ຂ່າວຫຼ້າສຸດ

ສ ອາ​ເມ​ຣິ​ກາ ປະຕິບັດ​ການ​ປິດ​ລ້ອມ​ໃໝ່​ຕໍ່​ເວ​ເນ​ຊູ​ເອ​ລາ

641 10 ມ.ກ. 2019 ຂ່າວຕ່າງປະເທດ
ສ ອາ​ເມ​ຣິ​ກາ ປະຕິບັດ​ການ​ປິດ​ລ້ອມ​ໃໝ່​ຕໍ່​ເວ​ເນ​ຊູ​ເອ​ລາ

    ກະຊວງ​ການ​ເງິນ​ຂອງ ສ ອາ​ເມ​ຣິ​ກາ ແຈ້ງ​ໃຫ້​ຮູ້ເມື່ອ​ວັນ​ທີ 8 ມັງກອນ​ນີ້​ວ່າ ປະເທດ​ນີ້​ໄດ້​ປະກາດ​ໃຊ້​ຄຳ​ສັ່ງ​ລົງໂທດ​ເທື່ອ​ໃໝ່ ແນໃສ່​ບຸກຄົນ ຈຳນວນ 7 ຄົນ ແລະ​ ຫຼາຍ​ສິບ ອົງການ​ຂອງ​ເວ​ເນ​ຊູ​ເອ​ລາ.

    ໃນ​ຈຳນວນ​ບຸກຄົນ​ທີ່​ຖືກ​ປິດ​ລ້ອມ​ນັ້ນ ມີ​ທ່ານ ຄລາວ​ເດຍ ພາ​ຕຣີ​ເຊຍ ດີ​ອາ​​ສ ກີ​​ລ​ເລນ ອະດີດ​ລັດຖະມົນຕີ​ກະຊວງ​ການ​ເງິນ ແລະ​ ທ່ານ ຣາ​ອູນ ອັນໂຕ​ນີ​ໂອ ກອກ​ຣິນ ເບຣີ​ຊາ​ຣີ​ໂອ  ຜູ້ອຳນວຍການ​ໂທລະພາບ Globovision Tele ລວມ​ຢູ່​ນຳ. ນອກຈາກ​ນັ້ນແລ້ວ ກະຊວງ​ການ​ເງິນ ສ ອາ​ເມ​ຣິ​ກາ ກໍ​ປະຕິບັດ​ການ​ປິດ​ລ້ອມ​ຕໍ່ 23 ອົງ​ປະກອບ ໃນ​ນັ້ນ​ກໍ​ມີ Globovision Tele ຊຶ່ງ​ເປັນ​ສະ​ຖາ​ໂທລະພາບ ມີ​ສຳນັກງານ​ຕັ້ງ​ຢູ່ ໄມ​ອາ​ມີ (ສ ອາ​ເມ​ຣິ​ກາ) ແລະ​ຢູ່​ໃນ​ນະຄອນຫຼວງ ກາ​ຣາ​ກາ​​ສ (ເວ​ເນ​ເຊ​​ູ​ເອ​ລາ).

    ຄຳ​ສັ່ງ​ປິດ​ລ້ອມ​ໃໝ່​ດັ່ງກ່າວ ລະບຸ​ວ່າ ບັນດາ​ບຸກຄົນ ແລະ ​ອົງການ​ຂອງ ສ ອາ​ເມ​ຣິ​ກາ ໄດ້​ຮັບ​ອະນຸຍາດ​ປະຕິບັດ​ພຽງ​ການ​ແລກປ່ຽນ​ບາງ​ລາຍການ​ເທົ່າ​ນັ້ນ ທີ່​ພົວພັນ​ເຖິງ​ການເຄື່ອນໄຫວ​ກັບ Globovision Tele ໂດຍ​ມີ​ກຳນົດ​ເສັ້ນ​ຕາຍ ກໍ​ຄື​ວັນ​ທີ 8 ມັງກອນ ປີ 2020. ຄຽງ​ຄູ່​ກັນ​ນັ້ນ ສ ອາ​ເມ​ຣິ​ກາ ກໍ​ປະຕິບັດ​ຄຳ​ສັ່ງ​ປິດ​ລ້ອມ​ຕໍ່​ເຄືອ​ຂ່າຍ​ການ​ແລກປ່ຽນ​ເງິນຕາ ແຫ່ງ​ໜຶ່ງ​ຂອງ ເວ​ເນ​ຊູ​ເອ​ລາ.

    ກ່ອນ​ໜ້າ​ນັ້ນ ສ ອາ​ເມ​ຣິ​ກາ ກໍ​ໄດ້​ປະຕິບັດ​ມາດ​ຕະການ​ປິດ​ລ້ອມ​ມາ​ແລ້ວ  ໂດຍ​ແນໃສ່​ທ່ານ ນາງ ຊີ​ເລຍ ອາ​ເດ​ລາ ຟລໍ​ເຣ​​ສ ເດີ ມາ​ດູ​ໂຣ ຜູ້​ເປັນ​ພັນ​ລະ​ຍາ​ຂອງ​ປະທານາທິບໍດີ​ເວ​ເນ​ຊູ​ເອ​ລາ ນີ​ໂກ​ລາ​​ສ ມາ​ດູ​ໂຣ ຕະຫຼອດ​ຮອດ​ຮອງ​ປະທານາທິບໍດີ ເວ​ເນ​ຊູ​ເອ​ລາ ເດລ​ຊີ ເອ​ລອຍ​ນາ ໂຣດ​ຣີ​ເກ​​ສ ໂກ​ເມ​​ສ ແລະ ​ລັດຖະມົນຕີ​ປ້ອງ​ກັນ​ປະເທດ​ເວ​ເນ​ຊູ​ເອ​ລາ ວາ​ລາ​ດີ​ເມຍ ພາດ​ຣີ​ໂນ ໂລ​ເປ​​ສ. ນອກຈາກ​ນັ້ນແລ້ວ ຍັງ​ມີ 3 ອົງ​ປະກອບ ແລະ ​ເຮືອບິນ​ລຳ​ໜຶ່ງ ກໍ​ນອນ​ຢູ່​ໃນ​ບັນຊີ​ການ ປິດ​ລ້ອມ​ນັ້ນ​ດ້ວຍ.

ຂ່າວທີ່ກ່ຽວຂ້ອງ