ຂ່າວຫຼ້າສຸດ

ຂະຫຍາຍບໍລິການເກັບມ້ຽນຂີ້ເຫຍື້ອໄດ້ຫຼາຍກວ່າ 21.000 ສັນຍາ

331 10 ມ.ກ. 2019 ຂ່າວໜ້າ​ໜຶ່ງ
ຂະຫຍາຍບໍລິການເກັບມ້ຽນຂີ້ເຫຍື້ອໄດ້ຫຼາຍກວ່າ 21.000 ສັນຍາ

    ທ່ານ ສອນ​ທະ­ວີ ພິມ​ມະ​ສານ ຫົວ­ໜ້າ​ກອງ​ບໍ­ລິ­ການ​ຂົນ­ສົ່ງ​ຂີ້​ເຫຍື້ອ ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ຕົວ​ເມືອງ ນະ­ຄອນ­ຫຼວງ​ວຽງ​ຈັນ (ຄບຕ) ກ່າວ​ໃນ​ພິ­ທີ​ສະ­ຫຼຸບ​ຜົນ­ງານ​ປະ­ຈຳ​ປີ 2018 ວ່າ: 1 ປີ­ຜ່ານ­ມາ ກອງ​ຄຸ້ມ​ຄອງ​ຂີ້​ເຫຍື້ອ​ໄດ້​ວາງ​ແຜນ​ເດີນ​ລົດ (ເປັນ​ເຂດ) ເພື່ອ​ເກັບ​ມ້ຽນ​ຂີ້​ເຫຍື້ອ​ແຕ່​ລະ​ບ້ານ ສຳ­ນັກ­ງານ ອົງ­ການ​ຕ່າງໆ ຕາມ​ວັນ​ເວ­ລາ​ນັດ​ໝາຍ ເຊິ່ງ​ສາ­ມາດ​ເກັບ​ຂີ້​ເຫຍື້ອ​ຈາກ​ຄົວ​ເຮືອນ ແລະ ສຳ­ນັກ­ງານ​ຕ່າງໆ​ໄດ້ 14.949 ຖ້ຽວ ມີ​ບໍ​ລິ​ມາດ 79.568 ໂຕນ ຂົນ­ສົ່ງ​ຂີ້​ເຫຍື້ອ​ສາ­ທາ­ລະ­ນະ​ຕາມ​ເສັ້ນ­ທາງ 21 ເສັ້ນ ແລະ ສວນ​ສາ­ທາ­ລະ­ນະ 639 ຖ້ຽວ ຂົນ­ສົ່ງ​ຂີ້​ເຫຍື້ອ​ຂະ​ບວນ​ການ​ອອກ­ແຮງ​ງານ 62 ຖ້ຽວ ແຮງ​ງານ 252 ຄົນ ເກັບ​ມ້ຽນ​ຂີ້​ເຫຍື້ອ​ໄປ​ຖອກ​ຢູ່​ສະ­ໜາມ​ແຕ່​ລະ​ວັນ​ຈາກ​ພາກ­ສ່ວນ​ຕ່າງໆ 29.053 ຖ້ຽວ 108.024 ໂຕນ ຈູດ​ທຳ­ລາຍ​ຂີ້​ເຫຍື້ອ​ຕິດ­ເຊື້ອ 129.041 ກິ​ໂລ ຝັງ​ຂີ້​ເຫຍື້ອ​ຕິດ­ເຊື້ອ 232 ຖ້ຽວ ເທົ່າ​ກັບ 170.450 ກິ​ໂລ ແກ່​ດິນ​ແດງ​ຖົມ​ຂີ້​ເຫຍື້ອ 5.369 ຖ້ຽວ ເທົ່າ​ກັບ 37.587 ແມັດ​ກ້ອນ.

