ເບິ່ງບ້ານເຂົາເອົາບົດຮຽນ 10/01/2019

441 10 ມ.ກ. 2019 ຫົວຂໍ້ຂ່າວອື່ນໆ

    ມື້­ນີ້ ຂໍ​ເລີ່ມ​ຈາກ​ຂ່າວ​ບັນ­ຫາ​ຫຼຸ​ລູກ​ຢູ່ ອົດ​ຕຣາ​ລີ ຕໍ່​ໃສ່​ຂ່າວ​ກ່ຽວ​ກັບ​ເປົ້າ​ໝາຍ​ຫຼຸດ­ຜ່ອນ​ອຸ­ບັດ­ເຫດ​ຢູ່ ສສ ຫວຽດ­ນາມ.

    ທີ່ ອົດ​ຕຣາ​ລີ: ໃນ​ທີ່​ສຸດ ລັດ​ຖະ​ສະ­ພາ ລັດ​ຄວີນ​ສະ​ແລນ (Queensland) ກໍ​ໄດ້​ລົງ​ຄະ­ແນນ​ສຽງ​ຮັບ­ຮອງ​ເອົາ​ກົດ­ໝາຍ​ອະ­ນຸ­ຍາດ​ໃຫ້​ຫຼຸ​ລູກ (ແທ້ງ) ໄດ້​ຢ່າງ​ຖືກ​ກົດ­ໝາຍ ລຶ­ບລ້າງ​ກົດ­ໝາຍ “ຈາ​ລິ​ຍະ​ທຳ” ອາ­ຍຸ 1 ສະ­ຕະ­ວັດ ທີ່​ຫ້າມ​ຫຼຸ​ລູກ (ເອົາ​ລູກ​ອອກ) ຂະ​ບວນ​ການ​ຮຽກ­ຮ້ອງ​ໃຫ້​ແມ່­ຍິງ​ສາ­ມາດ​ຫຼຸ​ລູກ​ໄດ້ ໃນ​ລັດ​ນີ້​ໄດ້​ດຳ­ເນີນ​ມາ​ເປັນ​ເວ­ລາ 50 ປີ ແລ້ວ ສຽງ​ເຫັນ​ດີ ແລະ ຄັດ­ຄ້ານ​ຕໍ່​ກົດ­ໝາຍ​ສະ­ບັບ​ນີ້ ບໍ່​ຫ່າງ​ກັນ​ພໍ​ປານ­ໃດ ຄື 50-41 ແຕ່​ກໍ​ນັບ​ວ່າ​ເປັນ​ສຽງ​ສ່ວນ​ຫຼາຍ​ທີ່​ເຮັດ​ໃຫ້​ກົດ­ໝາຍ ຖືກ​ຮັບ­ຮອງ​ກົດ­ໝາຍ​ອະ­ນຸ­ຍາດ​ຫຼຸ​ລູກ​ສະ­ບັບ​ນີ້ ອະ­ນຸ­ຍາດ​ໃຫ້​ແມ່­ຍິງ​ຖື­ພາ​ສາ­ມາດ​ຫຼຸ​ລູກ​ໄດ້ ໃນ​ກຳ­ນົດ​ທີ່​ຕົວ​ອ່ອນ​ມີ​ອາ­ຍຸ​ບໍ່​ກາຍ 22 ອາ­ທິດ ແລະ ຕ້ອງ​ໄດ້​ຮັບ​ການ​ຕົກ­ລົງ​ເຫັນ​ດີ​ຈາກ​ທ່ານ­ໝໍ 2 ທ່ານ.

    ທີ່ ຍີ່­ປຸ່ນ: ໃນ​ປີ 2020 ຍີ່­ປຸ່ນ​ຈະ​ເປັນ​ເຈົ້າ­ພາບ​ງານ​ມະ​ຫະ​ກຳ​ກີ­ລາ​ໂອ​ລິມ​ປິກ ໃນ​ປາງ​ບຸນ​ກີ­ລາ​ລະ­ດັບ​ໂລກ​ຄັ້ງ​ນີ້ ຄາດ​ວ່າ​ຈະ​ມີ​ແຂກ ແລະ ນັກ​ທ່ອງ​ທ່ຽວ​ເຂົ້າ​ໄປ​ຍີ່­ປຸ່ນ​ຫຼາຍ​ສິບ​ລ້ານ​ຄົນ ດັ່ງ­ນັ້ນ ຈຶ່ງ​ຈຳ­ເປັນ​ຕ້ອງ​ໄດ້​ປັບ­ປຸງ ແລະ ພັດ­ທະ­ນາ​ອຸດ­ສາ­ຫະ­ກຳ​ທ່ອງ​ທ່ຽວ ໃຫ້​ມີ​ຄວາມ​ພ້ອມ​ຮອບ­ດ້ານ ບໍ່​ພຽງ​ແຕ່​ການ​ເອື້ອຍ​ອຳ­ນວຍ​ຄວາມ​ສະ­ດວກ​ສະ­ບາຍ ແຕ່​ຍັງ​ເນັ້ນ​ລະ­ດັບ​ຄວາມ​ປະ​ທັບ​ໃຈ​ສຳ­ລັບ​ແຂກ ແລະ ນັກ​ທ່ອງ​ທ່ຽວ​ຊາວ​ຕ່າງ­ປະ­ເທດ​ອີກ​ດ້ວຍ ຂ່າວ​ຫຼ້າ​ສຸດ​ໃນ​ຂະ​ບວນ​ການ​ພັດ­ທະ­ນາ​ການ­ທ່ອງ­ທ່ຽວ​ນີ້​ໃຫ້​ຮູ້​ວ່າ ທາງ​ການ​ຍີ່­ປຸ່ນ​ໄດ້​ປະ­ກາດ​ເກັບ​ພາ­ສີ​ຊາວ​ຍີ່­ປຸ່ນ ກໍ​ຄື ຊາວ​ຕ່າງ­ປະ­ເທດ​ທີ່​ຈະ​ເດີນ­ທາງ​ຈາກ​ຍີ່­ປຸ່ນ​ໄປ​ຕ່າງ­ປະ­ເທດ ໃນ​ຈຳ­ນວນ 1.000 ເຢັນ​ຕໍ່​ຄົນ ແລະ ເງິນ​ຈຳ­ນວນ​ທີ່​ເກັບ​ໄດ້​ນີ້ ຈະ​ໃຊ້​ກະ​ຕຸ້ນ​ອຸດ­ສາ­ຫະ­ກຳ​ທ່ອງ​ທ່ຽວ​ແຜນ​ເກັບ​ພາ­ສີ ເລີ່ມ​ປະ­ຕິ­ບັດ​ນັບ​ແຕ່​ວັນ​ຈັນ ວັນ​ທີ 7 ເດືອນ​ມັງ­ກອນ ປີ 2019 ເປັນ­ຕົ້ນ​ໄປ ໂດຍ​ຈະ​ຄິດ­ໄລ່​ເຂົ້າ​ຄ່າ​ປີ້​ໂດຍ­ສານ​ເລີຍ ຂ່າວ​ບອກ​ວ່າ ເດັກ​ອາ­ຍຸ​ຕ່ຳ​ກວ່າ 2 ປີ ຈະ​ໄດ້​ຮັບ​ການ​ຍົກ­ເວັ້ນ​ການ​ເກັບ​ພາ­ສີ​ນີ້.

