ສະພາ​ແຫ່ງ​ຊາດ​ເວ​ເນ​ຊູ​ເອ​ລາ ບໍ່​ຍອມຮັບ​ຂໍ້​ຕົກລົງ​ກ່ຽວ​ກັບ​ນ້ຳມັນ ກັບ​ຕ່າງປະເທດ

407 11 ມ.ກ. 2019 ຂ່າວຕ່າງປະເທດ
ສະພາ​ແຫ່ງ​ຊາດ​ເວ​ເນ​ຊູ​ເອ​ລາ ບໍ່​ຍອມຮັບ​ຂໍ້​ຕົກລົງ​ກ່ຽວ​ກັບ​ນ້ຳມັນ ກັບ​ຕ່າງປະເທດ

    ສະພາ​ແຫ່ງ​ຊາດ​ເວ​ເນ​ຊູ​ເອ​ລາ ທີ່​ຄວບ​ຄຸມ​ໂດຍ​ຝ່າຍ​ຄ້ານ ໄດ້​ຖະແຫຼງ​ເມື່ອ​ວັນ​ທີ 8 ມັງກອນ​ນີ້ ກ່ຽວ​ກັບ​ການ​ບໍ່​ຍອມຮັບ​ສັນຍາ​ການ​ລົງທຶນ ຊຶ່ງ​ລັດຖະບານ​ເວ​ເນ​ຊູ​ເອ​ລາ ລົງ​ນາມ​ກັບ​ກຸ່ມ​ບໍລິສັດ​ນ້ຳມັນ - ແກ​​ັສ ລະຫວ່າງ​ຊາດ ເນື່ອງ​ຈາ​ກວ່າ​ຍັງ​ບໍ່​ທັນ​ໄດ້​ຮັບ​ການ​ຮັບຮອງ​ຈາກ​ອົງການ​ນິຕິບັນຍັດ.

    ການ​ຕົກລົງ​ດັ່ງກ່າວ​ມີ​ອອກ​ມາ​ໜຶ່ງ​ມື້ ຫຼັງ​ຈາກ​ທີ່​ລັດຖະບານ​ເວ​ເນ​ຊູ​ເອ​ລາ ລົງ​ນາມ​ຂໍ້​ຕົກລົງ​ການ​ລົງທຶນ​ສະບັບ​ໜຶ່ງ ກັບ​ກຸ່ມ​ບໍລິສັດ Maurel & Prom ຂອງ​ຝຣັ່ງ ເປັນ​ມູນ​ຄ່າ 400 ລ້ານ​ໂດ​ລາ​ສະຫະລັດ ຢູ່​ໃນ​ບໍ່​ນ້ຳມັນ​ແຫ່ງ​ໜຶ່ງ ໃນ​ລັດ ຊູ​ເລຍ (ເວ​ເນ​ຊູ​ເອ​ລາ).

    ສະພາ​ແຫ່ງ​ຊາດ​ເວ​ເນ​ຊູ​ເອ​ລາ ເຫັນ​ວ່າ ການ​ທີ່​ລັດຖະບານ​ລົງ​ນາມ ສັນຍາ​ການ​ບໍລິການ​ຕາມ​ລຳພັງ​ໃຈ ກັບ​ບັນດາ​ວິ​ສາ​ຫະ​ກິດ​ພາກ​ເອກະ​ຊົນ​ຕ່າງປະເທດ ໂດຍ​ທີ່​ບໍ່​ຜ່ານ​ອົງການ​ນິຕິບັນຍັດ​ນັ້ນ​ເປັນ​ການ​ກະທຳ​ລະເມີດ​ກົດໝາຍ. ໃນ​ຂະນະ​ດຽວ​ກັນ ສະພາ​ແຫ່ງ​ຊາດ​ເວ​ເນ​ຊູ​ເອ​ລາ ກໍ​ໄດ້​ສະເໜີ​ໃຫ້​ກະຊວງ​ນ້ຳມັນ-ແກ​​ັສ ຕ້ອງ​ໄດ້​ປະກອບ​ເອກະສານ​ລາຍ​ງານ​ຢ່າງ​ລະອຽດ  ເພື່ອ​ໃຫ້​ບັນດາ​ສະມາຊິກ​ສະພາ​ແຫ່ງ​ຊາດ​ຄົ້ນຄວ້າ ກ່ອນ​ທີ່​ຈະ​ລົງ​ຄະແນນ​ສຽງ​ຮັບຮອງ.

     ສະພາ​ແຫ່ງ​ຊາດ​ເວ​ເນ​ຊູ​ເອ​ລາ ທີ່​ຄວບ​ຄຸມ​ໂດຍ​ຝ່າຍ​ຄ້ານ​ນັ້ນ ໄດ້​ຖືກ​ສານ​ສູງ​ສຸດ​ປະກາດ​ໃຫ້​ເປັນ​ໂມຄະ​ໄປ​ແລ້ວ ແລະ​ ການເຄື່ອນໄຫວ​ຂອງ​ອົງການ​ນີ້ ບໍ່​ກໍ​ເປັນ​ທີ່​ຍອມຮັບ.  ປັດຈຸບັນ​ນີ້ ອົງການ​ນິຕິບັນຍັດ​ຂອງ​ເວ​ເນ​ຊູ​ເອ​ລາ ມີ​ສິດ​ດຳເນີນ​ການ​ສູງ​ສຸດ​ຢູ່​ໃນ​ເວ​ເນ​ຊູ​ເອ​ລາ ກໍ​ແມ່ນ​ສະພາ​ສ້າງ​ລັດ​ຖະ​ທຳ​ມະນູນ​ແຫ່ງ​ຊາດ ທີ່​ໄດ້​ເລືອ​ຕັ້ງ​ຂຶ້ນ​ມາ​ເມື່ອ​ປີ 2017. ສານ​ສູງ​ສຸດ​ຂອງ​ເວ​ເນ​ຊູ​ເອ​ລາ ກໍ​ໄດ້​ອະນຸຍາດ​ໃຫ້​ລັດຖະບານ​ປະເທດ​ນີ້ ລົງ​ນາມ​ຂໍ້​ຕົກລົງ​ໃນ​ຂົງເຂດ​ນ້ຳມັນ-ແກ​​ັສ ໂດຍ​ທີ່​ບໍ່​ຈຳເປັນ​ຕ້ອງ​ຜ່ານ​ສະພາ​ແຫ່ງ​ຊາດ.

ຂ່າວທີ່ກ່ຽວຂ້ອງ