    ຂະ­ຫຍາຍ​ການ​ບໍ­ລິ­ການ​ເຮັດ​ສັນ­ຍາ​ເກັບ​ມ້ຽນ​ຂີ້​ເຫຍື້ອ ຕາມ​ເຂດ​ຂອງ​ກອງ​ຮັບ­ຜິດ­ຊອບ ຄື: ເມືອງ​ສີ​ໂຄດ 36 ບ້ານ 4.674 ສັນ­ຍາ ເມືອງ​ຈັນ­ທະ​ບູ​ລີ 20 ບ້ານ 4.798 ສັນ­ຍາ ສີ​ສັດ­ຕະ​ນາກ 7 ບ້ານ 623 ສັນ­ຍາ ໄຊ​ເຊດ​ຖາ 28 ບ້ານ 3.765 ສັນ­ຍາ ໄຊ​ທາ­ນີ 51 ບ້ານ 5.658 ສັນ­ຍາ ນາ​ຊາຍ​ທອງ 35 ບ້ານ 1.078 ສັນ­ຍາ ເມືອງ​ຫາດ​ຊາຍ​ຟອງ 8 ບ້ານ 595 ສັນ­ຍາ ລວມ 158 ບ້ານ 21.101 ສັນ­ຍາ ສຳ­ນັກ­ງານ​ອົງ­ການ​ຕ່າງໆ 525 ສັນ­ຍາ ນອກ­ຈາກ​ປະ­ຕິ­ບັດ​ວິ­ຊາ​ສະ­ເພາະ​ແລ້ວ ກອງ​ບໍ­ລິ­ການ​ຂົນ­ສົ່ງ​ຂີ້​ເຫຍື້ອ ຍັງ​ໄດ້​ເຂົ້າ​ຮ່ວມ​ຂະ​ບວນ​ການ​ຕ່າງໆ ເປັນ­ຕົ້ນ​ຂະ​ບວນ​ການ​ອອກ­ແຮງ​ງານ​ເຮັດ­ອະ­ນາ­ໄມ​ທີ່​ນະ­ຄອນ­ຫຼວງ​ວຽງ​ຈັນ ແລະ ຫ້ອງ­ການ ຄບຕ ຈັດ​ຂຶ້ນ 18 ຄັ້ງ ມີ­ແຮງ​ງານ​ເຂົ້າ​ຮ່ວມ 476 ຄົນ ໄດ້​ປະ­ກອບ­ສ່ວນ​ພາ­ຫາ​ນະ 14 ຄັນ ແລະ ແຮງ​ງານ 352 ຄົນ ເຂົ້າ​ຮ່ວມ​ງານ​ບຸນ­ຊ່ວງ­ເຮືອ​ທ່າ​ວັດ​ຈັນ ແລະ ບຸນ​ນະ­ມັດ­ສະ­ການ​ພະ​ທາດ­ຫຼວງ ປີ 2018 ຂົນ­ສົ່ງ​ຂີ້​ເຫຍື້ອ​ໄດ້ 88 ຖ້ຽວ 313 ໂຕນ.

    ສຳ­ລັບ​ແຜນ­ການ​ໃນ­ຕໍ່­ໜ້າ ຈະ​ເອົາ­ໃຈ­ໃສ່​ປັບ­ປຸງ​ຂອດ​ບໍ­ລິ­ການ​ໃຫ້​ດີ​ຂຶ້ນ ເພື່ອ​ຮັບ­ປະ­ກັນ​ຄວາມ​ສະ­ອາດ​ໃນ​ຂອບ​ເຂດ​ບໍ­ລິ­ການ ໂດຍ​ສະ­ເພາະ ລະ­ບົບ​ການ­ຈັດ­ຕັ້ງ​ລົດ​ຂົນ­ສົ່ງ​ຕາມ​ຮູບ​ແບບ​ບໍ­ລິ­ການ​ແບບ​ໃໝ່ ແລະ ຖືກ​ຕາມ​ເວ­ລາ​ນັດ​ໝາຍ ສືບ­ຕໍ່​ປັບ­ປຸງ​ສະ­ໜາມ​ຂີ້​ເຫຍື້ອ​ຫຼັກ 32 ໃຫ້​ຖືກ​ຕາມ​ມາດ­ຕະ­ຖານ​ເຕັກ­ນິກ​ໃນ​ການ​ຝັງ​ຂີ້​ເຫຍື້ອ ສ້ອມ­ແປງ​ທາງ​ເຂົ້າ​ຖອກ​ຂີ້​ເຫຍື້ອ​ໃຫ້​ສະ­ດວກ ຄົ້ນ­ຄວ້າ​ປ້ອງ​ກັນ​ອັກ­ຄີ​ໄພ​ບໍ່​ໃຫ້​ເກີດ​ໄຟ​ໄໝ້​ສະ­ໜາມ​ຂີ້​ເຫຍື້ອ ເອົາ­ໃຈ­ໃສ່​ຂະ­ຫຍາຍ​ລູກ​ຄ້າ​ຜູ້​ໃຊ້​ບໍ­ລິ­ການ ໃນ​ຂອບ​ເຂດ​ຄວາມ​ຮັບ­ຜິດ­ຊອບ​ໃຫ້​ໄດ້ 10% ຕໍ່​ປີ ພ້ອມ​ທັງ​ເອົາ­ໃຈ­ໃສ່​ເກັບ​ມ້ຽນ​ຂີ້​ເຫຍື້ອ ສາ­ທາ­ລະ­ນະ​ໃຫ້​ມີ​ຄວາມ​ສະ­ອາດ.

ຂ່າວທີ່ກ່ຽວຂ້ອງ