­ເມືອງ ໃຫ້​ພະ­ນັກ­ງານ​ໃນ​ຂົງ­ເຂດ​ແຜນ­ການ-ການ​ລົງ­ທຶນ ແລະ ຂົງ­ເຂດ​ການ​ເງິນ ສືບ­ຕໍ່​ປັບ­ປຸງ​ລັດ​ວິ​ສາ​ຫະ​ກິດ ພັດ­ທະ­ນາ​ເຂດ​ເສດ­ຖະ­ກິດ​ພິ­ເສດ ໃຫ້​ກາຍ­ເປັນ​ທ່າ­ແຮງ​ໜຶ່ງ​ທີ່​ສຳ­ຄັນ ໃນ​ການ​ດຶງ​ດູດ​ການ​ລົງ­ທຶນ​ພາກ​ເອ­ກະ​ຊົນ.

    ການ​ປະ​ເມີນ​ຜົນ​ໂຄງ­ການ​ລົງ­ທຶນ​ຂອງ​ລັດ​ຕ້ອງ​ປະ­ຕິ­ບັດ​ຢ່າງ​ເຂັ້ມ​ງວດ ຖືກ­ຕ້ອງ​ຕາມ​ຫຼັກ​ວິ­ຊາ​ການ ແລະ ສອດ­ຄ່ອງ​ກັບ​ກົດ­ໝາຍ ແລະ ລະ­ບຽບ​ການ​ທີ່​ກ່ຽວ­ຂ້ອງ ວຽກ​ງານ​ຂົນ­ຂວາຍ​ດຶງ​ດູດ​ການ​ຊ່ວຍ­ເຫຼືອ​ທາງ​ການ ເພື່ອ​ການ​ພັດ­ທະ­ນາ ທັງ​ໃນ​ຂອບ​ຫຼາຍ​ຝ່າຍ ແລະ ສອງ​ຝ່າຍ ຈະ​ຕ້ອງ​ມີ​ລັກ­ສະ­ນະ​ເປັນ​ເຈົ້າ​ການ​ສ່ອງ​ແສງ​ຄວາມ​ຕ້ອງ­ການ ດ້ານ​ການ​ພັດ­ທະ­ນາ​ຂອງ​ປະ­ເທດ​ໃຫ້​ຫຼາຍ​ຂຶ້ນ ສະ­ເພາະ​ການ​ຮ່ວມ​ມື​ລາວ-ຈີນ ຈະ​ຕ້ອງ​ເອົາ­ໃຈ­ໃສ່​ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ 4 ຕື້​ຢວນ ຫຼື ປະ­ມານ 4.987,8 ຕື້​ກີບ ໃຫ້​ໄດ້​ເລີ່ມ​ຕົ້ນ​ໂດຍ​ໄວ ປັບ­ປຸງ​ລະ­ບົບ​ຂໍ້​ມູນ​ສະ­ຖິ­ຕິ​ໃຫ້​ມີ​ຄຸ­ນະ­ພາບ​ສູງ​ຂຶ້ນ ແລະ ສາ­ມາດ​ເຂົ້າ​ເຖິງ​ໄດ້​ຢ່າງ​ສະ­ດວກ ໂດຍ​ການ​ຜັນ​ຂະ­ຫຍາຍ​ກົດ­ໝາຍ ແລະ ຍຸດ​ທະ​ສາດ​ທີ່​ໄດ້​ຮັບ­ຮອງ​ແລ້ວ​ໃຫ້​ເປັນ​ຮູບ​ປະ​ທຳ ເຄັ່ງ​ຄັດ​ປະ­ຕິ­ບັດ​ມາດ​ຕະ­ການ​ປະ­ຢັດ​ທົ່ວ​ຂົງ­ເຂດ​ບໍ­ລິ­ຫານ​ລັດ ເພື່ອ​ເປັນ​ແບບ­ຢ່າງ​ໃຫ້​ສັງ­ຄົມ ໂດຍ​ເຂັ້ມ​ງວດ​ການ­ຈັດ­ຕັ້ງ​ປະ­ຕິ­ບັດ​ຄຳ​ສັ່ງ​ວ່າ​ດ້ວຍ​ມາດ​ຕະ­ການ​ປະ­ຢັດ​ລາຍ​ຈ່າຍ​ງົບ­ປະ­ມານ​ຂອງ​ລັດ ເລກ​ທີ 09/ນຍ ກຳ­ນົດ​ຄືນ​ການ​ແບ່ງ​ງານ ແລະ ຄວາມ​ຮັບ­ຜິດ­ຊອບ ລະ­ຫວ່າງ​ກະ­ຊວງ ແລະ ທ້ອງ­ຖິ່ນ ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຕາມ​ທິດ​ສາມ​ສ້າງ ປີ 2019 ພວກ​ເຮົາ​ຈະ​ໄດ້​ກະ­ກຽມ​ສະ­ຫຼຸບ​ທ້າຍ​ສະ­ໄໝ​ຂອງ​ແຜນ­ການ 5 ປີ ຄັ້ງ​ທີ VIII (2016-2020) ພ້ອມ​ນີ້ ກໍ່​ໃຫ້​ຄົ້ນ­ຄວ້າ ແລະ ກະ­ກຽມ​ສ້າງ​ແຜນ 5 ປີ ຄັ້ງ​ທີ IX (2021-2025) ເພື່ອ​ເປັນ​ພື້ນ­ຖານ​ດ້ານ​ເນື້ອ​ໃນ​ໃຫ້​ແກ່​ບົດ​ລາຍ​ງານ​ການ­ເມືອງ ຕໍ່​ກອງ​ປະ­ຊຸມ​ໃຫຍ່​ຂອງ​ພັກ ຄັ້ງ​ທີ XI.

    ກອງ​ປະ­ຊຸມ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ ສຸ­ພັນ ແກ້ວ​ມີ​ໄຊ ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ມີ​ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ເຈົ້າ­ແຂວງ ຮອງ​ເຈົ້າ­ແຂວງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