ຂ່າວຫຼ້າສຸດ

ການຮ່ວມມື ລາວ-ໂອຕຣິດ ນັບມື້ນັບມີໝາກຜົນຫຼາຍຂຶ້ນ

252 10 ມ.ກ. 2019 ຂ່າວໜ້າ​ໜຶ່ງ

    ວັນ​ທີ 7 ມັງ­ກອນ 2019 ຢູ່​ທຳ​ນຽບ​ປະ­ທາ­ນາ­ທິ­ບໍ­ດີ ນະ­ຄອນ­ຫຼວງ​ວຽນ ສ ໂອ​ຕຣິດ ທ່ານ ສີ​ທົງ ຈິດ​ໂຍ­ທິນ ໄດ້​ຍື່ນ​ສານ​ຕາ​ຕັ້ງ​ຕໍ່​ທ່ານ ອາ​ເລັສ​ຊັນ​ເດີ ແວນ​ເດີ ເບວ​ແລນ ປະ­ທາ­ນາ­ທິ­ບໍ­ດີ ສ ໂອ​ຕຣິດ ເພື່ອ​ດຳ­ລົງ​ຕຳ­ແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ​ລາວ​ຄົນ​ໃໝ່ ປະ­ຈຳ ໂອ​ຕຣິດ.

    ລາວ ແລະ ໂອ​ຕຣິດ ສ້າງ­ຕັ້ງ​ສາຍ​ພົວ­ພັນ​ການ​ທູດ​ນຳ​ກັນ​ໃນ​ວັນ​ທີ 1 ກັນ­ຍາ 1967 ການ​ພົວ­ພັນ ແລະ ການ​ຮ່ວມ​ມື​ດ້ານ​ເສດ­ຖະ­ກິດ​ລະ­ຫວ່າງ​ສອງ​ປະ­ເທດ ໄດ້​ເລີ່ມ​ມີ​ບາດ­ກ້າວ​ຂະ­ຫຍາຍ­ຕົວ​ເປັນ​ກ້າວໆ ນະ­ໂຍ­ບາຍ​ການ​ປ່ຽນ­ແປງ​ໃໝ່​ດ້ານ​ເສດ­ຖະ­ກິດ​ຂອງ​ລາວ ໄດ້​ສ້າງ​ຄວາມ​ສົນ­ໃຈ​ໃຫ້​ອົງ​ການ­ຈັດ­ຕັ້ງ​ພາກ​ລັດ ແລະ ເອ­ກະ​ຊົນ​ໂອ​ຕຣິດ​ທີ່​ມີ​ທ່າ­ແຮງ ແລະ ຄວາມ​ສາ­ມາດ​ດ້ານ​ທຶນ­ຮອນ ແລະ ເຕັກ​ໂນ​ໂລ​ຊີ​ໃນ​ລະ­ດັບ​ສູງ ເຊິ່ງ​ໄດ້​ເລີ່ມ​ສຶກ​ສາ ແລະ ເກັບ​ກຳ​ຂໍ້​ມູນ​ຂ່າວ­ສານ​ກ່ຽວ​ກັບ​ໂອ­ກາດ​ດ້ານ​ການ​ຄ້າ ແລະ ການ​ລົງ­ທຶນ​ຫຼາຍ​ຂຶ້ນ ອັນ​ໄດ້​ນຳ­ໄປ​ສູ່​ການ​ດຳ­ເນີນ ແລະ ຈັດ​ຕັ້ງ​ປະ­ຕິ­ບັດ​ຢ່າງ​ມີ​ໝາກ­ຜົນ​ຫຼາຍ​ໂຄງ­ການ ແຕ່​ປີ 2014-2018 ມີ 11 ໂຄງ­ການ​ພັດ­ທະ­ນາ​ຢູ່​ລາວ ມູນ​ຄ່າ 180 ກວ່າ​ລ້ານ​ເອີ​ໂຣ ຫຼື ປະ­ມານ 1.757,67 ຕື້​ກີບ ໃນ​ຮູບ​ແບບ​ເງິນ​ກູ້​ຢືມ​ດອກ​ເບ້ຍ​ຕ່ຳ ໂດຍ​ຜ່ານ​ທະ­ນາ­ຄານ​ໂອ​ຕຣິດ​ເຂົ້າ​ໃນ​ຂົງ­ເຂດ​ວຽກ​ງານ​ສາ­ທາ­ລະ­ນະ​ສຸກ ກະ­ສິ­ກຳ ແລະ ໂຄງ­ການ​ສ້າງ​ພື້ນ­ຖານ​ໂຄງ​ລ່າງ ແລະ ຍັງ​ມີ​ໂຄງ­ການ​ອື່ນໆ​ທີ່​ຍັງ​ຢູ່​ໃນ​ຂັ້ນ​ຕອນ​ສຶກ​ສາ.