    ທີ່ ສສ ຫວຽດ­ນາມ: ຂ່າວ​ຕ່າງ­ປະ­ເທດ​ໃນ​ວັນ​ທີ 7 ເດືອນ​ມັງ­ກອນ​ນີ້ ໃຫ້​ຮູ້​ວ່າ: ຫວຽດ­ນາມ​ໄດ້​ວາງ​ເປົ້າ​ໝາຍ ຫຼຸດ­ຜ່ອນ​ອຸ­ບັດ­ເຫດ ເຫດ­ການ​ຈາ­ລະ​ຈອນ​ລົງ 10% ເປົ້າ​ໝາຍ​ດັ່ງ­ກ່າວ ໄດ້​ປະ­ກາດ​ອອກ​ໃນ​ວັນ​ທີ 4 ເດືອນ​ມັງ­ກອນ 2019 ໃນ​ພິ­ທີ​ເປີດ​ປີ 2019 ເປັນ​ປີ​ແຫ່ງ​ຄວາມ​ປອດ​ໄພ​ໃນ​ການ​ສັນ­ຈອນ ພາຍ​ໃຕ້​ຄຳ​ຂວັນ “ຄວາມ​ປອດ​ໄພ​ການ​ສັນ­ຈອນ ສຳ­ລັບ​ຜູ້­ໂດຍ­ສານ ແລະ  ຜູ້​ຂັບ​ຂີ່” ໂດຍ​ການ​ເຂົ້າ​ຮ່ວມ​ຂອງ​ທ່ານ ເຈືອງ​ຮົວ​ບິງ ຮອງ​ນາ­ຍົກ­ລັດ­ຖະ­ມົນ­ຕີ ແຜນ​ຫຼຸດ­ຜ່ອນ​ອຸ­ບັດ­ເຫດ​ທາງ​ຖະ­ໜົນ​ໃຫ້​ໄດ້ 5-10% ນີ້ ເນັ້ນ​ການ​ແກ້​ໄຂ​ບັນ­ຫາ​ການ​ຈາ­ລະ​ຈອນ​ຄັບ­ຄາ​ອັ່ງ​ອໍ​ຢູ່​ຕາມ​ເມືອງ​ໃຫຍ່ໆ ເຊັ່ນ: ນະ­ຄອນ­ຫຼວງ​ຮ່າ​ໂນ້ຍ ແລະ ນະ­ຄອນ​ໂຮ່​ຈີ​ມິງ ກໍ​ຄື ຕາມ​ບັນ­ດາ​ຖະ­ໜົນ​ສາຍ​ສຳ­ຄັນ​ໃນ​ທົ່ວ​ປະ­ເທດ ຕາມ​ຄຳ​ເຫັນ​ຂອງ​ທ່ານ​ຮອງ​ນາ­ຍົກ ກໍ​ແມ່ນ​ວ່າ​ເປົ້າ​ໝາຍ​ຫຼຸດ­ຜ່ອນ​ອຸ­ບັດ­ເຫດ​ນີ້ ຈະ​ບັນ­ລຸ​ໄດ້​ກໍ​ຕໍ່​ເມື່ອ ມີ​ການ​ປະ­ຕິ­ບັດ​ບັນ­ດາ​ມາດ​ຕະ­ການ​ລວມ​ໃນ​ການ​ປ້ອງ​ກັນ ແລະ ຄວບ​ຄຸມ​ອຸ­ບັດ­ເຫດ ແລະ ຕ້ອງ​ມີ​ການ​ເຂົ້າ​ຮ່ວມ​ຂອງ​ທຸກໆ​ພາກ­ສ່ວນ​ຂອງ​ສັງ­ຄົມ ແລະ ລະ­ບົບ​ການ­ເມືອງ.

ຂ່າວທີ່ກ່ຽວຂ້ອງ