ລັດຖະບານ ວາງຄາດໝາຍດຶງດູດການລົງທຶນພາຍໃນຕ່າງປະເທດ 23.086 ຕື້ກວ່າກີບ

218 10 ມ.ກ. 2019 ຂ່າວໜ້າ​ໜຶ່ງ
ລັດຖະບານ ວາງຄາດໝາຍດຶງດູດການລົງທຶນພາຍໃນຕ່າງປະເທດ 23.086 ຕື້ກວ່າກີບ

    ກອງ​ປະ­ຊຸມ​ສະ­ຫຼຸບ​ວຽກ​ງານ​ຄະ­ນະ​ກຳ­ມະ­ການ​ສົ່ງ­ເສີມ ແລະ ຄຸ້ມ​ຄອງ​ການ​ລົງ­ທຶນ​ຂັ້ນ​ສູນ​ກາງ ຂັ້ນ​ແຂວງ ແລະ ນະ­ຄອນ­ຫຼວງ ປະ­ຈຳ​ສົກ​ປີ 2018 ຈັດ​ຂຶ້ນ​ວັນ​ທີ 9 ມັງ­ກອນ 2019 ຢູ່​ສູນ​ຮ່ວມ​ມື​ສາ­ກົນ ແລະ ເຝິກ­ອົບ­ຮົມ​ລາວ-ຍີ່­ປຸ່ນ ໂດຍ​ເປັນ​ປະ­ທານ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ກຳ­ມະ­ການ​ສົ່ງ­ເສີມ ແລະ ຄຸ້ມ​ຄອງ​ການ​ລົງ­ທຶນ​ຂັ້ນ​ສູນ​ກາງ ມີ​ບັນ­ດາ​ລັດ­ຖະ­ມົນ­ຕີ ເຈົ້າ­ແຂວງ ຮອງ​ລັດ­ຖະ­ມົນ­ຕີ ຮອງ​ເຈົ້າ­ແຂວງ ຮອງ​ເຈົ້າ​ຄອງ​ນະ­ຄອນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ປີ 2018 ໄດ້​ຮັບ​ຜົນ­ສຳ­ເລັດ​ຕາມ​ຄາດ­ໝາຍ​ທີ່​ໄດ້​ກຳ­ນົດ​ໄວ້ ລວມ​ຍອດ​ຜະ­ລິດ​ຕະ​ພັນ​ພາຍ​ໃນ (GDP) ບັນ­ລຸ 152.425 ຕື້​ກີບ ສະ­ເລ່ຍ​ຕໍ່​ຫົວ​ຄົນ​ບັນ­ລຸ 2.599 ໂດ​ລາ​ສະ­ຫະ­ລັດ ຫຼື ປະ­ມານ 22,2 ລ້ານ​ກີບ ລວມ​ຍອດ​ລາຍ​ໄດ້​ແຫ່ງ​ຊາດ​ຕໍ່​ຫົວ​ຄົນ (GNI) 2.209 ໂດ​ລາ​ສະ­ຫະ­ລັດ ຫຼື ປະ­ມານ 18,87 ລ້ານ​ກີບ ບັນ­ລຸ​ໄດ້​ເກີນ​ແຜນ­ການ​ເກັບ​ລາຍ​ຮັບ​ເຂົ້າ​ງົບ­ປະ­ມານ​ບັນ­ລຸ​ໄດ້​ຕາມ​ແຜນ­ການ ແລະ ການ​ຄຸ້ມ​ຄອງ​ບໍ­ລິ­ຫານ​ລັດ​ຕາມ​ກົດ­ໝາຍ ໃນ​ຫຼາຍ​ຂະ­ແໜງ­ການ​ໄດ້​ຮັບ​ການ​ປັບ­ປຸງ​ດີ​ຂຶ້ນ ວຽກ​ງານ​ສົ່ງ­ເສີມ​ການ​ລົງ­ທຶນ​ພາຍ​ໃນ ແລະ ຕ່າງ­ປະ­ເທດ 8 ເດືອນ ສາ­ມາດ​ດຶງ​ດູດ​ການ​ລົງ­ທຶນ​ໄດ້ 3,8 ຕື້​ໂດ​ລາ​ສະ­ຫະ­ລັດ ຫຼື ປະ­ມານ 32.555,4 ຕື້​ກີບ ເຂດ​ເສດ­ຖະ­ກິດ​ພິ­ເສດ​ທົ່ວ​ປະ­ເທດ ປະ­ຕິ­ບັດ​ພັນ­ທະ 13 ລ້ານ​ກວ່າ​ໂດ​ລາ​ສະ­ຫະ­ລັດ ຫຼື ປະ­ມານ 111,37 ຕື້​ກີບ ທຽບ­ໃສ່​ປີ­ຜ່ານ­ມາ ລື່ນ 3 ເທົ່າ.

