ຂ່າວຫຼ້າສຸດ

ຫວຽດນາມ ເປັນ​ໜຶ່ງ​ໃນ​ສິບ​ປາຍທາງ​ການທ່ອງທ່ຽວ​ທີ່​ປະ​ທັບ​ໃຈ​ທີ່​ສຸດ​ໃນ​ປີ 2019

517 11 ມ.ກ. 2019 ຂ່າວຕ່າງປະເທດ
ຫວຽດນາມ ເປັນ​ໜຶ່ງ​ໃນ​ສິບ​ປາຍທາງ​ການທ່ອງທ່ຽວ​ທີ່​ປະ​ທັບ​ໃຈ​ທີ່​ສຸດ​ໃນ​ປີ 2019

    ຂ່າວສານ​ຫວຽດນາມ ອ້າງ​ຕາມ​ຂໍ້​ມູນ​ຈາກ​ສະມາຄົມ​ການທ່ອງທ່ຽວ​ຂອງ ສ ອາ​ເມ​ຣິ​ກາ (USTOA) ຊຶ່ງ​ນຳ​ອອກ​ມາ​ເປີດເຜີຍ​ເມື່ອ​ບໍ່​ດົນ​ມາ​ນີ້ ໃຫ້​ຮູ້​ວ່າ ຫວຽດນາມ ເປັນ 1 ໃນ 10 ປາຍທາງ​ການທ່ອງທ່ຽວ​ທີ່​ໜ້າ​ປະ​ທັບ​ໃຈ​ທີ່​ສຸດ​ໃນ​ໂລກ ໃນ​ປີ 2019. ການ​ຄັດ​ເລືອກ​ບັນຊີ​ລາຍ​ຊື່​ດັ່ງກ່າວ ແມ່ນ​ອີງໃສ່​ຜົນ​ຂອງ​ການ​ສຳ​ຫຼວດ​ເມື່ອ​ບໍ່​ດົນ​ມາ​ນີ້ ຈາກ​ການ​ຈັດ​ທຳ​ຂອງ PriceWaterhouseCoopers.

    ຂໍ້​ມູນ​ດັ່ງກ່າວ ຖືກ​ນຳ​ອອກ​ມາ​ຢູ່​ໃນ​ບົດ​ທີ່​ພາກ​ຫົວຂໍ້​ວ່າ “ນັກ​ທ່ອງ​ທ່ຽວ ສ ອາ​ເມ​ຣິ​ກາ ຢາກ​ໄປ​ທີ່​ໃດ​ພາຍ​ໃນ​ປີ 2019?” ຊຶ່ງ​ຈັດ​ພິມ​ໃນ​ໜັງສືພິມ USAToday. USTOA ໃຫ້ການ​ຕີ​ລາຄາ​ວ່າ ອີ​ຕາ​ລີ ຖືກ​ຖື​ວ່າ ເປັນ​ປາຍທາງ​ທີ່​ໜ້າ​ປະ​ທັບ​ໃຈ​ທີ່​ສຸດ​ໃນ​ປີ 2019 ຮອງ​ລົງ​ມາ​ເປັນ​ອັນ​ດັບ​ສອງ​ກໍ​ແມ່ນ ອິ​ສລັງ ແລະ ​ຖັດ​ລົງ​ມາ​ຕາມ​ລຳດັບ​ກໍ​ແມ່ນ ຍີ່ປຸ່ນ ຫວຽດນາມ ອົດ​ສະ​ຕຣາ​ລີ ຝຣັ່ງ ແອັດ​ສະພາຍ ໂກ​ລົມ​ບີ ກຳປູເຈຍ ແລະ​ປອກ​ຕຸຍ​ການ.

    ບັນດາ​ສະມາຊິກ​ຂອງ USTOA ກໍ​ມີ​ບັນຊີ​ລາຍ​ຊື່​ສະຖານທີ່ 10 ແຫ່ງ ອອກ​ມາ ທີ່​ເປັນ​ປາຍທາງ​ເກີດ​ໃໝ່​ຂອງ​ໂລກ. ໃນ​ນັ້ນ ອິ​ສລັງ ສືບຕໍ່​ໄດ້​ຮັບ​ການ​ຕີ​ລາຄາ ຢູ່​ໃນ​ອັນ​ດັບ​ທີ​ໜຶ່ງ ຮອງ​ລົງ​ມາ​ກໍ​ແມ່ນ ກຳປູເຈຍ ໂກຣ​ອາຊີ ໂກ​ລົມ​ບີ ຫວຽດນາມ ປອກ​ຕຸຍ​ການ ພູ​ຖານ ໂບ​ລີ​ວີ ມຽນ​ມາ ແລະ ເອ​ທີ​ໂອ​ປີ.

    ໃນ​ຂະນະ​ດຽວ​ກັນ ໃນ​ການ​ສຳ​ຫຼວດ​ອີກ​ລາຍການ​ໜຶ່ງ​ເມື່ອ​ບໍ່​ດົນ​ມາ​ນີ້ ຊຶ່ງ​ຈັດ​ທຳ​ໂດຍ  Booking.com ຊີ້​ໃຫ້​ເຫັນ​ວ່າ​ມີ 45% ໃນ​ຈຳນວນ​ນັກ​ທ່ອງ​ທ່ຽວ 21.500 ຄົນ​ທົ່ວ​ໂລກ ເວົ້າ​ວ່າ ພວກ​ເຂົາ​ຢາກ​ຜ່ານ​ການ​ຄົ້ນ​ຫາ​ປະສົບ​ການ ແລະ ​ສຳ​ຫຼວດ​ຫຼາຍ​ຂຶ້ນ ໃນ​ການ​ຄັດ​ເລືອກ​ບັນດາ​ປາຍທາງ​ໃນ​ປີ 2019 ທຽບໃສ່​ປີ 2018.

    ເມື່ອ​ເວົ້າ​ເຖິງ​ທ່າ​ອ່ຽງ​ການທ່ອງທ່ຽວ​ໃນ​ປີ 2019 ນັ້ນ ໜັງສືພິມ USAToday ໃຫ້​ຮູ້​ວ່າ ການທ່ອງທ່ຽວ​ຊອກ​ຫາ​ປະສົບ​ການ ແລະ ​ທ່ອງ​ທ່ຽວ​ວັດທະນະທຳ ສືບຕໍ່​ເປັນ​ທາງ​ເລືອກ​ຂອງ​ນັກ​ທ່ອງ​ທ່ຽວ ສ ອາ​ເມ​ຣິ​ກາ ພາຍ​ໃນ​ປີ 2019.

ຂ່າວທີ່ກ່ຽວຂ້ອງ