    ການ​ຮ່ວມ​ມື ລາວ-ໂອ​ຕຣິດ ນັບ​ມື້​ນັບ​ມີ​ໝາກ­ຜົນ​ຫຼາຍ​ຂຶ້ນ ໂດຍ​ສະ­ເພາະ ການ​ຊ່ວຍ­ເຫຼືອ​ເພື່ອ​ການ​ພັດ­ທະ­ນາ​ໃນ​ຂອບ​ການ​ຮ່ວມ​ມື​ລາວ-ສະ­ຫະ­ພາບ​ເອີ​ຣົບ ທີ່​ລວມ​ມີ​ການ​ໃຫ້​ທຶນ​ການ​ສຶກ​ສາ​ລະ­ດັບ​ເໜືອ​ມະ­ຫາ­ວິ­ທະ­ຍາ­ໄລ ການ​ປະ­ກອບ​ທຶນ​ຊ່ວຍ­ເຫຼືອ​ໂຄງ­ການ​ຫຼຸດ­ຜ່ອນ​ຜົນ​ກະ­ທົບ​ຂອງ​ລະ­ເບີດ​ທີ່​ບໍ່​ທັນ​ແຕກ ນັບ​ແຕ່​ປີ 2010-2012 ມີ​ມູນ​ຄ່າ 450.000 ໂດ​ລາ​ສະ­ຫະ­ລັດ ຫຼື ປະ­ມານ 3,6 ຕື້​ກີບ ການ​ຊ່ວຍ­ເຫຼືອ​ບັນ­ເທົາ​ທຸກ​ແກ່​ຜູ້​ຖືກ​ເຄາະ​ຮ້າຍ​ຈາກ​ໄພ­ພິ­ບັດ ການ​ຊ່ວຍ­ເຫຼືອ​ສຸ­ຂະ­ພາບ​ຊຸມ​ຊົນ ໂດຍ​ຜ່ານ​ອົງ­ການ​ກາ­ແດງ​ຂອງ​ສອງ​ປະ­ເທດ ແລະ ການ​ສະ­ໜັບ­ສະ­ໜູນ​ດ້ານ​ທຶນ­ຮອນ​ສຳ­ລັບ​ການ​ສ້າງ​ບ້ານ ແລະ ໂຮງ­ຮຽນ SOS ຢູ່​ລາວ ນອກ​ນີ້ ຍັງ​ໄດ້​ມີ​ການ​ສະ­ໜອງ​ອຸ­ປະ­ກອນ​ສຳ­ຄັນ​ຈາກ​ໂອ​ຕຣິດ ໃຫ້​ໂຄງ­ການ​ໄຟ­ຟ້າ​ພະ­ລັງ­ງານ​ນ້ຳ​ຂະ­ໜາດ​ໃຫຍ່​ຈຳ­ນວນ​ໜຶ່ງ​ຢູ່​ລາວ ແລະ ຈະ​ມີ​ການ​ດຳ­ເນີນ​ໂຄງ­ການ​ຮ່ວມ​ມື​ສ້າງ​ສູນ​ຄວບ​ຄຸມ ແລະ ປິ່ນ­ປົວ​ມະ​ເຮັງ ໂຄງ­ການ​ເຝິກ­ອົບ­ຮົມ​ວິ­ຊາ​ຊີບ ຕາມ​ທິດ​ທາງ​ຊຸກ­ຍູ້​ສົ່ງ­ເສີມ​ຂອງ​ລັດ­ຖະ­ບານ​ໂອ​ຕຣິດ.

    ນັບ​ແຕ່​ມີ​ການ​ເປີດ​ສະ­ຖານ­ທູດ​ລາວ ທີ່​ປະ­ເທດ​ໂອ​ຕຣິດ ປີ 2010 ທູດ​ລາວ​ທີ່​ໄປ​ຮັບ​ໜ້າ­ທີ່​ຢູ່​ທີ່​ນັ້ນ ຍັງ​ໄດ້​ຮັບ​ການ​ມອບ​ໝາຍ​ໃຫ້​ເປັນ​ຜູ້­ຕາງ­ໜ້າ​ຖາ­ວອນ ຮັບ­ຜິດ­ຊອບ​ປະ­ສານ​ງານ ແລະ ສົ່ງ­ເສີມ​ການ​ຮ່ວມ​ມື​ກັບ 4 ອົງ​ການ­ຈັດ­ຕັ້ງ​ສາ­ກົນ​ທີ່​ເປັນ​ເຄືອ​ຄ່າຍ​ຂອງ​ສະ­ຫະ​ປະ­ຊາ​ຊາດ (ສປຊ) ຢູ່​ນະ­ຄອນ­ຫຼວງ​ວຽນ ຄື: ອົງ­ການ UNODC ອົງ­ການ IAEA ອົງ­ການ UNIDO ແລະ CTBTO ນອກ​ນີ້ ທູດ​ລາວ​ຍັງ​ໄດ້​ຖືກ​ມອບ​ໝາຍ​ໃຫ້​ຮັບ­ຜິດ­ຊອບ 9 ປະ­ເທດ ໃນ​ເອີ​ຣົບ​ກາງ ແລະ ເຂດ​ບານ​ກັງ ຕາ­ເວັນ­ຕົກ.

ຂ່າວທີ່ກ່ຽວຂ້ອງ