    ສຳ­ລັບ​ແຜນ­ການ​ເສດ­ຖະ­ກິດ-ສັງ­ຄົມ ປີ 2019 ລັດ­ຖະ­ບານ​ມີ​ຄາດ­ໝາຍ​ສູ້​ຊົນ ໂດຍ​ກຳ­ນົດ GDP ໃຫ້​ຂະ­ຫຍາຍ­ຕົວ 6,5% ຂຶ້ນ​ໄປ ໃນ​ນີ້ ວຽກ​ງານ​ສົ່ງ­ເສີມ-ດຶງ​ດູດ​ການ​ລົງ­ທຶນ​ຂອງ​ເອ­ກະ​ຊົນ​ພາຍ​ໃນ ແລະ ຕ່າງ­ປະ­ເທດ ຕ້ອງ​ໃຫ້​ບັນ­ລຸ 23.086,13 ຕື້​ກີບ ກວມ​ເອົາ 52,06% ຂອງ​ທຶນ​ລວມ​ທັງ​ໝົດ ເຊິ່ງ​ວຽກ​ງານ​ນີ້ ເປັນ​ວຽກ​ງານ​ບຸ­ລິ­ມະ­ສິດ​ໜຶ່ງ​ທີ່​ມີ​ຄວາມ​ສຳ­ຄັນ​ຫຼາຍ ທີ່​ປະ­ກອບ­ສ່ວນ​ໃນ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຕ່​ລະ​ໄລ­ຍະ ເປັນ​ຕົວ​ຊຸກ­ຍູ້​ເສດ­ຖະ­ກິດ​ຂອງ​ປະ­ເທດ ເຊິ່ງ​ການ​ລົງ­ທຶນ​ຂອງ​ເຂດ​ເສດ­ຖະ­ກິດ​ພິ­ເສດ​ແມ່ນ 1 ໃນ 4 ແຫຼ່ງ​ທຶນ​ຕົ້ນ­ຕໍ​ຂອງ​ລັດ­ຖະ­ບານ​ເພື່ອ​ບັນ­ລຸ​ຄາດ­ໝາຍ​ດັ່ງ­ກ່າວ ໂດຍ​ເຫັນ​ໄດ້​ຄວາມ​ສຳ­ຄັນ​ດັ່ງ­ກ່າວ ແລະ ປັບ­ປຸງ​ບັນ­ຍາ­ກາດ​ການ​ລົງ­ທຶນ ໂດຍ​ສະ­ເພາະ ການ​ແກ້​ໄຂ 10 ຕົວ​ຊີ້​ວັດ​ຂອງ​ການ​ດຳ­ເນີນ​ທຸ­ລະ​ກິດ​ໃຫ້​ມີ​ຄວາມ​ສະ­ດວກ​ຢູ່ ສປປ ລາວ ສະ­ນັ້ນ ໃນ​ສົກ​ປີ 2019 ລັດ­ຖະ­ບານ​ໄດ້​ວາງ​ແຜນ​ງານ​ລະ­ອຽດ ເພື່ອ​ແກ້​ໄຂ​ຕົວ​ຊີ້​ວັດ​ດັ່ງ­ກ່າວ ເພື່ອ​ໃຫ້​ບັນ­ລຸ​ເປັນ​ຮູບ​ປະ​ທຳ​ໂດຍ​ໄວ.

ຂ່າວທີ່ກ່ຽວຂ້ອງ