ຂ່າວຫຼ້າສຸດ

ອີ​ຣານ​ແຈ້ງ​ເຕືອນ​ຈະ​ຕອບ​ໂຕ້ ຫຼັງ​ຈາກ EU ປະຕິບັດ​ຄຳ​ສັ່ງ​ປິດ​ລ້ອມ

351 11 ມ.ກ. 2019 ຂ່າວຕ່າງປະເທດ
ອີ​ຣານ​ແຈ້ງ​ເຕືອນ​ຈະ​ຕອບ​ໂຕ້ ຫຼັງ​ຈາກ EU ປະຕິບັດ​ຄຳ​ສັ່ງ​ປິດ​ລ້ອມ

    ກະຊວງ​ການ​ຕ່າງປະເທດ​ອີ​ຣານ ແຈ້ງ​ໃຫ້​ຮູ້ເມື່ອ​ວັນ​ທີ 9 ມັງກອນ​ນີ້​ວ່າ ອີ​ຣານ​ຈະ​ຕອບ​ໂຕ້ ໃຫ້​ສົມ​ຄູ່ ຫຼັງ​ຈາກ​ທີ່​ສະຫະພາບ​ເອີ​ຣົບ (EU) ຕົກລົງ​ປິດ​ລ້ອມ​ຕໍ່​ເຈົ້າ​ໜ້າທີ່​ຂອງ​ອີ​ຣານ​ຈຳນວນ​ໜຶ່ງ.

    ໂຄສົກ​ກະຊວງ​ການ​ຕ່າງປະເທດ​ອີ​ຣານ ຊີ້​ແຈງ​ຢູ່​ໃນ​ຖະແຫຼງການ​ສະບັບ​ໜຶ່ງ ຊຶ່ງ​ລົງ​ພິມ​ຜ່ານ ເວບ​ໄຊ​ທາງ​ການ​ຂອງ​ກະຊວງ​ນີ້​ວ່າ: “ອີ​ຣານ​ຈະ​ນຳ​ໃຊ້​ບັນດາ​ມາດ​ຕະການ​ທີ່​ຈຳ​ປັນ ເພື່ອ​ຕອບ​ໂຕ້ ຢ່າງ​ສົມ​ຄູ່ ຕໍ່​ການເຄື່ອນໄຫວ​ດັ່ງກ່າວ (ຂອງ EU).”

    ກ່ອນ​ໜ້າ​ນັ້ນ ໃນ​ວັນ​ດຽວ​ກັນ EU ໄດ້​ເພີ່ມ​ເຕີມ​ບຸກຄົນ​ຂອງ​ອີ​ຣານ ອີກ 2 ຄົນ ແລະ ​ຄະນະ​ອຳນວຍ​ການ ຂອງ​ອົງການ​ຄວາມ​ໝັ້ນຄົງ​ພາຍ​ໃນ ທີ່​ຂຶ້ນ​ກັບ​ກະຊວງ​ສືບ​ລາຊະການ​ລັບ ຂອງ​ອີ​ຣານ ເຂົ້າ​ໄປ​ໃນ​ບັນຊີ​ກໍ່​ການ​ຮ້າຍ. ການ​ຕົກລົງ ດັ່ງກ່າວ​ຂອງ EU ມີ​ຜົນ​ບັງຄັບ​ໃຊ້​ນັບ​ແຕ່​ວັນ​ທີ 9 ມັງກອນ​ນີ້​ເປັນຕົ້ນ​ໄປ ແລະ ​ບັນດາ​ຜູ້​ທີ່​ມີ​ຊື່​ຢູ່​ໃນ​ບັນຊີ​ກໍ່​ການ​ຮ້າຍ​ດັ່ງກ່າວ​ຂອງ EU ແມ່ນ​ຈະ​ຖືກ​ປິດ​ລ້ອມ​ດ້ານ​ຊັບ​ສິນ.

ຂ່າວທີ່ກ່ຽວຂ້ອງ