ຊາລາ ໄດ້ລາງວັນນັກເຕະດີເດັ່ນທະວີບອາຟຣິກາ ປີ 2018

222 11 ມ.ກ. 2019 ວົງຈອນກີລາ
ຊາລາ ໄດ້ລາງວັນນັກເຕະດີເດັ່ນທະວີບອາຟຣິກາ ປີ 2018

    ໂມ​ຮາ​ເໝັດ ຊາ​ລາ ກອງ​ໜ້າ​ທີມ​ຊາດ​ເອ​ຢິບ ຂອງ​ສະ­ໂມ­ສອນ​ລິ​ເວີ​ພູ​ລ ໄດ້​ຮັບ​ລາ­ງວັນ​ນັກ​ເຕະ​ດີ­ເດັ່ນ​ຂອງ​ທະ­ວີບ​ອາ​ຟຣິ​ກາ ປະ­ຈຳ​ປີ 2018 ເປັນ​ຄັ້ງ​ທີ 2 ຕິດ­ຕໍ່​ກັນ ໂດຍ​ຜົນ​ການ​ປະ­ກາດ​ລາ­ງວັນ ໄດ້​ຈັດ​ຂຶ້ນ​ວັນ​ທີ 8 ມັງ­ກອນ 2019 ຢູ່​ນະ­ຄອນ­ຫຼວງ​ດາ​ກາ ປະ­ເທດ​ເຊ​ເນ​ການ.

    ນັກ​ເຕະ​ທີມ​ຊາດ​ອີ​ຢິບ ໄດ້​ຊະ­ນະ​ຄະ­ແນນ​ໂຫວດ ຊາ​ດິ​ໂອ ມາ​ເນ່ ແລະ ປີ​ແອ ໂອ​ບາ​ເບ​ຢອງ ດ້ວຍ​ການ​ສ້າງ​ຜົນ­ງານ​ໄດ້​ຢ່າງ​ໂດດ​ເດັ່ນ​ໃຫ້​ສະ­ໂມ­ສອນ​ລິ​ເວີ​ພູ​ລ ແລະ ທີມ​ຊາດ​ເອ​ຢິບ ປີ 218 ຂະ­ນະ​ດຽວ​ກັນ ຊາ​ລາ ຍັງ​ໄດ້​ຮັບ​ລາ­ງວັນ​ດາວ​ຊັນ​ໂວ (ນັກ​ເຕະ​ທີ່​ຍິງ​ປະ­ຕູ​ຫຼາຍ​ທີ່​ສຸດ) ໃນ​ການ​ແຂ່ງ­ຂັນ​ບານ­ເຕະ ພຣີ​ເມຍ​ລີກ ອັງ­ກິດ ສົກ​ປີ 2017-2018 ດ້ວຍ​ປະ­ຕູ 32 ໜ່ວຍ.

    ຊາ​ລາ ອະ­ດີດ​ນັກ​ເຕະ​ສະ­ໂມ­ສອນ​ເຊວ​ຊີ ແລະ ສະ­ໂມ­ສອນ​ໂຣ​ມາ ກາຍ­ເປັນ​ນັກ​ເຕະ​ຄົນ­ທີ 4 ທີ່​ໄດ້​ຮັບ​ລາ­ງວັນ​ອັນ​ຊົງ​ກຽດ​ນີ້ 2 ປີ​ຕິດ­ຕໍ່​ກັນ ຫຼັງ​ຈາກ​ທີ່ ເອ​ລ ຮັດ​ຈິ ດີ​ຢຸບ ກອງ​ໜ້າ​ທີມ​ຊາດ​ເຊ​ເນ​ການ ຊາ​ມູ​ເອ​ລ ເອ​ໂຕ ກອງ​ໜ້າ​ທີມ​ຊາດ​ກາ​ເມີ​ຣູນ ແລະ ຢາ​ຢາ ຕູ​ເຣ່ ກອງ​ກາງ​ທີມ​ຊາດ​ກົດ​ດີ​ວົວ.

ຂ່າວທີ່ກ່ຽວຂ້ອງ