ຂ່າວຫຼ້າສຸດ

ທະນາຄານ​ໂລກ ປັບ​ຫຼຸດ​ຄວາມ​ເຕີບ​ໂຕ​ຂອງ​ເສດຖະກິດ​ທົ່ວ​ໂລກ

393 10 ມ.ກ. 2019 ຂ່າວຕ່າງປະເທດ
ທະນາຄານ​ໂລກ ປັບ​ຫຼຸດ​ຄວາມ​ເຕີບ​ໂຕ​ຂອງ​ເສດຖະກິດ​ທົ່ວ​ໂລກ

    ໃນ​ບົດ​ລາຍ​ງານ​ພາຍ​ໃຕ້​ຫົວຂໍ້ “ຄວາມ​ຫວັງ​ຂອງ​ເສດຖະກິດ​ທົ່ວ​ໂລກ” ຊຶ່ງ​ທະນາຄານ​ໂລກ (WB) ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 8 ມັງກອນ​ນີ້ ລະບຸ​ວ່າ ເສດຖະກິດ​ທົ່ວ​ໂລກ ຈະ​ເສຍ​ທ່ວງ​ທ່າ​ຄວາມ​ເຕີບ​ໂຕ ພາຍ​ໃນ​ປີ 2019 ແລະ 2020 ຍ້ອນ​ມີ​ຫຼາຍ​ປັດ​ໄຈ​ໃນ​ດ້ານ​ລົບ ນັບ​ແຕ່​ຄວາມ​ເຄັ່ງ​ຕຶງ​ທາງ​ດ້ານ​ການ​ຄ້າ ຄວາມ​ບໍ່​ສະຫງົບ​ຢູ່​ໃນ​ຕະຫຼາດ​ການ​ເງິນ ໄປ​ຈົນ​ຮອດ ສິ່ງ​ທ້າ​ທາຍ​ຕ່າງໆ ກ່ຽວ​ກັບ​ເງິນຕາ ຢູ່​ໃນ​ຕະຫຼາດ​ເກີດ​ໃໝ່​ຫຼາຍ​ແຫ່ງ.

    ຂ່າວ​ແຈ້ງວ່າ WB ໄດ້​ປັບ​ຫຼຸດ​ຄວາມ​ເຕີບ​ໂຕ​ຂອງ​ເສດຖະກິດ​ທົ່ວ​ໂລກ ໃນ​ປີ 2018 ແລະ 2019 ລົງ​ໄປ​ຍັງ​ເຫຼືອ​ທີ່ 3% ແລະ 2,9% ຕາມ​ລຳດັບ ຊຶ່ງ​ເປັນ​ການ​ຫຼຸດ​ລົງ​ເມື່ອ​ທຽບໃສ່​ບົດ​ລາຍ​ງານ ທີ່​ມີ​ອອກ​ມາ​ເມື່ອ​ເດືອນ​ມິຖຸນາ ປີ 2018 ທີ່​ໄດ້​ຖື​ວ່າ​ເສດຖະກິດ​ໂລກ​ຈະ​ເຕີບ​ໂຕ 3,1% ໃນ​ປີ 2018.

    ໃນ​ບົດ​ລາຍ​ງານ​ໃໝ່​ນັ້ນ ຊີ້​ອອກ​ວ່າ ບັນດາ​ສູນ​ເສດຖະກິດ​ທີ່​ຖື​ວ່າ​ເປັນ​ອັນ​ດັບ​ແຖວ​ໜ້າ ຂອງ​ເສດຖະກິດ​ໂລກ​ນັ້ນ ຕ່າງ​ກໍ​ເສຍ​ທ່ວງ​ທ່າ​ຄວາມ​ເຕີບ​ໂຕ ໃນ​ເມື່ອ​ວ່າ​ເສດຖະກິດ​ຂອງ  ສ ອາ​ເມ​ຣິ​ກາ ຈີນ ເຂດ​ໃຊ້​ເງິນ​ເອີ​ໂຣ (Eurozone) ກໍ​ໄດ້​ຮັບ​ການ​ຄາດ​ຄະເນ​ວ່າ​ຈະ​ເຕີບ​ໂຕ​ຊັກ​ຊ້າ​ລົງ ໃນ​ປີ 2019.

ຂ່າວທີ່ກ່ຽວຂ້ອງ